هنا بهالسوق في شرق الرياض مقابلك.. وهناك = وقفتي جنبك أمك ما عرفتيني وأنا لحالي
قربت وكن خلق الله تقول أن المولع ذاك =وقربتي كني أشرت بيدي يمك من هبالي
سألتيني ورى شكلك كذا جاوبت من فرقاك =كأنك يوم رحتي ما تركتي غير تمثالي
وأنا لي عمر أحبك .. شوفي اش سوى شهر جفواك =اجل لوّك نسيتي يا مها وش صار في حالي
أمانة كان بك حيل لغلايه من جديد فداك = ثمان سنين مرت.. وأنت لك دنيا.. وأنا مالي
ترى اللحظات في غيابك تطاير في العيون أشواك = تكرهني بمرقاد الليال وتحفي آمالي
ولو ليلة تعال أعلمك عن وقتي بلياك = وشف وشلون أحاول عزل قلبي عن حكي بالي
وأنا أحاول ولكني فشلت وكل ما بنساك = تذكرني الرسايل يوم اقلبها بجوالي
واسج لحارتك يمكني اخلف هقوتي والقاك = ولا القى غير سور الذكريات وحزنه العالي
ظلام وصوت لأوراقٍ تطاير كنها تقراك = وشجر ذاوي شكى كثر الحنين وقلّة الوالي
وأنا اذكر مرت الفرحة هنا واستوطنت لقياك = على عز الصبا والطيش واحلامٍ بلا تالي
كأنك بانتظاري مزهرية "فُلّ" في شباك = وأنا يديني مثل قطر الندى ورموشك ظلالي
على غفلة من طيور الصباح اتنفسك وابداك = وأعلق داخلك قلبي وثوبي وأحذف عقالي
وأولع لي زقارة عافية.. من جمرةٍ بشفاك = وثنايا الثلج غرقانة بخمرة ريقك الحالي
يا ابو عنقٍ حكى دفو الصدر للبرد بمحياك = وغدى ما بينهن مثل الربيع البكر يختالي
وأشوف قلادتك مثل الخزامى نابتة في ذاك = على نهدٍ يشق الثوب كنه فقعة سهالي
وأدلي بك نفس واجذب قراحك وأن تعذر ماك = يصدّر حادي حيام المشاعر دالهٍ سالي
وأدون لك على دفتر طريقي بوح واتهجاك = وأسمعك الكلام اللي نشا مما يوحالي
وأقول أني وأنا جنبك كأني قاعد استناك = وبعد ما رحت أحس انك ركضت وقمت تبرالي
وشف هالحين أحس أن الرياض بكبرها تبغاك = ونفس الوقت ضاقت ما تبيني دامي لحالي

( نايف )

الله عليك يانايف صقر .. عملاق فعلاً