يا آخر غلا وين الغلا الأولـي وين = أحـس بـــك مــوجـــة فتــور و هـداوة
ما كنت هادي كنت نار و براكين = و كنت لـ غلاي أشد وأكثر صفاوة
كنت تحضني لا تضايقـت من شين = وكنت تقبل ضيقتي بالحفـاوة
وش غيرك يا بعد عين هالعين = وأنت تعرفني زين ليش الجفاوة ؟
وأنت تعرفني زين .. وأنـا أعرفك زين ؟؟ = ليش تغابا وأنت ما بك غباوة
أدري بـ خطـاي ولا يبي منك تبيين = بس الظروف من الخطأ أكثر قساوة
وشلون تقسى وأنت ساسك من اللين = وأنت الخليط إمنالندى والنداوة
شفنـي وصلتــك .. جـرح .. بحســاب جرحيــن = داوه عساني ما خلا منك داوه
و ارجع مثــل .. ما كنت يا شجرة التين = وأعـط الغصون اليابسات الطـراوة
أبيـك تلعب لعبتك بالشرايـيـن = لعبة عبث فيها تصنــّع عـداوة
أبي العيارة منك وحدة وثنتيـن = وأبي كلمات الدلع والشقاوة
اللي ترددهن على كل يومين = يوم أتراهى بك ولا بك رهاوة
الــ لــيـش .. وبكيفــي .. ومقدر .. وبعــديـــن = مــرّات لكن منك فيهـن حلاوة
الـ ( ليــــش ) لامني سألتك سؤاليـن = ولا كـان عنــدك للإجابة فضاوة
و ( كيفــي ) ليـا ردّيت ليــشك بــ ليشيــن = تقولها زعلان تبغــي الرضاوة
و ( مــقدر ) ليا من قلت لك يوم الاثنيــــن = يومِِ مسمــّـى يجمــع أهــل السماوة
و ( بعــدين ) لا من ذبــت بين الشفاتيـــن = ولعانتك تدفع خجلــك بـ جــراوة
هذي كلماتك من الحين للحين = وهذا دلعــك اللي يـزيدك حلاوة
ارجع فديتك مثل ما كنت هالحين = والله تعـبت مـن الجفــا والقسـاوة

مطلق النومسي