منتديات الوئام - لك انت يا كاتب موضوع

السلام عليكم ورحمة الله وبركاته

ارجو من ادارة المنتدى انها تتجاوز عن زلتي في طرح مثل هذا الموضوع

وما ادري يمكن يكون طرح قبل كدا ممن هو اجدر مني وأكفأ مني

وارجو المعذرة والتسامح من اعضاء المنتدى الي حيقروا الموضوع والي بيشاركوا بكتابة مواضيع في المنتدى

حاتكلم بلهجتي العامية المعتادة وهذا شي تاني اتمنى انكم تعدوها لي لكن دا من باب اني اكون بشخصي الي ع الطبيعة وابغى اتكلم زي كأنكم قدامي وجالسين معايا بنشرب قهوة والبنات يفصفصوا

انا باكتب لكم انتم الي بتطرحوا مواضيع

كتير باشوف وباقرأ مواضيع حلوة ومثيرة وتحمل فكرة وبتدعو لشي

لكن انت ايوا انت يااللي بتكتب الموضوع ... انت بتقتل موضوعك وتموته

والسبب ما ادري كتبت الموضوع ورحت نمت والا فين رحت ماني عارف

صحيح انو بيخش الموضوع اعضاء او زائرين ويقروه بس يوم عن يوم نلاقي الموضوع بينزل شوية شوية ويختفي

والسبب هو انت ايوا يا كاتب الموضوع

ماتتفاعل مع موضوعك وما تكمل فكرتك وتختفي من الموضوع

وترجع تطرح موضوع تاني ونسيت موضوعك الاول

على فكرة الاعضاء او الزائرين كتير بيتجاهلوا قراية المواضيع الي مافيها حركة او تفاعل

صحيح هم اساسا كتير من الردود ما بتقري لكن ع الاقل الهدف من موضوعك حيتحقق

لانهم اكيد حيقروا الموضع المكتوب بيدك بغض النظر عن قرايتهم للردود

فينكم الي بتكتبوا مواضيع فينكم عن مواضيعكم ما ترعوها وتتابعوها

حقيقي في مواضيع كتير حلوة حرام يتم تجاهلها وعدم الاهتمام بها

ودايما بالوم كاتب الموضوع

وكمان في شي تاني وسامحوني عليه

كاتب الموضوع لما يجي بيطرح اسئلة ويبغى الجميع يشارك برأيه او ينقل موضوع ويبغى تفاعل الجميع

انت عارف كيف الجميع يشارك معاك

انو انت اول واحد يشارك ويقول رأيه

مو تنقل شي او تطرح اسئلة وانت ما تجاوب عليها ولا تعطي رأيك فيها

سامحوني اني كتبت الشي دا وباتكلم معاكم زي كدا

لا تعتبروه اتهام وتبطلوا تنزلوا مواضيع

لكن والله غيرة على مواضيع اتمنى انها موجودة ودايما فيها متابعة ومشاركة

لا تقولوا تتثبت لاني احس المواضيع الي تتثبت ماحد يرجع يرد عليها بس تبقى للقراءة والاطلاع ودا شي كويس لاساس الموضوع

الي ما يبغى احد يشارك في مواضيعه او يكتبه بس عشان نقراه وما نشارك فيه يكتب فقط للقراءة والرجاء عدم الرد

طبعا دا رأي خاص في مرررررة واعرف انو فيله شوية دفاشة بس منكم السماح مررررة تانية

موضوعي دا مو داك الموضوع الي يستاهل النقاش فيه والا يستاهل ردود عليه بس ما اتحرم من اي رد او اضافة بأي شكل سواء اعتراض ع الي قلته او اضافة ع الي قلته او مشاركة معنوية للي قلته

لكم تحياتي وخالص امتناني للجميع

الحجاج