ضمي خيال اللي سرت فيه الأشواق = ضمي خيال اللي من الحب ضميـان
ضمي خيال اللي على البعد مشتـاق = ضمي خيال اللي لشوفتك عطشـان
ضمي خيال اللي وقف لك على ساق = ضمي خيال اللي سبح وسط الأحزان
ضمي خيال اللي لضحكتك مفتـااااق = ضمي خيال اللي عرفتيـه حيـران
ضمي خيال اللي للأشواق سـواااق = ضمي خيال اللي من الهـم مليـااان
ضمي خيال اللي كتب وسط الأوراق = ابيات شعرٍ تنقري مثـل الالحـااان
واليا أرتوى رديه من قبل الاشـراق = عساه يرجع لي من الحـب رويـان
واليا ارتوى ومن الهوى ذاق ما ذاق = قولي فمان الله وارجـع لنـا ثـان
رديه قبل الشمس تطلـع وينسـاق = رديه لا ينشـاف واعطيـه عنـوان
هذا خيال اللي مـن الحـب حـراق = هذا خيال اللي من الحـب هيمـان
ما بي خيالي يلقطه كـل عشـاااااق = ما بي خيالي ينظره كـل عيّـاااااان
ما بي خيالي ينكشف بعـد مـا راق = ما بي خيالي يعرفه كـل فتّـااااااان
انتي عيوني وانتي القلـب لا فـاق = لا فاق ما شافك غدى مثل عميـان
انتي لي الحب داخله وسط الأعماق = انتي لي اجمل بين حضـرٍ وبـدوان
انتي لي انتي وانتي اللي لك اشتاق = اسمك ورسمك ما تخفيـه الازمـان
اغليك مثل اللي ليـا شـاف بـراق = سرى يقول البرق نعمه للأوطـااان
حبك بقلبـي مـا تخفيـه الأحـداق = حبك بقلبي مثل جنـات الاغصـان
واخر كلامي لك قصيدي والأشـواق = مشتاق والله كيف والحـال ضميـان

من اللي قال لك بانسى ؟ كرمتي يكذب اللي قال = من اللي لك حكى عني عسى غاليه يحكي به
عسى تصفق عليه امه يديها وترفع الولوال = وعساه لجرح وافي مثل ماحكيه جرحني به
عنود الصيد مانساها ولو ان المفارق طال = انا وشلون ابانســى واحد لطفه غـــمرني به
انا وشلون بانسى من عليها الدمع هل ليال = وانا وشلون بانسى من دمـوعه غرقت جيبه
انا وشلون بانسى من لها وسط الحشا منزال = انا وشلون بانسى من غلاي اكـبر عذاريبه
انا وشلون بانسى من لها رمش العيون ظلال = انا وشلون بانــسى واحد طيــــبه ملكني به
كرم حاتم وعطف ام اليتامى بوصفها تختال = وبن شـــداد نالت وصـــفه بليل عوى ذيبه
عزوم الشيخ ابوها ماتردت في سبيل الخال = عريب وعرّب المنسب ولاخابت مطاليبه
وجت بنت الكحيلة وصفها يضرب به الامثال = وضاعن الحروف بوصفها من وين تبدي به
صهيل الخيل يجذبها ويتعب باثرها الخيال = وتخطيها سهومه يوم كل سهومها تصيبه
اصيلة من قبيلة فخرها مشهود بالافعال = لها بالمــــجد تاريخ يـــــشرفها تـماري به
لها بالقلب مكنون الغلا لو زلت ماينزال = وفيض القلب من باقي غلاها الدم يسري به
وغابت عن عيوني وتركت صورة كما التمثال = بوسط القلب حال انــــساه لحظة فكرتني به
وضاعن الرسايل واستحالت خدمة الجوال = وعن صوته ماعاد اظن يكفني مكاتيبه
وساعات الفرح زلت وحل بقلبي الزلزال = زماني لو صفى لابـــده يـــكدر مشـــاريبه
حسيبك يازمن فوق الشفاه لبسمتي تغتال = وتسرق دمعة افراحي لشمع العمر تطفي به
حرام دموع مغليها تعانق خدها والشال = دخـــــيلك دوك عذبني وعطني عنه تعذيبه
رخصت وله رخص حالي ورخصت دمعة الرجال = ورضيت بما كتب ربي مثل مانتي رضيتي به
ولو ان السعادة تنشري بالحال وايا المال = رخصنا كل غالي للي اغلى منه نصخي به
سقى الله يازمان فات عشنا به كما الاطفال = قــــــلوبٍ ساهــــية ليل المواجع ماتغني به
بعكس اليوم ياسبحان رب غير الاحوال = وصار الامس ذكرى تصبح بقلبي وتمسي به
تفرقنا وصرت اسامر دموعي على الاطلال = أؤنب قلـــــبي ودمــــــعي يجــــاوبني لتانيبه
على الذكرى عزفت الصرخة ولحنتها موال = مصيبة فرقة الــــغالي مصيبة والله مــصيبة
عسى من رد يوسف لي يردك مستريح البال = وانا يارب صــــبرني يالـــــين الغالي تجيبه

أنا مفقود ادوّر لي ولي يمكن ثمان شهور = أشيّد للفرح قصرٍ هبوب الحزن تعصف به
ترجيت الزمن يضحك ويبني للسعاده قصور = ترجيته يفرّحني ولو إن الفرح كذبه
وعدني بباكر وباكر ظلامه يشتكي للنور = وعدني بباكر وباكر شكالي الويل والغربه
علامي لابغيت افرح وأشيّد للوصال جسور = تشب بخافقي نارٍ وتقتل ضحكةٍ عذبه
يمر العيد يكتبني على خدّ الحزن بسطور = يجدد لوعة الفرقى ويعلن في الحشى حربه
حبيبي لاتواخذني إلا منه حصل بي قصور = حبيبي ودي افرح بك ولكن حالتي صعبه
أنا وشلون ابفرح بك وقلبي في الهوى مغدور = أنا وشلون ابفرح بك وقلبي ضايعٍ دربه
أنا وشلون ابفرح بك وقاعي بالحزن ممطور = أعيش بدنيتي ظامي ولاحصلت لو شربه
ثمان شهور تتركني وأحسّبها ثمان دهور = وترجعلي ولاكنّك غرست بخافقي حربه
حبيبي للأسف قلبي من الفرقى غدى مكسور = كسرت الخاطر العاشق وتوّك ترتجي قربه
رح بدربك وودّعني أببني للهموم قصور = وأبرسم للحزن صوره مدام إن الفرح كذبه

زهور الربيع اقفت عليها نجوم الصيف = وصــارت هشيـــم طيرت به هـبايبها
وحلم اليتيم اصبح بعينه مجرد طيف = مثل حلــم وافــي ذاب بعيون مـتعبها
ربيع العمر طبنا وطابت وطاب الكيف = وكلمة اسف خــابت بشــتى مطالـبها
بعد ماعرفت اني بقلبك مجرد ضيف = نزل وارتحل واعطى ضيافتك واجبها
حشا مايجيك اللوم ياصاحبي والحيف = وعشرتك ماهانت وصاحـبك صاحبها
وبارحل مع الذكرى عسى لي بها تخفيف = من احزان قلـب فيه بانــت صــوايبها
سلامي على اللي حبها ماحواه الزيف = وصـدوق المشاعر همــسها ماتكذبها
رميت آخر اوراقي بتالي ليال الصيف = وبعد اطـلاعك قول مرحـوووم كاتبها