منتديات الوئام

منتديات الوئام (http://www.alweam.net/vb/index.php)
-   ‏ بوحْ الشعِر والنثر .. (http://www.alweam.net/vb/forumdisplay.php?f=3)
-   -   قاهرتهم هالعبايه مايبون الستر دوم (http://www.alweam.net/vb/showthread.php?t=89581)

عطر الحروف 03 / 09 / 2013 05 : 08 PM
قاهرتهم هالعبايه مايبون الستر دوم
 
http://www.girls-top.net/vb/img/girl...573364_554.jpg

العـــبايه عولموها ,. و انفــثو فــيها السمـوم
من ملاهي الرقص جابوا فكر تخصير العباة


ضيقوا صدر العباة ووسعوا طرف الكــموم
ونزلوها لين وصلت آخر أكتاف الفــــــــتاة

بانت نحور الصبايا وانكشف شكل الهدوم
والغبــية تحسبنها زايـده زين وحــــــــلاة

والبراقــع ,, دلعــوها لين عـآام الخد عـوم
لازم القرضه توسع والكحل يلقى الحــياة

طوروا شكل النقاب وصارت الدعوه علوم
صار شفاف(ن)يوضح خدها ويا الشـــفاة

وآخر الصرعه لثام(ن) يفتن الرجل العزوم
والفتن قالوا ضلاله للقلوب المؤمنــــــات

وش علامك بنــت حوى تستبيحين السلوم
أو مع خيلك ياشقراء بعضكم جنس البنات

قـآاهرتهم هـ العبايه ما يبون الـسـتر دوم
جدهم علمان يعني لاصيام ولاصــــــــلاة

حطوا إن البنت سلعه وغلفوها بالهموم
وارفعوا شعار(ن) ينادي للحقوق الضايعات

من ظلمها والبدو لاصاحت الحرمه تقوم
قايمه تحت المعادي لجل عين الشامخات

من ظلمها يوم قام المعتصم من عز نوم
قال وين الكافر اللي يستبيح المسلمـــات

ثم ذبح لجل شعرتها من العدو كثر النجوم
قال هذا حق منهو يستذل الطــــــــاهرات

نكسوا ذاك الشعار ولملموا باقي السهوم
يكسر الخاطر سهمكم لاضرب في مدرعات

بيتكم ,, لاصار مبني داخل البيت مهدوم
وبيتنا صوم وصلاة وحج وأشهد والزكاة

إتركيهم يابدويه ,, و خــلي اللايـم يلووم
وسعي خصر العبايه واكرمي بالمكرمات

وإن رفعتيها لراسك أصبح الراس محشوم
العبايه فوق راسك حشمه وطيب وثبــات

و ما عليك من اللئيمه تحاول تقـلدك يوم
لبست البرقع ولكن حن عرق الماجدات

بحنكها ألفين دقه مدري ألف من الوشوم
أو تراه ألفين هكري يكتبون الذكريات

ولابغت تكتب قصيده قافها هو قاف يوم
(يوم يابا)(يوم يابا)جاك عرق الراقصات

جت تقول إني بدويه قلت أنـتي وجه بوم
إعقبي منتي بدويه أنتي جزء من الحصاة

يابدويه لايغرك بعض غربان(ن) تحوم
أنتي فوق الكل أنتي فوق روس النايفات

أنتي يوم الحرب دارت والمعارك (قوم)(قوم)
عانقت عزوات أخوك صوت ضرب المرهفات

إن حدوا من بيننا أو طولوا حد العقوم
يابدويه طبعي أرقى فوق كل الطايلات

إحذري يابنت منهم طبعهم نفث السموم
عولمتهم لو أعرفها طلع معنى الشـتات

ضيقوا صدر العباة ووسعوا طرف الكموم
وبيجي يوم نشوف فيه شقوق في وسط العباه
/
رآقت لي كثيراً..,,
تحيآتي لكم ..,

wafei 03 / 09 / 2013 31 : 08 PM
رد: قاهرتهم هالعبايه مايبون الستر دوم
 
...............

...


وراقت لنا يالقطوعه :dizzy:


حمدالله عالسلامه غربة المشاعر


عودة حميدة وموفقة
من خلال هذه الكلمات الجميلة والمعبرة


...

أبو خـ البجادي ـالد 03 / 09 / 2013 00 : 09 PM
رد: قاهرتهم هالعبايه مايبون الستر دوم
 
بانت نحور الصبايا وانكشف شكل الهدوم
والغبــية تحسبنها زايـده زين وحــــــــلاة

والبراقــع ,, دلعــوها لين عـآام الخد عـوم
لازم القرضه توسع والكحل يلقى الحــياة
--------------

كلمات نصح اجتماعية تضرب في المفاصل لكنها لا تخلو من الوصف الغزلي

قصيدة تستحق الإعجاب والنقل

شكرا غربة مشاعر

شموع الغربية 03 / 09 / 2013 01 : 09 PM
رد: قاهرتهم هالعبايه مايبون الستر دوم
 
نورت ياغروب بعد غيبه
وعساها اخر الغيبات يارب
الحمد لله على سلامتك
جدا جميلة الكلمات أعجبتني
وجسدت وااقع ماينادي به بني ليبرال وعلمان
صح لسان قايلها ،وسلمت يدااااك
جميل انتقاااءك ياغربة المشاعر
دمت بكل خير وسعادة

عطر الحروف 04 / 09 / 2013 55 : 06 AM
رد: قاهرتهم هالعبايه مايبون الستر دوم
 
..

هلا وغلا فيكم نورتم الآبيآت بجمال حضوركم .,
الله يسلمكم ويسعدكم يارب .,
لاحرمني الله من إطلالتكم ..
دمتم بود...

فتى الجميزه 04 / 09 / 2013 34 : 10 AM
رد: قاهرتهم هالعبايه مايبون الستر دوم
 
حيا الله الأستاذه غربة مشاعر والحمد لله على السلامه أخيتي مايروق لك يروق لنا كيف لا وهو من أختيار وذوق غربة المشاعر
وصح لسان قايلها وسلمت يدين وعقل ناقلها أدام الله عليك لباس الصحه والعافيه ولك تحياتي


الساعة الآن 55 : 02 PM بتوقيت السعودية

Powered by vBulletin® Copyright ©2000 - 2024, Jelsoft Enterprises Ltd.
new notificatio by 9adq_ala7sas

[ Crystal ® MmS & SmS - 3.7 By L I V R Z ]