المساعد الشخصي الرقمي

مشاهدة النسخة كاملة : للحساوية فقط!!! دش واسمع


زهرة بنفسج
08 / 01 / 2003, 38 : 05 PM
السلام عليكم رحمة الله وبركاته


انا مالي خص بالموضوع. وصلني بالايميل قلت يا بنت خلى اخوانك الوئاميين يقرون معاكي.




تعرفون كل منطقة عندنا بالسعوديه لها مصطلحاتها و لهجتها الخاصه .. اللي اذا سمعتها وانت مو من نفس الديره والله ما تفهمها






المهم زبدة الموضوع ... انا اليوم جايب بعض المصطلحات حق منطقة الاحساء

اتحدى اللي مو حساوي يفهم شي ......... خخخخخخخخخ





اشذاذا....... ايش هذا ؟

منطول....... مرمي يعني مجدوع بالارض

مغتلق ..... ضايق صدره

امحق ....... امممممممم والله مادري كيف اشرحها بس يقولون امحق عليك ... يعني مالت عليك

موَقل ...... يعني على شفا حفرة من النار.... يعني متردد

دهريز ..... مدخل البيت

حويجة..... تصغير حاجه

مقاقة.... امممممممم شلون تنشرح هذي..... يعني يقولون ماعندها مقاقه على البزران .... يعني مالها خلق على البزران

زط ..... يعني مشفوح على الاكل

حمولة.... يعني قبيلة.. يقولون هذا الولد ولد حمولة يعني ولد قبيلي

طبينة... هذا اسم ريحة النخيل اذا حرقوها ...... والله ريحتها رهيبه

تراشي ... حلق الاذن

معاضد.... اساور

شحقة....يعني ايش حقه هذا

يزنط.... يعني يخنق ... تذكرون طاش ماطاش يوم يقول ... الله شذاذا حقيقة بيزنطوووونه

هطفة ... يعني مررررره طويل

زهبه.... يعني بسرعه

ينجب... اممممممم يعني يقولون انجب الغدا يعني حط الغدا

طرطور... ماعنده شخصيه

فريج.... يعني الحي اللي ساكن فيه

الله يغربلك..... هذي سبه

رياري....... يعني سعابيل ... لعاب< بالعربي الفصيح

انطم..... يعني اسكت

ازعق .... يعني اممممم يقولون ازعق له يعني ناده

سكَان .... يعني دركسون السياره

مطيور.... يعني خبل مو عاقل

ودج.... عكس مطيور يعني يقولون للمطيور صير ودج يعني صير عاقل خخخخخخ

ألمَك.... يعني أضمك .... (اخمك بالقصيمي خخخخخ )

متحنجة.....يعني متحجبه ......لابسة شيلتها

الموسدة..... يعني الوسادة

سمادة .... حظيرة الحيوانات

عصقول .... الضعييييف مررررررره

منتفج.... عكس عصقول يعني الدببببب

لاك.... يعني اممممممممم يعني مثلا تقول هذي الجزمه لاكه علي ... يعني ضاغطه علي ( وانتوا بكرامه )

جغم ......يعني رشفه من شي ... مثلا عطني جغم من عصيرك

يزرط.... يعني يبلع من غير ما يهضم

مغماص.... يعني اممممممم مثلا واحد كان ياكل بيض مع خبز... تقوله ممكن تعطيني مغماص يعني قطعه صغيره من الخبز فيها بيض مثلا

شمخ.... جرح صغير

يترارا.......يعني يشف ... يقولون هذا الثوب يترارا ,, يعني شفاف

ذب ....يعني رمى يقولون ذبيه يعني ارميه

قميظة.... يعني حسافه

الناس مول.... يعني الوقت متأخر

لثد ... يعني دبق مثل العسل لو لزق باليد يقولون يدي صارت لثده

امردقك.... يعني اضربك بقوووووه

هبابك ...... يعني عساه يمديك

إدن.... يعني اممممممم يقولون إدن لي مكان يعني وسع لي مكان

الصكة...... يعني برا البيت ..يقولون فلان بالصكه يعني مو بالبيت

سويعة..... تصغير ساعه

امبطح.... يعني انسدح و تمدد

مدعجة ..... اللي يدعكون فيها الجسم

صوغه ....... هديه يعني اذا سافر واحد لازم يجيب لاهله صوغه

ماتعدينا.... يعني ما طلعنا من بيتنا اليوم

يتصوخ...... يتسمع ... يسترق السمع < بالفصحى

هاش ام الطرور يطرك..... هاش يعني كعه على الوجه ...... وكلها على بعض ...سبه

مصخن..... يعني حرارته مرتفعه.




أختكم
زهرة بنفسج.

الســــيف
08 / 01 / 2003, 32 : 07 PM
مشكووووووووره يازهرة بنفسج
فعلا ماشاء الله اللهجات
في السعوووووديه

تختلف من منطقه الى اخرى

وانا بصراحه راح استفيد من هالموضوع
لن معظم اخوياي في العمل من الاحساء الذين اعتز بصداقتهم

ولكن اجهل بعض المصطلحاااات عندهم

وانا متأكد موضوعك هذا راح يخدمني في هذا الجانب:)


تحياتي
ويعطيك الف عافيه

السيف

سمير
08 / 01 / 2003, 37 : 07 PM
ههههههههههههههههههههههههههههههههه

زهرة ...

والله لهجتهم حلووووووووووووووووووة .. :D:D

وعلى فكرة ..

ترا اخونا وسيل من الاحساء .. :)

اكيد عنده خبره في هالموضووووع .. ;)

الف شكر

منووووووورة اختي

جومانه
08 / 01 / 2003, 44 : 07 PM
تصدقي يا زهرة ما فهمت شئ .........
يسلموووووو على الموضوع الحلو يا عسل .....

الرجل القاسي
08 / 01 / 2003, 57 : 10 PM
سبحان الله بعض الالفاظ مشتركه مع اهل الخرج مدري ليش

انا خوالي من اهل الخرج اما انا فتراني اسباني ( والله من النصب )

مثال منطول ذب او ذبه امبطح .

بس الغريب ما عندهم مثل بعض الناس (خفتاه ) هههههههههه ولا ياسمير

لمياء
09 / 01 / 2003, 24 : 02 AM
هلا زهرة بنفسج

مووووضوع حلووووووو

وهذه الكلمات انا نقولها /

مصخن

امحق

منطول


انطم


ذب

يعني مثلهم ...



تحياتي لك

الطير الجارح
09 / 01 / 2003, 59 : 11 AM
تسلمي زهرو بنفسج بعض هالكلمات اعرفها

زهرة بنفسج
09 / 01 / 2003, 03 : 03 PM
السلام عليكم ورحمة الله وبركاته



هلاا بالسيف :) منور بهالزيارة،،،،،،،


هو المعروف أن اهل الخليج لهجتهم متقاربة مع بعضهم البعض.




والحمد لله قدمنا لك موضوع ينفعك.





زهرة بنفسج.

زهرة بنفسج
09 / 01 / 2003, 08 : 03 PM
السلام عليكم ورحمة الله وبركاته





هلااااااااااا سمور منور بالطلة.




زهرة بنفسج.

وسيل
09 / 01 / 2003, 12 : 03 PM
|1|;):):(:D:p:o

انا حساااااااوي يا ناس

وشرايكم بلهجتنا .. حلوة صح ؟؟ :D

بما ان الغالبية هنا من الرياض .. ومافيه حساوي غيري برد لكم الصاع صاعين ونص

بصرك ,,,, يعني بكيفك ;)

فيذا .... يعني فيذا . هنا . " حط العشا فيذا " يعني هنا :D

تسذا ... المعنى واضح يعني كذا ولازم تقولها وانت ماد براطمك لتحت :p

صزز ..... يعني صدق والا صززيه يعني صدقيه :D

دبوووووووج ,,, ؟؟؟؟؟؟؟؟ بس انها شينه يعين اذا واحد قالها لك تراه يسبك

دلخ ,,,,, انظر اعلاه :D

امصع ..... يعني اسحب بقووووووه مثل الام اذا قالت لولدها تراني بمصع اذنك لو ما درست :D

يدربي ...... يعني يدحرج .... مثل واحدن من الشباب اسمه مدربي رويسه :D:D

دارسين ,,, عودان يحطونها الحريم مع الاكل بس مدري وشي ;)

شكرا زهرة بنفسج:)

زهرة بنفسج
09 / 01 / 2003, 19 : 03 PM
السلام عليكم ورحمة الله وبركاته

زمردة ارجو المحاولة مرة اخرى :D :D





زهرة بنفسج.

زهرة بنفسج
09 / 01 / 2003, 27 : 03 PM
السلام عليكم ورحمة الله وبركاته




هلا بالرجل القاسي،،،،، انت تعرف ان القبايل في الخليج متفرقة في كل دولة..... يعني تلقاء الام سعودية الاب كويتي وهم اصلا عيال عم.





لكن الاستعمار هو اللي وضع الحدود.





زهرة بنفسج.

زهرة بنفسج
09 / 01 / 2003, 32 : 03 PM
السلام عليكم ورحمة الله وبركاته



هلاا لمياء نورتي.





زهرة بنفسج.

زهرة بنفسج
09 / 01 / 2003, 40 : 03 PM
السلام عليكم ورحمة الله وبركاته


مرحبا الطير الجارح،،،،



نور الموضوع باطلالتك.





زهرة بنفسج.

زهرة بنفسج
09 / 01 / 2003, 15 : 04 PM
السلام عليكم ورحمة الله وبركاته



هلاا بالحسااااااااااااااااااااوي نورت وشرفت .... ترا لا تصدق عمرك ان هذي الكلمات بس الا أنت تستخدمها وتفهما ... معظم الكلمات الا اذا باقول كلها نحن بعد نستخدمها.



هلااااااااااااااااااابك مرة ثانية يا الحساوي( لا تزعل امزح معاك)




زهرة بنفسج.

أثير الشوق
11 / 01 / 2003, 55 : 04 AM
هاييييييييييي زهره موضوعك حلو مشكوره


وسيل بعض الكلمات تكون مختلفه من ديره لديره خاصه في نجد اكيد انت سمعت انحن وتسذا وبصرك من واحد تعرفه يكون سديراوي يعني من اهل سدير وفيه كلمات انا ما اعرفها ولما سمعتها استغربت مثل
كوده يعني يمكنه
وبعد ما برحتي يعني الا الان وفي الرياض يقولون لالها الحين

وبعد وش ذا يعني ماهاذا بااللغه العربيه الفصحه

غير وينس وشبسيعني في نهايتها س و دراعه يعني الفستان وبعد مغتلق يعني ظايق صدره

وانا احيانن اسمع امي تقول كلام ما افهم نصفه .....ززي دوس يعني خذي


وسمعت كلمات في الشماليه الغربيه غريبه مثل مابدكو يعني ماودكم

زهرة بنفسج
11 / 01 / 2003, 07 : 04 PM
السلام عليكم ورحمة الله وبركاته



هلااا باثير الشوق. نورت.



أقترح عليكم اقتراح بس ان شاء الله يعجبكم.





بما أننا في دول الخليج والدولة الواحدة تلقى فيها كلمات مختلفة وغريبة. وتواصل منا لكي كل واحد يفهم على الاخر.


نفتح صفحة جديدة ويضع كل واحد الكلمات اللي يستخدمها في مدينة أو دولة.




اذا انتم موافقين انا بافتح لكم الموضوع ،،،، وصدقوني فيه استفادة لكل.





شورايكم؟




زهرة بنفسج.

الوافية
11 / 01 / 2003, 47 : 04 PM
انا لهجتي مخللللللللللللللللللللللطة
يعني اهل ديرتي ما افهم عليهم

مرة وحده قالت كلمة وما فهمتها:confused:



ولما سألتها شمعناها
طاحت مصرقعه من الضحك:D



وللحين ما اعرف شمعناها ...بس ....والله مو بذاكرتها:confused:

زهرة بنفسج
12 / 01 / 2003, 29 : 03 PM
السلام عليكم ورحمة الله وبركاته



هلاا يا الوافية ،،،،،، يسعدني حضورك.

الا انتي ((تلقين امي تقول كلمات ما افهم عليها وساعات كثيرة أقوا لها شو تقصدين)).




تسلمين.




زهرة بنفسج.