من كل حرف وكل شهوة صبابه = أستغفر الله وأتعوذ من أبليس
أعوذ باللي آوى عبد وسرابه = لاجي نهار الحشر خلف امرئ القيس
يارب ، يارب الكرم والمهابه = ياللي لك أعلام الأوادم مناكيس
جرّدني من النابيه والسبابه = ولبّسني من دروع هديك متاريس
تعبت من ممسك القلم والكتابة = والشعر ، وفتن النساء والأباليس
والمدح في عزوه وشيخ وقرابه = والاء.. لدعوات الراضين واللّيس
والحب ، وماحوله ، وماله ،وهابه = والدمع لاهبّت علي النسانيس
والشوق وغفال العقل وإنغلابه = والليل وخطط الدّها..والجواسيس
والشهرة وحكي العرب واللبابه = وزملوق شفًّ ماتعسه عواسيس
وحصر اسمي فشاعر فساحة غرابه = شعارها فيهم رخوم وملاحيس
وانا لعطَاش الأوادم سحابه = ومن خلقتي ماقد وطيت الدنافيس
تاكي على إرث الأسم بالنيابه = وأقطف خلاصة ما أغرسوه الغواريس
أحسب أني فايزٍ بالرضا والذرابه = وأثري مثل من يحصر النور في كيس
أقفي من الله والأمل والرضا به = وأروح أدور من ورى' إبليس أحاسيس
أسهر على فن الكًلّمْ والخطابه = وأصبح ولين أللي جمعته حماليس
قلبي لعزَاف الأوادم ربابه = وراسي لخطوات الشطانه دواعيس
تقودني نفسي ولا أشعر ولا آبه = مالت عليها عاصيات الهواجيس
من عنده أن كل الشعور يتشابه = روس مع أللي في الدحادر مراويس
الأثم ما حاكه في خفوق وخفا به = والخير ما شاعته روس النواميس
كم شي صار وصار مايندرابه = وكم نومةٍ ما كدرتها كوابيس
ترى ما أحدٍ له في رقبتي طلابه = بس الصراحه من شمَ الفواعيس
والرجل إذا ما يعتبر في شبابه = يعيب قبل يشيب ويشيب ويخيس
ياراجي أرجى' أللي ما ينصك بابه = لاترجي الوهبات من هيس أبن هيس
أستغفر الله وتتقى' عذابه = أللي فرقني عن حياة المتاعيس
من قبل لا أعرف الهدى' وعنابه = أنا وهمي والحزن Facs to Facs
والحين لله.. الفضل والإنابه = متعافي ..ويمشي على زندي التيس
هادي ..شوشني طزيز الذبابه = لا عد الأيام الغبيه ولا أقيس
شريت عقلي في سؤال وإجابه = أنا أعبد الله.. ولا أعبّدْ الوساويس؟
لذة خفوقي وأنجلاية ضبابه = سجدات ليلٍ ظالمينه مناعيس
فـ أجواء مكة والحرم والرحابه = لا يابعد روما ولندن وباريس
هذي ديار المصطفى والصحابه = وهذيك دار أبليس وعويل أبليس