المساعد الشخصي الرقمي

مشاهدة النسخة كاملة : صباح و السلقه!!


الليدي عمشا
12 / 03 / 2006, 54 : 12 PM
بسم الله الرحمن الرحيم ..


على كثر ما اختلفو الآوادم في معتقداتهم ودياناتهم ... إلا انهم اتفقو على وجود عالم آخر هو عالم الجن ! والشياطين !! ( حتى في أديان الوثنيين اللي يعبدون البقر والقعوس والحصى وخدود البنات وبيبان بنده ..) تلقى فيه عندهم .. اشارات لوجود الجن او الأرواح او الأشباح او شي زي كذا << على طاري ( شي زي كذا ) .. يعلمني واحد يقرأ على المصاخين اللي فيهم مس .. يقول انه قد تكلم مع جني يوم سأله وش اسمك ؟ قال الجني : اسمي ( شي زي كذا ) << شكل ذا الجني توه عارف ذا الحتسية ويبي يتفلسف ( أو اني انا نصاااااااب وما عاقت معي ) !


الحاصل .. ان بعضهم يسمي الجن ( أشباح ) وبعضهم يسميهم ( ارواح شريرة ) وبعضهم يسميهم اهل الأرض ! ( الله يقاصرنا ويقاصرهم بالاحسان ) !




المهم يقول الموضوع :

الناس أجناس ..

أحد عاقل ومطامنه الله باسمه .. ومحسوب على ناقصين العقل انه جبان !
وأحد جبان صتز .. وذرووق ويخاف من ظلاله ..
وأحد .. قلبه ميت .. وما تدري هو شجاع والا سبهه ( من امور"ن" يسويها ما تخطر على بال صاحي ) !!


وبطل سالفتنا اليوم ... ما ودنا نعلّم باسمه ( وجه كاتم الضحكة ) ! :square:
بس وش نسوي ملزومين نحط له اسم ..!

اسمه ( صباح ) !!<< ما ودك ان ذا القراوى يسكنون جنب شوام ابد !!
هو صحيح اسمه ( صباح ) بس ( صباح عن صباح يفرق ) !!<<< ولا تهون الشحرورة :guitarist

فبطلنا هذا .. ما نقدر نقول عنه ( قلبه ميت ) .. لأنه أصلن ماله قلب ! :rolleyes:
اجل فيه احد صاحي يلعب في المقبره كورة .. ويخلي نصايب القبر قدّه الباب ؟!! ومن زين الطبايع مهوب يلعب الا صفرة المغرب ( بزعمه انه حسّاس وما يتحمّل حرارة الشمس والقوايل ) !! :embarasse

المشكلة انه يلعب لحاله .. واذا جاء للبيت عقب المغرب .. تشوف فيه اثر طقوق وجروح ( الظاهر انه يلعب من جن اتحاديين ) !!

**
طبعا .. امه الله يصبّرها .. ملّت من الخوف عليه .. ومن تعليمه ونصحه ( قبلها تقول له يا ولدي ترى ما يجوز ذا اللي تسويه القبور لها احترامها .. والمقبره محلّن وحيش ولا هوب زين انك تدابتس(تركض) فيها .. وحزّة المغرب خاااااصة مهوب زين الواحد يراكض فيها أو يرجّم ويتيهبل سواتك ) :furious3: <<<< فيه اشاعة قويه ان حزة المغرب هي حزّة طابور المدارس عند الجن !! :rockstar:


ومع كثر نصايح أمه إلا ان ( صباح ) مقزّز وساحب على العالم !!
تلقاه يسمع امه وهي تنصح ومتحمسه وهو قاعد يسجل نتائج دوري المقبره !! << يلعب مباريات ذهااب وايااب>>
**
**
بتل أخينا في الله ( صباح ) في هباله .. وتسنّ أمه تحتسي على جدار .. وفي إحدى ( هبقاته ) اللي مالها سنع .. مسكت معه يكشت في المقبرة .. !! ( يقول ان المقبره فيها عشب صح ومحميه ما ترعها الغنم ولا فيها ازعاج مراهقين .. واحتمال يلقى فيها فقع خاصتن ان سايلتن في الوسمي و سيول الشوارع ما شاء الله تملها ملي لو الدعوى ماغير رش بسيط ) ! << تسنّه بيكشت بأهله !


اخذ العزبه .. واخذ فراشه .. وطب في المقبرة .. الصبح .. ومعه خيمة صغيره !!
يوم نصب الخيمه وبدأ يطق أطنابها سمع صوت واحدن يون ويصيح ؟!!
كمّل طق الأطناب تسنّه ما أوحى شي ..!! :bucktooth


وفرش الخيمه .. وضبّط الفطور وأفطر ( فطور قطاوه الله يكرّم النعمه فطوره ماغير تونه .. شكله نسى الخبز .. وحط حرّته في ذا التونه الين صار يتثاوب تسنّه قطو ) !!

والظهر ضبّط الغداء وتغدى على جال قبر واحدن من كباريه المسلمين ( الله وأكبر يالدنيا .. صباح ولد أم صباح السبهه يتغدى جنب علية القوم بدون موعد ولا واسطه او دهن سير بطانه ) !!


يوم جاء عقب العصر .. ويضبط الشاهي .. ويتقهوى .. ومع غيوب الشمس .. كب تالي الشاهي بلا احم ولا دستور <<< يعني ما قال بسم الله الرحمن الرحيم !!

**
هو كب الشاهي من هنا .. وأهل الأرض يدخلون على الأمارة من هنا .. ويشتكون ذا السبهه اللي أزعجهم بلعب الكورة .. وخفّس سقوف بيوتهم وخرّب جبس الديكور .. وكملّها بسالفة الشاهي وتسبب لعيالهم بحروق من الدرجة الثانية !! << لو الجن ما عندهم وقت .. أي شي يصير يدخلون على الأمارة ؟! ( تسنّ الأمارة ناقصه مشاكل ذا المبزرة اللي كل يوم فاضحينا بمقاطع بلو توث يندى لها الجبين ومشغلين المسؤلين بخرابيط نتيجة سوء تربيتهم وغفلة أهلهم .. جعل اهلهم يغفلون عن خزان الماء الين يفيض ويغرّق الشارع وتجي المصلح وتقطع عنهم الماء ) !!<< وجه واحدن ما يعرف يدعي اذا زعل:curtain:

**

الأمارة حوّلت معاملة الجن لقسم شرطة النسيم ( على أساس ان شرطة النسيم متعودين على الجرايم واطلاق النار والهستره ) !

**
راحو الجن لشرطة النسيم .. قالو شرطة النسيم انتم منتوب تبعنا ؟!!
انتم من مقبرة العود .. ومقبرة العود تبع شرطة عتيقة !!

**
راحو الجن لشرطة عتيقة .. لقوهم ناشبين في مشاكل المباسط والعماله والتستّر ورشاوي البلدية !! ( وجه يقول هذا كلام الجن مهوب كلامي ) !! :curtain:

**
قالو شكل الدعوى بتطوّل .. ورى ما ناخذ حقنا بيدنا .. لابو صباح لابو من جابه !! ( وجه جني مخربها ) !! :stare:

والله ويجتمعون الجن في بيت واحدن منهم شكله كاااش ( ساكن في مخربة على أربع شوارع ) !
ويختارون من خيرة بناتهم ذيك الجنية اللي تسنّها ( زينب العسكري بدون مكياج ) !! :smiley2:

قالو لها .. راقبي واسبري ذا السبهه اللي دبل تسبودنا .. واذا سوى أي حركة بدون ما يسمي أو يذكر الله .. أزرقي فيه ولا عاد تطلعين الين نعلمتس !!

قال شيخ الجن .. أخاف ان بنتنا ما تتحمّل بثارة ( صباح ) !!
قالو الحاضرين .. لا تخاف يا طويل العمر .. بنتنا ذي فايزتن في برنامج ( سيرفافيل ) ! << داخلتن في جسم "خال سمين" في عز القيض !! وبدون قناع أوكسجين !!

**
ضفت الجنية عفشها .. وتجنسّت في شكل تسلبه "سلقه" !!
وراحت تبطّح عند خيمة ( صباح ) !!
يوم قام ( صباح ) تالي الليل.. وشاف ذا " السلقه " وهي تبطّح جنب الخيمه !!
يوم طلع له ( ذاك ابو قرون اللي في يده شوكه ) << يعني تفكير شيطاني !!
وطرى عليه انه يفسق !! <<< نعوذ بالله من الفسق والفسوق !!

**
دخل الخيمه وجاب له عظم دجاجة وقام يقردن السلقه عشان تدخل الخيمه ! ( موزي ورى باب الخيمه جوال كاميرا عشان يوثّق جريمته النكراء ) !! << طرّاه ان موضه ذا الفسّاق من تالي صارت المجاهرة بالفسوق والعصيان حتى مع الحيونات !!

الجنية " السلقه " على نياتها مستانسه تحسب انها بيدخلها الخيمه عشان يكب عليها شاهي وتدخل فيه حسب المخطط الجناوي الصهيوني اليميني المتطرف !! ( وجه يهودي لابس طاقيه سوداء وحاط جدايل صغيرات تسنّها مصران بربري خايستن تسبده من الشعير ) !!

ما درت ذا السلقة انه بيكب عليها بدل الشاهي بريق حليب !! ( الله اكبر عاااااااد .. تسنّ اهنا فرق بين بيالة الشاهي وبريق الحليب ؟!! كلهن فيها حروره تروع ) !!

**
يوم دخلت الخيمة .. ما عاد تسمع الا صوت السلقه وهي تصوي ! <<< قالت العرب صوت الكلبه .. أي ارتفع صوتها وهي تبكي بحرقة و أنين نتيجة الألم !! ( عليه من الله ما يستحق صباح ولد أم صباح مافي قلبه خوف من الله ولا رحمة ابد ) !!

قعدت ذا الجنية كل الليل وهي تصوي .. يوم ظهرت الشمس .. وقام ( صباح ) من النوم ويلقى "السلقه" ناشبتن فيه

يبي يبعدها عنه .. ما قدر !!
والله المشكلة .. وش ذا السلقة اللزقة ؟؟!!

**
ويقعد ( صباح ) يشوّت فيها برجله .. وهي تصااااوي .. ( يحلفون ان عيال عمها في مقبرة النسيم سمعو صياحها ) !

ويجوون الجن ( مواصلين ما نامو ) يشوفون ورى بنتهم تصيح !
يوم شافو بنتهم وهي متوهقة مع ( صباح ) وهو يرجّف فيها برجلة ! ( يوم انقسمو قسمين .. بعضهم يبي يذبح صباح .. وبعضهم يقول لا خل نستر على بنتنا ) !! << طرّاه انها هي اللي باليته وناشبتن في حلتزه !! على بالها ان ذا الأشكال ينمزح معهم

**
وفي الأخير ... أتفقو انهم يسترون على بنتهم .. ويزوجونها لـ( صباح ) !

قام شيخ الجن .. وتجنّس في شكل قطوة عشان تشوفه "السلقة" وتلحقة وتبعد عن ( صباح ) !! <<< خدوعي شيخ ذا الجن الله يغربله !!

**
ونجحت خطة شيخ الجن .. وافتك ( صباح ) من ذا اللزقه .. وقرر انه يرد جميل ذا القطوة .. وعزمها على الفطور ! ( تخبرون فطور صباح .. تونه .. يعني مناسبه مرررره ) !! :hippy:

وقبل لا يحط شيخ الجن لقمة التونه في أثمه .. قال لـ( صباح ) .. انا منيب ماكل من فطورك الين تلبي طلبي !

قام صباح وقرّب النعله .. وقال بتاكل الحين وإلا أواسي وجهك بذا النعله ! ( بعض الشيوخ الله يهديهم يحسبون ان ذا المراهقين يعرفون علوم الرجال ) !!

والله ويبلع العافية شيخ الجن .. ويقعد يزرّط في ذا التونه الين انتفخ بطنه !! :laugh3:

يوم شاف ( صباح ) ابعد النعله .. وهو يقوم يتحكحك في سيقان ( صباح ) عشان يعطيه وجه ! ( مشكلة الجن انهم يتقمصون الدور بقوة ) !! :mask:

يوم توه باغي يحتسي وهو يشوف ( ابو قرون وشوكة ) فوق راس (صباح) ! << رجّه صباح ما يبي له شي ابد .. !!

يوم شاف شيخ الجن .. ذا ابو شوكه يدور فوق راس صباح .. خاف يجيه ما جاء " السلقه " وهو يحط رجله ويفرك وكأنه يقول : بلا استر علي البنت بلا هم ( الزم ما على شيوخ الجن .. أذنابها ) <<< طرّاه انه قطو وذنبه وش ملحه !!

**
وهكذا ما زالت قضية أذية ( صباح ) لجيرانه من الجن .. معلّقه .. ولم يجد ( صباح ) أحد يوقفه عن تهوره .. وإجرامه في حق نفسه وفي حق الأخرين !! وما زال دوري ( صباح ) لكرة القدم مستمرا في داخل اسوار المقبرة ..!! ( وجه يقول عسى يسمع به الشيخ صالح كامل ويجي يشفرّه )
**
حتى أتى عليه يوم فقد فيه رشده وعقله ..!
وخطف طفلة بريئة من أمام منزلها ..!
في ثاني يوم العيد ..!

ولسان حاله يقول : لا صار شيخ الجن ما قدر علي .. فشيخ الأنس مهوب قاويني ! :party2: :party2:

صورة مع التحية .. للإدعاء العام لردع كل من تسوّل له نفسه المساس بأمن الوطن أو التلاعب بأعراض المسلمين ( انس أو جن ) !

صورة مع التحية .. لشرطة مدينة الرياض ( ترى ان تهاونتو مع أهل المخارب والسلق والقطاو وذا اللي يتسدحون في مواقف النقل الجماعي وسموم المخدرات تسري في عرقوهم .. انغلثو وطالو عيالكم ) !

صورة مع التحية .. للمحكمة الكبرى وياليت نشوف صورة صك قصاص مثل ذا الأشكال بأسرع وقت !!

عزاء لكل أسرة يتعرّض أحد أطفالها لذئب بشري له سوابق ومع هذا ماخذن راحته ويدوج صباحية العيد ( وجه يتقطع ألم على طفلة حي الفيصلية ) !!



منقووووووول مع التحيه:joker:

شروق الوئام
12 / 03 / 2006, 18 : 05 PM
صورة مع التحية .. للإدعاء العام لردع كل من تسوّل له نفسه المساس بأمن الوطن أو التلاعب بأعراض المسلمين ( انس أو جن ) !

صورة مع التحية .. لشرطة مدينة الرياض ( ترى ان تهاونتو مع أهل المخارب والسلق والقطاو وذا اللي يتسدحون في مواقف النقل الجماعي وسموم المخدرات تسري في عرقوهم .. انغلثو وطالو عيالكم ) !

صورة مع التحية .. للمحكمة الكبرى وياليت نشوف صورة صك قصاص مثل ذا الأشكال بأسرع وقت !!

عزاء لكل أسرة يتعرّض أحد أطفالها لذئب بشري له سوابق ومع هذا ماخذن راحته ويدوج صباحية العيد ( وجه يتقطع ألم على طفلة حي الفيصلية ) !!

أتوقـــــــــع إن هـــــــــــذا هـــــــــو الهــــــــــــدف وراااااااااااء هــــــــــذا الطــــــــــرح الســــــــــاخر الطـــــــــــريف..

وان رجعنا للقصـــــــــه.. بصراحــــــــــه حوارتـــــــــــها ووصف الكاتب لهـــــــــا يفطس ضحـــــــــك..
خصوصا لمن كتب:
قال شيخ الجن .. أخاف ان بنتنا ما تتحمّل بثارة ( صباح ) !!
قالو الحاضرين .. لا تخاف يا طويل العمر .. بنتنا ذي فايزتن في برنامج ( سيرفافيل ) ! << داخلتن في جسم "خال سمين" في عز القيض !! وبدون قناع أوكسجين !!

هههههههههههههههههه..استغفـــــــــــر اللـــــــــــــــه..

اللـــــــــــه يعطيــــــــــــك العافيـــــــــــــه الليدي..
ماننحرمش من مواضيعـــــــــك ياعســـــــــل..