عشرة ايام غبتي كل يومٍ بعام=عشرة ايام خلت دمعتي تستجير
عشرة ايام خلت من فؤادي حطام=كيف لو عاد غبتي بالشهر وش يصير؟؟
صرت كنّي رضيعٍ ذاق مر الفطام=ماتت امّه وتوّه في حياته صغير
من غيابك طريقي يكتسيه الظلام=من غيابك اتوه وصرت كنّي ضرير
عفت شربي وزادي صرت حتى ماأنام=صار همّي وساده والليالي حصير
اسهر الليل اهوجس والخلايق نيام=استفزّ الخواطر واستفزّ الضمير
قلت بكتب قصيده للغلا والهيام=قلت بكتب قصيده للحسين الغرير
ياأم رمشٍ كحيلٍ في طرفه السهام=قلبي اللي يحبك صار لأجلك كسير
ياأم عينٍ تناعس ارحمي المستهام=المفارق مصيبه همّ قلبي كبير
غارن البيض منّك وانتي ريم العدام=غارن البيض منّك ياأم خدٍ حرير
تقتلين العذارى لاإستملتي القوام=خصرك ليا تثنّى شب فيهنّ سعير
إن وقفتي يفزّن كلهن بالقيام=وإن جلستي تركتي كل عذرى تحير
وإن حكيتي غرقتي في الدلع ياسلام=وإن سكتي سكووتك للسوالف يثير
وإن ضحكتي جمعتي زين كل الأنام=نور وجهك تكاشف كالسراج المنير
لبّا قلبك وكلك لابديتي الخصام=لازعلتي فؤادي من مكانه يطير
لاعقدتي الحواجب وابتديتي الملام=زاد حسنك وقلبي صار وضعه خطير
لك بقلبي معزّه لك بقلبي مقام=والله إنك لحالك والله مالك خشير
ليت منهو بلغ بك غايته والمرام=ليت منهو يضمك للحشى ياعشير
والله انّي لأشيلك في عيوني غرام=وأنسجن في غرامك ياغناتي اسير
شاب قافي وباقي ياحياتي كلام=وبختم اللي بديته بإختصارٍ يسير
عشرة ايام خلّت من فؤادي حطام=كيف لو عاد غبتي بالشهر وش يصير؟

الاخ الغالي الشاعر القادم بقوة

مخاوي الجرح

قصيدة رائعة بكل معاني الكلمة

جزلة من جزل ننتظر ابداعك

فلا تحرمنا

لك مني كل الحب

مخاوي الجرح ..

ياسلام ياسلام .

رااااااائعه الكلمات عذبه .. رقيقة جميله وكل صفات الحسن فيها

صاغها مخاوي الجرح بعد ان التقى الفرح :)

صح لسانك ولاهنت

تحياتي