تولّـــم يا القصيد اللي عليه السمع والطاعه= نبي نكتب قصيدة حب فـ(الدلوع) وعيونه
نبي نبحر على فُـلك الغرام ونطلق شراعه=نبي ننخا جنون الشعر لين يثور بجنونه
نبيه يذوّبه لا من قراه وعانق اسماعه= نبي يرقص على انغامه نبيه يجاوب لحونه
حبيبي والله إن القلب عـدّك غاية أطماعه= تعال وعانقه يا أغلى مساييره ومضنونه
تعال إقطع دوابر حزن عمرك وابتر ذراعه= تعال وخلنا نرتع بجو الحب وفنونه
أحبك كثر مايذكر غريب الدار مرباعه= وكثر ما لاح برّاق الحيا والبدو يطرونه
كثر مايطلع الصبح وينير الأرض بـ( اشعاعه )= وكثر مايقبل الليل ويلف الكون بردونه
كثر ما نفس راع المال للأموال طمّـــاعه= وكثر ما طافوا الحجّـاج حول البيت وركونه
كثر ما ولّـعت راس الزقاره نار ولاّعـــه= وكثر مايسجع القمري وتطرب لجله غصونه
أحبك كثر ما(تـــك..تــك) ياعمري عقرب الساعه= وكثر ما قال أبو نوره أغاني عشق مجنونه
حبيبي كل ما هب القصيد وجاك ذعذاعه= تذكّـــر شاعرٍ ساق القصايد فيك موزونه
تذكّـر من طغى حبك بصدره وارجف أضلاعه= غزيته واستبحته وامتلكت القلب وحصونه
فديت الجمرتين اللي عليها الروح فـــزّاعه= فديت حجاجك المبري فديت الرمش مع نونه
حبيبي والمشاعر فيك ولهانه وملتاعه= كتبت الشعر واتمنى ينال إعجاب مفتونه