ياللي عسر اللغز مايصعب عليه..

[الأعصار]

لغز جديد اتمنى ان يحوز على رضاكم


ياللي عسر اللغز ما يصعب علــــــــــــيه=منشدي رجال والقول ابتـــــــــــلاه
تهمته زورٍ وهو منها نزيـــــــــــــــــــــه=ينفيـّـــه من بالعقل ربي حبــــــــــاه
من يصدق به مُنــاته يلتقيــــــــــــــــــــه=لجلِ مدحٍ مكسبه مِنّــه غـــــــــــــثاه
بالِمَثل موصوف وافقه يانبيــــــــــــه=(.تابعٍ للزين) ومن يفطن لقــــــــــــــاه

[wafei]

............

...


ياللي عسر اللغز ما يصعب علــــــــــــيه..............منشدي رجال والقول ابتـــــــــــلاه
تهمته زورٍ وهو منها نزيـــــــــــــــــــــه..............ينفيـّـــه من بالعقل ربي حبــــــــــاه
من يصدق به مُنــاته يلتقيــــــــــــــــــــه..............لجلِ مدحٍ مكسبه مِنّــه غـــــــــــــثاه


:monkey2:


سلمت يداك اخوي

...

[حرف الضاد]

صح لسانك يالغالي الاعصار , ويش رايك بيوسف عليه السلام وافتتان امراة العزيز به .

[الأعصار]

wafei
وانت سالم يالغالي وانتظر المراميع
وتقبل تحياتي

[الأعصار]

اخوي حرف الضاد
مالك لوى يالغالي والبيت الاخيرحسب رمعتك اعتقد اهملته وهو عين اللغز
وتقبل تحياتي

[حرف الضاد]

صح لسانك ياالاعصار -- ويش رايك بقصة العابد جريج مع المومس--او قصة الافك وصفوان بن معطل رضي الله عنه .

[الأعصار]

مالك لوى ياحرف الضاد
وتقبل تحياتي

[حرف الضاد]

صح لسانك ياالغالي -- ويش رايك بموسى عليه السلام يوم اوعز قارون لمومس باتهامه بها .

[الأعصار]

اخوي حرف الضاد...مالك لوى ..ومازالت المراميع بعيده
من يصدق به منا ته يلتقيه...من يصدق ماقيل عنه بالتهمه يكون حريص على لقياه
لجل مدح مكسبه منه غثاه..حسب التهمه. اذا التقى فيه سوف يمدح. والحقيقه انه لاينال منه سوى الغثى.
آمل ان الصوره اتضحت اكثر يالغالي

[حرف الضاد]

صح لسانك ياالاعصار نرمع حسب ابيات اللغز :

ياللي عسر اللغز ما يصعب علــــــــــــيه.............
.منشدي رجال والقول ابتـــــــــــلاه ---------- رجل مبتلى بقول ليس بصحيح
تهمته زورٍ وهو منها نزيـــــــــــــــــــــه.............والتهمه هذه غير صحيح وينفيـّـــه من بالعقل ربي حبــــــــــاه -------------- مايصدقها من له عقل
من يصدق به مُنــاته يلتقيــــــــــــــــــــه............. ومن يصدق به يتمنى شوفته
.لجلِ مدحٍ مكسبه مِنّــه غـــــــــــــثاه ------------ مناه ان يشوفه لاجل المدح وما منه الا العناء او الغثاء
هل هو مثل : كمثل تسمع بالمعيدي خيرا من ان تراه .
ارجو اني قد فهمت اللغز .

[الأعصار]

صح لسانك على تفسير اللغز
نعم الآن احس ان اللغز اتضح اكثر ولكن مناته يلتقيه وليست شوفته فقط
تسمع بالمعيدي خيرا من ان تراه ..مالك لوى يالغالي

[حرف الضاد]

صح لسانك يالغالي -- ويش رايك بذيب يوسف -

[الأعصار]

مالك لوى ياحرف الضاد
الذيب من الناحيه العقليه ممكن يفترس الانسان.ولولا طبيعته الافتراس مااتهمبهذه التهمه.

اللغز يدور حول شيء قيل عنه مالا يقبله العقل..بمعنى آخر منافيه طبيعته تماماً..
وتقبل تحياتي

[dehnal3ood]

السلام عليكم ورحمة الله وبركاته

صح لسانك

ممكن يكون الرجم في الحج

والله أعلم

[الأعصار]

dehnal3ood
عليكم السلام ورحمة الله وبركاته
الرجم مالك لوى
والرمعه بعيده عن الشعائر الدينيه..
وللجميع تحياتي

[الأعصار]

الاخوة الزملاء المراميع توقفت واليكم بيت توضيحي
بالِمَثل موصوف وافقه يانبيــــــــــــه.......(.تابعٍ للزين) ومن يفطن لقــــــــــــــاه

وللجميع تحياتي

[جلمود]

هلا وغلا بالجميع


رمعه بعد البيت التوضيحي

والظاهر اني فقعت عين اللغز والله اعلم

يقولون البدو ان الدخان يتبع الزين

تحياتي لك

اخوك,

[الأعصار]

صح لسانك اخوي ابو تركي فقعت عينه لا عد مناك. وبيض الله وجهك
الاخوه الزملاء تعودنا في عالم الالغاز ان نبالغ بعض الاحيا ن فالقول بأن الدخان يتبع الزين نعم مخالفه للمنطق والعقل ولكن لاتصل ان نطلق عليها زورولكن اعتقد في الالغازلا نقصد الزور بكل مايعنيه فالمقصود مخالفة الواقع..
اعتقد الحل واضح واي اسفتساراو ملا حظات انا مستعد
وتحياتي للجميع