أول استبـداي باسمـك ياحـنـون = ياكريـم مـا تخالـفـه الظـنـون
امرك المحفوظ فـي كـاف ونـون = وانت لي فـي كـل مغـواة دليـل
هيج اشواقي حمـام فـي الغصـون = بات ساجع فـي بديعـات اللحـون
بيـن تغريـد وترجيـع يـهـون = مادرى اني في الهوى مثلـه عليـل
ياحمـام الـدوح هيجـت الغـرام = ما سبب نوحك ومالك مـن مـرام
اعطني عهدك وخـذ منـي ذمـام = بيعني شوقك وخـذ شوقـي بديـل
ان فـي قلبـي جـروح ماتطيـب = مابـدت حتـى يداويهـا طبـيـب
من هواجس جات من فرق الحبيـب = باح مكنونـي وصبـري مستحيـل
كلمـا هـب الصبـا قلبـي صبـا = من غزال في الحمـا فـاق الظبـا
ظبي جازي يرتعـي نبـت الربـا = يسلب العشـاق بالطـرف الكحيـل
مـال عنـي بالتجافـي والصـدود = مابقي غيـر الحسايـف والوجـود
كم رعيـت النجـم والعالـم رقـود = والمحاجر دمعهـا الصافـي يسيـل
زارني طيفه كمـا طيـف النسيـم = جـدد الاشـواق والعهـد القـديـم
وانثنى فـي داجـي الليـل البهيـم = قلت زدنـي قـال يكفيـك القليـل
آه مـن هـم شـوى قلبـي بنـار = وان طلبـت الصبرماالقالـه قـرار
كيـف ابـا صبروالحشـا للهم دار = صار مالكني وانـا عنـده نزيـل
قمت ممـا حسنـي عنـد الهجـوع = يـوم كـل نـام ولعـت الشمـوع
والهواجس جاتني تمشـي جمـوع = مثل ورد النحل فـي وادي طفيـل
أو كما سيل تسايـل مـن مضيـق = يقلـع الحيطـان والسـد الوثـيـق
يأخـذ الاشجـار ويسـد الطريـق = زاد عن حده وضاق بـه المسيـل
طار نومي يوم نامـت كـل عيـن = بت ساهـر مـع نجـوم الفرقديـن
من هواجس من جفا من جور ديـن = ما بقا الا البعـد عنهـا والرحيـل
صوب ارض الشام أو ارض العراق = عـل يـوم فيـه ينحـل الـوثـاق
كم نقاسـي والقسـا مـر المـذاق = ربما نلقـى عـن المنـزل بديـل
دع بـلاد الـذل وارحـل يالبيـب = واغتـرب فالكـل بالدنيـا غريـب
القضا مكتـوب والداعـي نصيـب = اركب الاخطـار والهـول المهيـل
وان جفتك الدار أو مـال الزمـان = لاتعيـش بــدار ذل أو هــوان
لـو يظلـي نبتهـا مـن زعفـران = صاحب الاخطـار واجعلهـا دليـل
شد عن ارض الاعـادي والحسـود = واطلـب العليـا وبالـغ بالجهـود
لو يكون العز فـي غـاب الاسـود = خير مـن دار تعيـش ابهـا ذليـل
كـل مـن رام العـلا يرقـى لهـا = سلـم الاخطـار فــي اهوالـهـا
مـن تراخـى عزمتـه مانالـهـا = دونهـا يقصـر البـاع الطـويـل
اقطع البيـدا علـى عـوج النضـا = لو يكن تمشي على جمـر الغضـا
مـا يفـوت العمـر قـدام القضـا = دين عنـدك ليـن ياتيـك العميـل
عاشر الاحرار مـن اهـل الرتـب = تستفيـد العـقـل منـهـم والادب
حيث هم اهـل المـروة والنسـب = واترك الانذال مـا منهـم حصيـل
سل عـن الجيـران قـدام النـزول = وان سمعت الناس تهـرج لاتقـول
تكتسـي ثـوب المعـزة والقبـول = والخلايـق يذكرونـك بالجمـيـل
كم كـلام راح فـي نقلـه نفـوس = وانت ماتاخـذ علـى نقلـه فلـوس
لاتفتـش كـل حـب فيـه سـوس = كم تخوض الناس في قـال وقيـل
صون عرضك من ملاغات السفيـه = واترك الكذبـان سـودان الوجيـه
من حكى عنهم يعـود الكـذب فيـه = كيف تاخذ هرج مـن بايـر هبيـل
اترك البيت الردي وانص الرجـال = خذ عريب البيت مـن عـم وخـال
يوم تنظـر فـي ولدهـا كالهـلال = وان مشى بالدرب ما يغوى الدليـل
خذ عزيز البز من زيـن القمـاش = والردي لو كان يعطونـك بـلاش
ما يفيدك كيف تاخـذ شـي مـاش = بيعـة المغبـون منهـا يستقـيـل
دور الطيـب لـو وغـال الثمـن = لو يكون القصد في صنعـا اليمـن
لا تغرك صقلـة الوجـه الحسـن = ابـذل المجهـود بالمـال الجزيـل
الذهـب مـا يخلطونـه بالنحـاس = غير بعض الناس ما عنـده قيـاس
خذ نصايح ما حواهـا بـو نـواس = مثل نظم الـدر واللولـو الأصيـل
وان ملكت المال لاتغـدي شحـوح = اطعم الجيعـان واكسـي كـل روح
الدبـش والمـال لابـده يــروح = والثنا والمجـد جيـل بعـد جيـل
هم روحك واغتنم عصـر الشبـاب = ان لـلأيـام مـيـل وانـقــلاب
ونت فيها تنطـوي طـي الكتـاب = لاتغـرك صحـة العمـر الطويـل
اترك الدنيا ليـا جاتـك ضحـوك = لا تغـرك بالملاعـب والشكـوك
كم غرر فيها وكـم غـرت ملـوك = ضحكها غرار ما اسرع مـا تميـل
والعدو لا تأمنـه لـو بعـد حيـن = لو حلف بالبيـت والركـن اليميـن
الحقد والبغـض فـي قلبـه دفيـن = وان ضحك بالوجه قلبه لـك غليـل
خـل عنـك الكبـر فالله الكبـيـر = لا تحاقـر عـاجـز والا فقـيـر
واعلـم ان الأمــر لله الخبـيـر = يقصـم الجبـار ويعـز الذلـيـل