|
الاخ الحبيب والبناخي وافي اقسم بالله العظيم انه لم يساورني ادنى شك في قصدك لكن كنت امزح مع ابو تركي وانا كثرت مزحي ذي شكلها تبي تورطني بعدين اقولك حاجة ايوه انا ممكن ازعل واتنرفز من اي شخص تاني لكن ابداً ما ازعل من نور عيوني وسمبوسة قلبي ابو الوفاء الا الزعل صدقيني حادعيلك عاالفطور في الحرم إن شاء الله تقبل تحياتي يالبناخي |
.........
... الله يرحم والديك ويجزيك خير ولولا غلاك والله مااعقب بعد ان رايت علامات التعجب ولكن الغالي يفرض غلاه وعلى فكرة اقتباس:
:D انا وافي ياهوووووه :) الله يسلمك ياارهين العذاب ويوفقك ويتقبل منا ومنك وابو تركي معنا :) |
الاخ الحبيب ابو تركي كل عام وانت بخير تقبل الله صيامك وقيامك ياخي سوو اعلا ن أن الضيف رهين العذاب ابشر والله بسعدك ابشر باللي يحشره حشر لكن اشوف الرجال ناوي الفركه جوده لا يروح تراي ناويه إن كان لي مقدار تكفى عطني فرصة ابيه بكم سؤال على كيف كيفك والظاهر إنه انا اللي خايف مني والا الحسام تحياتي وتقديري اخي الحبيب |
..........
لا إله الا الله من ذكر الله أفلح ... ضيفنا الغالي رهين العذاب وش سالفتك؟؟:confused: وش ها النخاوي ؟ يا ولد من قوة النخا على قلبي وقولة (( تكفا )) طمرت وبغيت ادخل في الشاشة:D يا ولد أقسم بالله ما ملينا من لقائك والربع ما صدقوا خبر يلقونك هنـــا وانت تبي تغادر ؟؟ إيش الكلام هادا يا هووووه ؟ معقوله تسيبنــا يا ابويا :mad: يا حبيبي يد مسكتك والله ما تفكك لين ينتهي وقت الحلقة ونبي نشوف الوقت بدل الضائع وهناك أشواط إضافيه وركلات ترجيح مع الحســــام وفزااااااااااع :p:p هههههههههههههههههههههه اسمع يا حبيبي والله ان نخاك على عيني وراسي بس الربع ينخوني أيضا . وش السواة ؟؟؟ أنت قبلهم بس هم كانوا غايبين والغايب عذره معه . ضيفي الغالي لو ختمنا الحلقة قبل نهايتها بيعلقني الوافي برموشـــــي في أقرب مروحة:o والمثل يقول :- مادون الحلق الا اليدين هههههه وحنـــا بين اثنين رهين ووافي وكلهم عصابة راسي ( شبابه ) فأقول تعوذ من الشيطان والربع اللي انت خايف منهم ازهلهم عندي انــا ما يهمك شي راسك ممسوح بسمن من يمهم ... ضيفنــأ الغالي لدي بعض الأسئلة الأول : هل لرهين العذاب ديوان مطبوع أو ينتظره مشروع طباعه ؟؟؟ الثاني: هل لرهين العذاب مشاركات بقصائد في الصحف أو المجلات ؟ مع التمثيل>>> سؤال امتحان دراسه:D الثالث: موضوع حاولت كتابة قصيدة فيه واستعصت عليك معه القريحة وتركته ؟ وبانتظار الأجوبة وأبشر من يختم الحلقة (( إذا أنت مصر على رأيك )) تحياتي |
اقتباس:
والله ما ادري مشرقة ولا مغربه وبعدين معليش أختي الفاضلة احم احم :o التوقيع أحم أحم اللهم إني صائم ترانا برمضان .... وعلى العموم سعداء بمرورك هنـــــا أختي لاهنتي يا فاضلة تحياتي |
........
وافي هلاوين بك وتشكر يا قرم على دقة ملاحظتك وهذا من نبل خلقك . كذلك أحسبك والله حسيبك... وأشكرك بقوة على التواصل المستمر .. لاهنت تحياتي |
...........
المحمدي فزاع هلا والله وغلا اخلص علينا بالأسئله الرجال مسكناه وتراه يمكن نستخدم معه حق الفيتو حيال أنظمة حلقات ضيف الوئام.. الرجال دبر واسطة;) لكن عجل ولا لا تلومني .. لا تقول ابو تركي ما علمني وعلى العموم سعداء برؤية معرفك على هذه الصفحة .. لاهنت يا القرم تحياتي ،،، |
بسم الله الرحمن الرحيم
ابو تركي السلام عليكم ورحمة الله وبركاته الله يجزاك الجنه انت واللي يقرأ قولو امين اقول ابو تركي امسك الرجال لا يروح وانا اطالب بتمديد حلقات ضيف الوئام إلى اسبوع كامل والله ما شبعنا من رهين السعاده وباقي عندي كم سؤال لكن بالتقصيص المريح اسمع يا رهين العذاب السؤال اللي يطرح نفسه يقووووووووول نازف الجرح ... ورهين العذاب .. ؟؟ اعرفهما وتعرفهما جيداً .. يعني افهم انك مصاب .. وتنزف .. واسير ايضاً فهل سنرى ابو رهف .. خلاف هذه الاسماء المستعاره . تقديراتي ابو الوفاء حسامكو |
الاخ الغالي ابو تركي الله لايجزاك الا بكل خير انت اظنك منسق مع الربع ازريتوا في واستفزعتهم انا راعي الهدلا والله إني ما اعتزي بها الا الى نشبت والله ما يسولفون فيها حرب يقولون اعتزى بالهدلا وانحاش والله إني لادفن ركبتي واستعين علاكم بالله قدها يابو تركي الى..... .................................................. ................................ الله المستعان ج1 : اخي الغالي انا ارى ان قصائدي ماهي الا خرابيط وغير مقتنع بها ولا اخفيك ان الشعر لي عبارة عن تسلية ومعظم قصائدي مفقودة ولا احتفظ بها ومع ذلك هناك بصيص امل إن كان الله عطانا عمر .................................................. ج2: ليست لي اي مشاركات في الصحف ولا المجلات ولم احاول الا مرة واحدة ولم احاول بعدها اقولك السبب ارسلت قصيدة تحت عنوان (رساله الى خادم الحرمين ) وهي عبارة عن قصيدة وطنيه حماسية الى احدى الصحف ولكن فوجئت بالمحرر يرفضها ويقول غير صالحة للنشر( وانا اتحداه واتحدى عشره زيه ) ولكن الظاهر انه خايف من عنوانه وهي قصيدة جميلة واعتز فيها ولكن اخاف اكثر على الاخوان والا اكتبها . .................................................. ............................ ج3: موضوع حاولت اكتب فيه قصيدة واستغلق علي الشعر لما مرض الوالد وادخل العناية المركزة انا ما قدرت اركز وحاولت ولكن والله ما طاوعني القصيد .................................................. ............................ هذا وارجو من الله التوفيق والسداد ياراعي الجملات |
فزاع هلا والله بناصر هلا والله بالغالي الظاهر إنك على اسمك فزاع جاي فزاع لابو تركي حياك الله يابن العم حللت اهلاً ونزلت سهلاً وانا مستعد لاسئلتك وانا راعي الهدلا بس لا تورطنا وتجيب المستخبي تحياتي وتقديري |
هلا والله اسفرت وانورت واستهلت وامطرت لا الدعوى اكيد فيها تنسيق ماهي معقولة تكون صدفه فزاع+ الحسام= نشبه لا دي موامرة مافيهاش كلام لكن حياكم الله القهوة ياعصمان وعقل المصاغير انشهد ان الربع يستاهلون هبت الريح .................................................. .................. بعد عمري الحسام نازف الجرح ورهين العذاب وجهان لعملة واحدة وهما يعبران حقيقةً عن حالتي الراهنة واتمنى من الله ان اغيرهما الى معرف آخر وانا مستعد امام الجميع أن اغيرهما باي اسم تختاره أنت لي تمون والله يابو ابراهيم انا كم حسام عندي |
.......
الله يجمعني بك والقراء في الجنة يا ابو ابراهـــــــيم . ( قل آمين ) علشان نتذاكر أيام الوئام .! يا الله يا كريم يا جواد أسألك لي وللحسام ولأهل الوئام جميعا ووالدينا الجنة والعتق من النار . أبو ابراهيم اقتراحك على راسي من فوق بس انا اشوف ان الأسبوع طويل يصير الشهر ما فيه الا 4 أعضاء ؟؟؟ عموما سنفكر في الموضوع >>>> أخس يا المسؤول :D وتشكر على المرور والتواصل لاهنت يا قرم تحياتي |
راعي الهدلا
ضيفنا الغالي والله لا اتفاق ولا تنسيق ولا تآآآآآآمر ولا شي ،، بس هي جت كذا ... اقتباس ـــــــــــــــــــــــــــــ والله ما يسولفون فيها حرب يقولون اعتزى بالهدلا وانحاش والله إني لادفن ركبتي واستعين علاكم بالله ـــــــــــــــــــــــــــــ ههههههههههههههه كفو والله يا ابو رهف والفين ( ونعم ) وعلى طاري الهدلا ابسألك سؤال وهو الأخير في هذه الحلقة ... بعيدا عن الأسئلة التقليدية وبعيدا عن فلسفة ( ضيف الوئام ) عندي سؤال وأنا متأكد أن 95% من أهل الوئام لن يعرفوا معناه السؤال وش اسم مصرورة ذودكم؟؟ :D معليش السؤال في أمر خاص بس طرّته (الهدلا) تحياتي |
الاخ الغالي ابو تركي اسأل الله العظيم رب العرش الكريم بكل اسم هو له اطلع عليه احداً من خلقه او استأثر به في علم الغيب عنده أن يغفر لي ولك ولكل اخواني اعضاء منتدانا العامر بذكره إن شاء الله ولعامة المسلمين اخي الحبيب (مصرورة الذود ما بذودنا مصروره ادناهن مثل اعلاهن ابشرك ) سير علينا وتلقى من يرحب بك ......عن المدينه شمال بوادي الحمضي وترى عندنا مقناص قريب ولا تنسى تجيب لنا معك السيف طير شلوى استحلفك بالله إن زرت المدينة إن تزورنا وسلم على العتبان برقا على روق....احبابنا وانسابنا واقصرانا |
..........
ههههههههههههههههه رهين قل آآآآآآآآمين الله يبارك لكم في دنياكم وأخراكم ويشرفني زيارتك وزيارة شرواك من الطيبين. ولعل الله ييسر الأمور ونلتقي يا عصابة راسي . أما سالفة الصيد والمقناص فأنا ما عندي مانع نبي ننسق مع السيف عنده شاص جديد ونبي نقول لوسيم ابو حظ زين يقول ان عنده كلب صيد . ايه كلب صيد ( سلوقي ) وانت والقراء بكرامة لا ومواصفات السلوقي هذا غير ،،، سلوقي بماطور عنز :D>>>> أمحق ماطور ومرهّم على انه حصان يعني شي شي شي خيالي بس انت قل للشباب واذا وافقوا ووافقت انت فأنا جاهز ومعي خوي يصلح لكم وهو صديق لوسيم ويقدره وسيم تقدير قوي واسمه ( ابن مجلي ) طباخ نمبر واحد وما يحتاج أي سلاح لصيد أي صيده بمجرد نظرة تجي الصيدة مجاوبه .. هههههه ضيفي الغالي أحبائي أهل الوئام جميع المتابعين والقراء وإلى هنـــا ونصل إلى ختام هذه الحلقة الشيقة من حلقات ( ضيف الوئام ) والتي كان ضيفنا فيها الأخ الغالي العزيز الخلوق الشاعر أبو رهف رهين العذاب وحقيقة لم نمل الحديث معه هنـــا وكان حديثا شيقا كيف لا يكون كذلك ، والضيف بحجم ضيفنا رهين ... لا أملك في ختـــام هذا اللقاء إلا أن أتوجه بالشكر الجزيل لضيفنا على تلبيته لدعوتنا وتفرغه لنــا هنـــــا كما لا يفوتني أن أشكر كل من ساهم في إنجاح هذه الحلقة الطيبة المباركة من المشرفين والمدراء ومن الأعضاء والعضوات الفضلاء الذين في الحقيقة أثروا هذه الحلقة بمتابعتهم واستفسارتهم وتعليقهم ومشاركتهم ،،، وأخيرا أسأل الله التوفيق للجميع وتقبل الله منــــا ومنكم صالح الأعمال في هذا الشهر الفضيل وتقبلوا تحيات معدّ ومقدّم ومخرج ومنفذ هذه الحلقه أخوكم أبو تركي وطابت أوقاتكم بكل خير وإلى لقاء آخر يجمعنا بضيف آخر والســـــــــــلام عليكم ورحمة الله وبركاته ،،، |
............
... الف شكر للاخ ابو تركي لادارته هذا اللقاء وكذلك لحسن التنسيق وكذلك جزيل الشكر لضيف هذه الحلقة الاخ رهين العذاب لقبوله الدعوة وكذلك لرحابة صدره وحتى نلتقي مع ضيف آخر دمتم في رعاية الله وحفظه تحياتي ... |
| الساعة الآن 26 : 07 PM بتوقيت السعودية |
Powered by vBulletin® Copyright ©2000 - 2024, Jelsoft Enterprises Ltd.
new notificatio by 9adq_ala7sas
[ Crystal ® MmS & SmS - 3.7 By L I V R Z ]