في بداية هوانا حـال دونـه عوايـق=وبالنهاية شربنا من نهـر سلسبيلـه
يوم جينا نزوره مـن بعيـد يتهايـق=ما عرفني علامه بعد غيبـه طويلـه
اقبلت ثم صدّ ت حول خمس الدقايـق=واستدارت وقالـت جيّتـي مستحيلـه
قلت يكفي تغلّـي عارفيـن الحقايـق=والتغلّـي نشوفـه للحبايـب وسيلـه
جيت ماحد ٍ دعاني جيت والصدر ضايق=جيت والشوق حاضر بين خل وخليلـه
يوم حبّك دفن له بالضمايـر وثايـق=قمت تامر وتنهى ما لنا فيـك حيلـه
جات عندي وقالت باين اليـوم رايـق=وريحة العطر فاحت يوم جتني تشيلـه
هزّت الراس مرّه ثم تحـوّل طرايـق=وانتثر فوق جسمه مثل وبل المخيلـه
والعيون النواعس كن فيهـا حرايـق=تطفي النار عنها بالرمـوش الظليلـه
فارق الزين عنده عن جميع الخلايـق=فى الحضر والبوادي ما لقينـا مثيلـه
زان جوّي وجوّه واصبح الهرج لايـق=والبجادي تغنّـى بالـف ليلـه وليلـه
هكذا الحظ طبعه بيـن نايـم وفايـق=ليه دايـم نلومـه دام هـذا حصيلـه

صدفه دخلنا وجلسنا بآخـر الصالـه=والناس حولي وكل ٍ راح فـي همّـه
لديت خلفي وشفـت الزيـن بلحالـه=يقوم يجلس وباقي الهـرج مـا تمّـه
هز المشاعـر بنظـرة عيـن قتّالـه=ورموش نامت على الخديـن ملتمّـه
شد انتباهي طريقـة لبـس سلسالـه=وسط البساتين ساكن والنحر ضمّـه
ظليت محتـار فـي مقفـاه واقبالـه=من حرّ مابي بغيت امسك طرف كمّـه
اقول فـي خاطـري ياحـظ جوالـه=يلمس خدوده ومثلـي ناشـف ٍ دمّـه
واقول فـي خاطـري ياحـظ جوالـه=همس الشفايف ترد الصوت من يمّـه
يمشي على الهون ياجعل السعد فالـه=ماشفت مثله بشر فـي ذمتـي ذمّـه
وجدي عليها وجود اللي دفـع مالـه=في سوق الاسهم يموت الربح ما شمّه
يا ناس قولوا لـوافي يفـزع لخالـه=الوضع يحتـاج بكـره ينعقـد قمّـه
نبحث ملفّه وندرس جـدول اعمالـه=لعل بين الورق هاتـف ولـد عمّـه