لاوالله الاّ ساع زان الجو واهتاض الضمير=تعال يا عذب الشعر بالطيب بالقوة تعال
تراي باعي في مجال الشعر ماهو بالقصير=أخذت قسمي ضمن من يمشون في هذا المجال
ما اقول انا الشاعر وانا الماهر والأول والأخير=اقول شاعر ضامن المكسب وعندي رأس مال
وانا ليا مني طرقت الشعر بالمعنى خبير = اسوقها بالقاف سوق الكيف من صفر الدلال
ياكم ماتسبح بي الأشعار بالبحر الغزير = وياكم ما ترقى معي فوق المراقيب الطوال
ألجالها لاصرت للهوجاس والأفكار اسير =وتدخلني وتحميني من الهم برهيف السلال
واذكر بها ما بالحياة من المواقف ما يصير =واحفظ فيها مذكرات العمر من ماض الليال
فيها حفظت الموقف اللي حيّر اللي ما يحير = خلاني أقول السؤال ولا أقدر أجيب السؤال
سبحان رب الكون يا نجمٍ محلّه ما يسير=نجوم غابت وطلعت وهوه محله لا يزال
مكانه اعلى منطقه لكن بالكون الصغير=وحكمه حرام الوقت هذا ويمكن يعوّد حلال
حاولت افكر فيه بعرف له مع الدنيا مسير=وإنه مسيره حول نفسه لا جنوب ولا شمال
كل الكواكب شكلها واحد لكنه شكل غير=ماله شبيه ألا الهلال اليا اكتمل بدر الهلال
وجلست افكر كيف بوصله وهو دربه خطير=لين اهتديت لخطةٍ توصلني لنيل المنال
وصنعت لي في ورشة الأفكار ماكوكٍ يطير=وركبت فيه وقلت بسم الله على الكوكب عدال
سافرت يا طول السفر كله خطر دربٍ عسير=أخذت فيه شهور والساعات فيها كالليال
وبدأ يبين ويختفي وانا على رؤياه اسير=اليا اختفى وقفت واليا بان شديت الرحال
وبديت منه اقرب وباين كنّه سراجٍ منير= نجمٍ لمع ضوءه سطع كامل ولله الكمال
وهبط مكوكي فوق جمرٍ معتلي مرو وغدير =من تحت حد السيف يالبيه سيفٍ له ظلال
وسكنت به وحدي وصرت امير وأميرٍ كبير= وملكت فيه من الذهب مالا يقدّر بالريال
اليا زعل يارب لطفك صار شره مستطير= واليا ضحك تضحك لي الدنيا ويا سهل المنال
أحلى والذ من العسل وانعم من قماش الحرير=واصعب على غيري لمن يبغاه من هد الجبال
أقرب لي من زرار ثوبي والبشارة للبشير=والفرق عن غيره كما فرق الحقيقة والخيال
طرى عليّه يوم زان الجو واهتاض الضمير=تعال يا عذب الشعر بالطيب بالقوة تعال