الليله اللي قلبها . . أسود من الصاج=وصباحها الأقشر . . معقِّد حجاجه
من مغربيتها . . وانا كليّ إحراج=مفقود . .مدري فاقدٍ كل حاجه
ظلمه . . ورى ظلمه . . تغّشّتني أمواج=أخذت فيها . . طيحةٍ وادّراجه
ماقمت منها إلا . . بعد حظي انعاج=وانا اضحك منوّل . . على اهل العواجه
واقف . . واصارع مهجةٍ تخلج إخلاج=ملزوم أغثّ القلب . . واخرب مزاجه
ماعاد لي . . ليله وقمراء وهدّاج=ليله بعدها . . مستحيل انتواجه
(ليلة وداع) . . وظرفها الصعب يحتاج=من يقنع المرضان يترك علاجه
لو شفتني . . كيف انتظرها وانا ساجّ=وجه بدوي صبِّح . . ووخذت نعاجه !
ولاّ . . سجينٍ ينتظر حكم الإفراج=قدّام لايسجن . . محدد زواجه
عينه تجي وتروح مع كل مزلاج=وبين الأمل والياس . . قايم حراجه
صورة . . بما فيها من هموم وإزعاج=يطرب لها قلبي وتزيد ابيتهاجه
والليل روّح . . واختلف وضع الابراج=وكلٍ على ماقيل . . يتبع خراجه
بسبق عليها الصبح قدام ينباج=وقبل يصيح الديك . . فـ اذن الدجاجه
طريقها . . ماحافته رِجل دوّاج=وياويله اللي يقترب من سياجه
بنت الرجال اللي جملهم . . ليا هاج=فعله على الميدان . . غطّى عجاجه
فيهم كرم . . وضيوفهم تقل حِجّاج=والدِين دين الترمذي وابن ماجه
إن جيتهم . . جيّه على طيب منهاج=وإن رحت . . ما عقبّت هرج السماجه
أشوف بالمجلس . . سنا نار وهّاج=مدري من اللي تالي الليل باجه
وجيت . . وقلطت . .وعيني لظلها ماج=وناديتها . . والنفس تِرهج رهاجه
وجتني تختل الأرض . . تدرج تدرّاج=عن شوفها . . تعمى عيون الخواجه
قالت هلا . . قلت الغلا ملي الادراج=صاحبك . . جاء بمذكرات احتجاجه
وشلون صدقتي بنا . . هرج هرّاج=ماقلت لك . . كلٍ يدلّه سراجه
لينّت لك (نجد) بـ حريرٍ وديباج=وشِعري رسمتك نجمةٍ فوق تاجه
واعالجك . . وامرض . . ولا القى لي علاج=وأعاملك . . بالرفق لـ انك زجاجه
وما دام . . بعدي عنك . . لك فلة حجاج=دربك خضر . . والله وساعٍ فجاجه
أقولها . . مالي من الهم مخراج=وأحسّ قلبي . . بين صاجه . . وصاجه
إليا أسألوك أهلك . . عن اسباب الإحراج=قولي لهم وش فيه ؟ . . مافيه حاجه
وإبني لك من الصبر . . قصرٍ من العاج=وهمك . . على الله ضيقته وانفراجه
والليلة اللي قلبها . . اسود من الصاج=ماسدّت المحتاج . . ربع إحتياجه !
ترجمتها قصة . . بتأليف وإخراج=شاعر . . مع الشعار . . هذا نتاجه

الاستاذ القدير التاااج

......

صح الله لسانك وابيات في منتهى الروعه

معاني جميله وقافيه متعبه بصراحه
لها رونق خاص وادلوجيات من نوع اخر

لافظ فوك

كم تمنيت ان هذا البيت من ابياتي
بنت الرجال اللي جملهم لياهاج
......
فعله على الميدان غطى عجاجه


الله الله الله

بصراحه استوقفتني بعض الابيات ونالت اعجابي

الله لا يضرك ياتاجوووه

تقبل احترامي واعجابي

اكيد هالابداع من مصنع التاج ..........مطرز ٍ شكله ومحكم سياجه