يموت الشجر واقف وظل الشجر ما مات = رياح الدهر تصرخ وهي تجرح جنوبـه
لك الله شجر للموت ما ترخي الهامـات = بقت وقفتك يا رافـع الـراس مهيوبـه
شجوني لها مع وقفتك يا شجـر وقفـات = عيون النظر مع نظرة الفكر مصحوبـه
شموخ الشجر عبره لمن يفهم الشـارات = والإنسان في غفلـه والأيـام محسوبـه
أرد النظر لاشك يـا نظرتـي هيهـات = أبستوعب العبـره بالأشجـار مكتوبـه
وأنا يعتريني ضعف الإنسان و الهقوات = أروم العزايـم يـوم و أيّـام مسلوبـه
أبظهر عن الدنيا مع حامـل النظـرات = و أسافر عن العالم على غايـم دروبـه
و أبرسم على غيمة دروب الهوى بسمات = وأبنثر كـلام الحـب طـرب وطروبـه
و أغنّي بها سامر وأقوّم بها عرضـات = وأبترك ثرى الدنيا لمن كـان مطلوبـه

الحزن في صوتك ازعج ساكنـي = لين صار الكون من حولي حزين
غصب عني حزن صوتك هاجني = لين خلّى عاصي المعنـى يليـن
وامتثل حرف القصيـد وعادنـي = وانسكب حزنك على شعري حنين
شلت انا صوتك وحزنك شالنـي = اكتم الصرخه وينسـاب الأنيـن
طير انا مثلك زمانـي ضامنـي = جرحتني مثلك سيـوف السنيـن
صابك اللي من زمـان صابنـي = في معاليق الحشا جرحـه دفيـن
كلمـا ودعـت هـمّ زارنــي = من عذاب الوجد بيـاح الكنيـن
الفرح عقـب الصداقـه هابنـي = خافت البسمه على وجهي تبيـن
طير ياللي صوت حزنك هاضني = الله اللـي ينتصـر للصابريـن

تساوت عندي الدنيا تسـاوت = وهي يومك قريب(ن) لي تفاوت
حياتي عقب نورك مثل ليل(ن) = جميع نجومه من أدنى تهاوت
ألا يا ناصح(ن) بالطب روحي = تراها لو لقت طب(ن) تـدوات
ولكن من يعوّضنـي بخـل(ن) = معاليق الضماير بـه تـلاوت
أنا وياه مـن عهـد الطفولـه = مثل قلبين في صدر(ن) تخاوت
يجي عقبه فرح و إلاّ حزايـن = تساوت عندي الدّنيا تسـاوت

ياسامرين الليل في بحـر الأشـواق = يا ليتنـي معكـم يلـوح شراعـي
بين القمر والمـوج لمعـه وبـرّاق = والنسمـه العذبـه للغاليـن داعـي
القـرب يالغاليـن للـروح تريـاق = والبعـد ذَبّـاح القلـوب الوجاعـي
لا واعنا اللي باطرف الليل مشتـاق = خلّوه ربعـه مـع سـلام الوداعـي
يسهر مع الذكرى على صفر الأوراق = في صفحة(ن) تشرب دموع اليراعي
بين الرجا والياس وقّف على سـاق = والدرب بقلـوب المواليـف ساعـي

تنشد عن الحال .. حالي كيف ماشفته = وانا احسب انك قبل ذا الوقت تدري به
في خاطري لك كلامٍ مير ماقلته = اجنبك مايحسك لو حياتي به
هم جديد على الاول تحملته =عنك اتحمل كبير الهم وامشي به
رحت اتمثل بطبع لك تعلمته = لاصار لك غالي لياك تشقي به

ياصاحبي هانت عليـك المحبـه = لاوحسايف عقب هاك المواثيـق
جمر الغضا في وسط قلبي تشبه = نارٍ حطبها يابسـات المعاليـق
كـاسٍ مليتـه بالوفـا لاتكبـه = خلّه يبلل بالوصل يابس الريـق
صبّه بقلبي ثـم ملّـه وصبّـه = وان كان ودك غرق القلب تغريق
دام الهوى راسي وراسك يهبـه = خذ سجّةٍ ترى زمانـك توافيـق
ترى حلاة العمر مع من تحبـه = شخص تريد من جميع المخاليق

نادميني كلهـا ساعـه و اغيـب = مابقى غير المـوادع يـا حبيـب
سلّي الخفاق عـن هـمّ الزمـان = و اجلَي مْن العين نزّات السّريـب
طالت ايامي و انا فـوق الشـدّاد = الذلول تسير و الراكـب غريـب
درهمت بي في عجـاج القايلـه = و الثرى من حدرها جاله لهيـب
كل خف(ن) يرسم بدربـي حـذر = لاهل ركب(ن) ما بعد طبّ الشعيب
يفهّم اللي يفهم و يجهـل كثيـر = و المراجل دربها دايـم صعيـب
يا كبر غلطـات جهّـال الحيـاة = ضعيوا بعيدهم واخطوا القريـب
يا بعد فرق الّليـال مـن النهـار = و يا بعد فرق الغرير من اللّبيـب
بعضهم يـزمّ بـه كثـر الهـدوم = وان تحدّث طاح من عين الرقيب
كل رجل(ن) يستـره قـل الكـلام = و اللسـان يجمّلـه و الاّ يعيـب
نادميني..وقتـي الباقـي قصيـر = و الْمِسي بعيونك جروحي تطيـب
فرّغي قلبي و فكري مـن عنـاي = يا شعاع بالعمـر قبـل المغيـب
و مضة(ن) في ليل دهر(ن) ظلوم = تبعث الآمال فـي وقـت عجيـب
السؤال يغيب من قبـل الجـواب = نادميني ..كلها ساعـه و اغيـب

ياعل قلبٍ ماشكا الحب والتاع = تنهار من فوقه محاني ضلوعه
ياما نهيت القلب لاشك ماطاع = ما طاع يدله والليالي تلوعه
اثر المولع دمعته تجرح القاع = والي ذكر مافات هلّت دموعه
يفز قلبي تالي الليل مرتاع = اخاف تبعد عن ربوعي ربوعه
الموت كان العرف عقب البطا ضاع = والمنتحي ياسعود صعبٍ رجوعه
في غير شوف العين مانيب طماع = حقه علي امشي بدرب المطوعه
ابو عيونٍ رمشها سود و وساع = في ذبحها العاشق فتون و بتوعه

غريب ومسافر لحالي =ودروب الايام تعابه
أدور المنزل العالي =أزايم الحمل وارقى به
ما أحب انا المركز التالي =الاول اموت واحيا به
وش عاد لو الثمن غالي =روحي على العز وثابه
ماهمني جمع الاموال =زهاد بالمال واصحابه
من فيصل آعيش بامثالي =أدرس وأدرس من كتابه