سمعت لي كلمةً مدري وش أقصاهــــا =حزت بصدري وانا ماني بهارجهــــا
لوكـــــــــــــــل كلمه الى جتنا تبعناهـــا= بعنا الثمينه بســــعرً ما يخارجهـــــا
لــو مــرت السمع ما كنــا ســمعنــاهـــا =ونقفل الـــراس عنها لايبـــرمجهــــــا
ومــن يــم هــــذا لهـــذا ما نــقــلناهـــــا =والنـاس واجـــد وتلقى من يروجهــــا
ومـن جـابها بيـن خــلـق الله ووداهــــــا =لـو بــه مراجــل ترى نفسه يسـمجهـا
ومن عامل الناس في سابق خطاياهـــــا= يقعد بدارً خــــلا مــا داج دايجــهــا
في كنة ً تشوي الجربوع رمضاهـــــــا= تابس غصون الشجر من حر واهجها
والناس بالحق حكم الشيخ ما أرضاهــا= مــاتـرضي النــاس لــوأنــك تحججها
وياللي تبي الطيبه خذها وعطناهــــــــا= خــل الطريفه طـريه لا تــثــلجــهــــا
وأقضب طريق الاوادم وامش ممشاهـا =اتبـع دروب العرب وانهج مناهجهــا
وأرسم لنفسك أحــــدودً لا تعداهــــــا =من حط نفسه بدرب الضيق يحرجها
وأن كان نفسك هواها قام ينحاهـــــــــا =حط الاعنه بروس الخيل وأسرجهــا
وفـــــكـــر بـمـنـكـافـهـا قـدام مغزاهــا =وأضرب احساباتها وتشوف ناتجهـا
وكـلً بـعـضـده يموح الدلو برشاهـــا =وتلقى كبود الضوامي من يبرهجهـا
وان كـان تـوك عـلى صدرك تهجاهـا =حـنـا تـرانـا نـدرس فـي مـنـاهـجهـا
مــن يــم مــصـبـاحهـا نـبعد معشاهـا =الــى قــعــد راعـي الضلّع يـدرجها
لـوهـي صعـيـبه الى انعاجت عدلناهـا =واللي تجي مستقيمــه ما نعـروجهـا
نــهـتـم فـى وزنـهـا وأبـرام معـنـاهـــا =ومـن الكرســتال والـلـؤلـؤ نـتوجها
مـثــل الـجـواهـر الـى منـــا نظمناهــا =واسلوكها من جديد الزري ننـسجها
مـخــايلً تــرتــدم والصدر منشاهــــا =ان دك بـالبـال هـاجوسً يـهـيجـها
واليا امطرت ضاقت الوديان في ماها =تأخذ الى الحول ما يبست مدالجهـا
وأن صـدت النـاس عــنــا ما تبعناهــا =ما تـقــفي الناس عــنــا وانتولجهــا
وأن جــاتـنـا الطيبه بالطيب زدناهــــا =الـطـيـبـه بالعسل والسمن نـمزجهـا
وأن جــاتـنـا الثانيه نصبر ونرفاهـــــا =يمكن الى فاق راعـيـها يعــالجهــــا
وأن عــادهــا عــودة ً ما عاد ينساهـا =من حربة في صميم الصدر نولجها
مـسـمـومـة يـبـلـش الـدكتور بأدواهــا =مـايـقـنـع الخـبل لـين انه أيلامجهــا

" الشاعر / عبدالله بن زويبن الحربي "

وان كان توك على صدرك تهجاهـا = حنا ترانـا نـدرس فـي مناهجهـا
من يـم مصباحتهـا نبعـد معشاهـا = الى قعـد راعـي الضلـع يدرجهـا
لوهي صعيبه الى انعاجت عدلناهـا = واللي تجي مستقيمه مـا نعروجهـا

فعلا قصيدة اسم على مسمى وقد تكون شاملة
تطرّق الشاعر لعدد من المواقف واشار بشيء من الفخر والإعتزاز بالنفس .

من يم مصباحتها نبعد معشاها
أعتقد الصحيح . من يم مصباحها

وأيضا .. الى قعد راعي الضلع يدرجها
اعتقد من المستحسن وضع شدة فوق اللام (الضلّع )

قصيده كلها حكم ونصائح مفيدة.

صح لسان الشاعر الكبير عبدالله بن زوبين الحربي
وسلمت أستاذي وافي على حسن الاختيار
دمت بخير وعافية.