ياسيدي ما بيننـا فالهـوى فـرق=والسابقة يظهـر يديهـا السباقـي
وش فيه وجهك يذبل شوي ويعرق=دخيل وجهك ردنـي فـي نطاقـي
أمزح معك واستعذب الضحك والقرق=واقسى على سلـكٍ حريـرٍ رقاقـي
تعجبني البكـوة ودمعاتـك الـزرق=تقسيمـةٍ تعـزف بعـود عـراقـي
إحساس ينعشني من العرق للعـرق=وارتاح له في كـل مفصـل دقاقـي
تسرق ولومالك عوايد على السـرق=قلب عليـه تشـد حبـل الوثاقـي
علمتني كيف السما تحضن البـرق=من دون لايحدث هنـاك احتراقـي
وحسستني كيف الدواء يبري الحرق=وكيف الهوى يبغى له اسلوب راقي
يطري عليه كـل ماغنـت الـورق=الساعـة اللـي جمعتنـا طراقـي
الله كم فيهـا لعبنـا علـى طـرق=واسألك باقي شـي وتقـول باقـي
ماباقي الا النـوم فعيونـك الغـرق=وبصماتك العشرة علـى الاتفاقـي
خذني معك وارحل من الغرب للشرق=لكن حرام تجيـب سيـرة فراقـي

خذني معك وارحل من الغرب للشرق لكن حـرام تجيـب سيـرة فراقـي