الغااااالية الجووري

آآآسف على ترويعكم بس كان ودي اغير جو المنتدى

وخااابرتني شوي دمي ثقيل

ومزحي مثله

قلتوا تبون قصيدة ما تكفي القصيدة اللي عطيتكم

خذو هذي كان حياة جدي لامي يغنيها

يوم يرقى النخل

بنجم بشتي زوراريييييييييه

توماااار كوتا دوراريييييييييييه

للاسف ما احفظ منها الا المطلع

جدي كان سريع شوي وما اقدر اجمع

بس ترى معناها يهبل

خذي ترجمتها:

المطر يهطل رويداً رويدا

وأنا اتذكر اهلي وأحبابي

هذا من شعر الخوال اما شعر العمام

فيقول احدهم بعد ان قيل له إن كبرت فلانه فهي لك

فلما كبرت زوجت من رجلٍ آخر يقول:

الزهره اللي في الحشا جذرها حي= راحت سنيني مخلصٍ في رجاها
هم واعدوني يوم يصبح لها في= تصير لي ظلٍ واعيش بذراها
أول يقولون انتظر وأصبر شوي= واليوم قالوا لا تقرب حماها
ياطيف ياهمساات ياليل ياضي= ردوا على عيني قليلٍ هناها
أسهر مع الأشواق مافي يدي شي=ماغير ذكرى عذبتني معاها
حسبي عليهم جددوا فيني الكي= ياحظ من هو في حياته لقاها
ياكايد العبرات فيني تغني= من صار مثلي قصته ما نساااها

هذاااااا اللي احفظ منها واظنها اطول من ذلك

تحياااااااتي للجميع

مساء الفل للكل

واحلى مسا للناس الكويسا

خذوا هالقصه والقصيدة طبعاً من روايااات الوالدة الله يحفظها

تقول الوالده(تراها تسلم عليكم على فكره)

تقول كانوا بني هلال من اشد الناس الذين يقتلهم الحب (بلغوا عن الحب تراه ارهابي)

طبعاً الوالده ما تقول الحب تقول الهوى.المهم انه كان هناك امرأة مات لها ولدان

من الحب فلقد كانا أجمل شباب قبيلتهم وهم اسرة تعرف بالجمال , فلما ولد له ابنها

الثالث واتم رضاعة اخذته واستودعته عند شيخ القبيلة وكان اسمه ابن بدى واستحلفته

أن لايرى بنات بني هلال ولا تراه اعينهن فتكفل لها بذلك فلما أن بلغ الخامسة من عمره

عود ابن بدى الصبي ان يذهب معه مع ابله كل يوم من قبل ان تشرق الشمس الى أن يحل المساء

(الواده تقول يهظل عقب الأخير) وهكذا الى ان بلغ الصبي الحلم فسمعن به بنات بني هلال

واخذن يحاولن جاهدات رؤيته حتى بدى لهن ان يكلمن زوجة ابن بدى في ذلك فذهبن اليها

(الى عجيز السوء حسب رواية ماما) فكان لهن ما اردن حيث طلبت من زوجها ان يترك

الصبي لحاجتها له في البيت وتعهدت له ان لا يرى ولا يُرى , وتعهدت ايضاً الفتيات بأن ينظرن اليه

فقط دون الاقتراب منه وأن يكون ذلك خلسة فوافقن على ذلك وفي صباااح اليوم الموعود حضرن

بنات بني هلال الى المنزل وحاولن ان يفين بوعدهن ولكن جماله باهر (توم كروز)

فلم يستطعن فخرجن اليه وقبلنه(واووووووو) وانصرفن وهن اثنتان فقط, المهم في اليوم التالي.....

الى اللقاء في الحلقة الأخيره

فماذا حل بالفتى؟

وكيف اكتشف عمه خيانة زوجته؟

وما هي قصيدة الفتى؟

وماذا فعل ابن بدى؟

لا تفوتكم الحلقه الأخيره

تحيااااااااااااااااااتي

ابو منذر أنت توحيني

اقول سلمك الله نبي نكمل الحلقه الأخيره ونروح نلحق المباراة

عاد سلمك الله والسامعين أجمعين يوم جاء من النهار الثاني وابن بدى

يشد على ذلوله ويأخذ الغليم معه وينهج يم اباعره ويم لد للغليم واليا ماهو وراه على ذلوله

وهو يرد الذلول ويلقط جرة الغليم لا والله انه معود للبيوت قل انه لقاه وأخذه

واركبه وعود دربه يوم لد النوبه الأخرى واليا الغليم ماش الا مراقع عصيه

وهو يرد ذلوله ويأخذ الغليم لكن هالنوبه اركب الغليم قدامه على الشداد وركب هو على الغارب

ويوم وصلوا اباعرهم قال ابن بدى للغليم اقول ياولدي تبا تروح مع البل والا تقعد

تزين لنا القهوه قال لا بالله ياعم ماني برايح مع البل ابزين القهوه , وراح عمه واخذ

ذلوله مخافة ان الولد يعود للبيوت وجلس الغليم وأخذ له هاك الفهر(الحجره) وقام ينقش

له على صفاه يقول:

وآآآ لف قلبي من ثنينٍ لفوني=لفاف للارواح معهم لفاني
اونس بنوني مثل شوك الفنوني= بين المرامش نون عيني كلاني
يابن بدى لا تقبل العذر دوني= أرني وصيك وارم بي من رماني
بمصقلٍ حده يقض المتوني= غمقٍ صوابه للدوى ما يداني
وان مت في رأس الطويل ادفنوني= حطوا علي مصلفحاتٍ متاني
وآهيلي اليا حيدروا ما يجوني= ياكود بالبعثان وآخر زماني
وإن جو أهيلي سايلوا يوم عني=قولوا فطس ماعنده المودمااااني

ويطق الغليم واليا هو ميت

ثم يجي ابن بدى ويلقى قصيدته ويبكي الين ماخشخش رأسه من البكا

ويعود لربعه ويقول لهم ترانا شادين بكره وابيكم تجون مع الريع الفلاني وخلوا

بنات بني هلال اول المظهور وميعادكم رأس الريع ويعود يم الغليم ويأخذه ويلبسه

مشلحه ويكحله ويخلي وجهه مقابلٍ للشمس على رأس الريع اللي مواعد ربعه فيه

يوم جاء أول المظهور واليا رفيقات الغليم بأوله وهن يتطامرن من ظهور زملهن وكل ما ضمته

وحده والياهو ميت ثم تطق وتموووت عنده وابن بدى يلد على حرمته قال انزلي يابايقة العهد

ويوم دلت رأسه تبي تنزل واليا سيفه معها ويقص رأسها وهو يمسك الغليم ويحفر له قبر

ويحط وحده من البنات فراشٍ له والثانيه يلحفها اياه ويحط حرمته له وسادة ثم يلد على امه

ويقول ولدك يقول :

وإن مت في رأس الطويل ادفنوني...حطوا علي مصلفحاتٍ متاني

والله وانا ابن بدى ماأحط عليه الصفا ..وهذا عذري منك قالت أعذرت وبيض الله وجهك

هااااااااااااااااااااااااااااااااااااااه تبون مثل هالسواااالف

والا ماتبون سيرة الهوى

لأن الهوى غلاااااااااب

عاد عن اذنكم ابروح اشوف المبارااااة

تحيااااااااااااااااااااااااتي

مسااااااااء الخير للجميع

وين النااااااااااااااااااس نايمين

حان الآن موعدكم مع (دعوة المظلوووووم)

الله يكفينا شر دعوة المظلووووووم

وينصفني من اللي ظالمني هو عارف نفسه

مافيه غيره وف وف

بس يجي اقول لكم وش سوى وانتم احكموا ظلمني والا لا

المهم تسلم عليكم الوالدة وتقول صلوا على النبي

..............................


كان من هالسنين الله يسنى العدو شاب قد مسه الفقر في بلده

وأراد أن يذهب ليبحث عن لقمة شريفه تقيه وأخته الوحيدة شر مسألة الناس

فأصرت أخته على مرافقته ولكنه رفض ذلك خوفاً عليها من عناء الطريق

وطلب منها أن تبقى عند أبناء عمه ولكنها رفضت ذلك خوفاً من أن تأخذه الحياااة

فحاول معها ولكنها أصرت فقرر في نفسه أن يسافر خلسة ويتركها ولكنها عرفت

ذلك فكانت تراقبه وهي مستيقضه فإن نام ربطت (ردنها بردنه ...ما ادري كيف اترجم هذي)

فعندما استيقض ذات ليلة أخذ خنجره وقطع (ردنه من ردنها ) وأخذ راحلته

ورحل عنها فأستيقضت في الصباح فلم تجده فأخذت اُثر راحلته واتبعته سيراً

على الأقدام فلما أن حان وقت الظهيرة التفت اخوها الى الخلف فرأى ماعكر عليه مزاجه

نعم رأها تهيم على وجهها خلفة تأخذها خطاها اليه زادها حبه وراحلتها اخوته فعاد ادراجه اليها

وحملها معه وأكمل رحلته الى حيث المجهول ....حتى نزل بمدينة يحكمها رجل اسمه جبري

فأنضم الى خدامه فلمس منه الإخلاص والوفاء فجعله من حراسه ثم كبر في نظره فعينه

رئيساً للحرس, فأغضب هذا حراسه وأخذوا يكيدون له ولكن بماذا يتهمونه بإخلاصه

فذلك يعرفه الأمير منه , بصدقه , بكرمه, بشجاعته , كل ذلك عُرف عنه .

إذا ماذا يفعلون ؟ ليس أمامهم الى شرفه !!!!!!

فذهبوا الى عجوز في المدينه (عجيز السوء) وطلبوا منها أن تحضر قلادة أخته

فقالت لهم ولكم ذلك.

فلما جاء من اليوم الثاني ذهبت هذه العجوز الى الفتاه وتوسلت اليها أن تعيرها قلادتها

بحجة أن تضعها على بقرة لها تعسرت ولادتها وقالوا لها لا تلد الا إن وضعتي عليها

قلادة أجمل بنات المدينة فوافقت تلك المسكينه.

فلما أن حل الصباح أخذ افراد الحراس يتبادلون القلادة بينهم أمام الأمير فقال لهم ماهذه

فقال قلادة أخت فلان كان فلان عندها ليلة البارحه فقال ايعقل هذا؟ فلانه!!!!!

قالوا نعم اصلح الله الأمير فهي معروفة في المدينه . فأخذ منه الغضب مأخذه وأستدعى

أخاها فكان الخبر على اذنه كالصاعقه وحاول الإعتذار ولكن الامير لم يمهله وأمره أن

يغادر وأخته فوراً دون تأخير, فرجع الفتى الى أخته ممتشقاً سيفه لايرى أمام عينيه

الى رأسها وقد فارق جسدها...فلما وصل الى بيته هم بقتلها ولكنها استحلفته بالله أن لايفعل

وقالت له ما كان من أمر القلاده فقال وكيف اًصدقك وإن فعلت فهل سيصدقني الناس

فقالت له ذلك علي أنا ولكن اذهب للأمير وأطلبه مهلة ثلاثة ايام ففعل ووافق له الأمير

فلما أن عاد وجدها قد جمعت ذهبها وقالت له أريد منك أن تأتي بالصائغ فلان أريده هنا

فأحضر الصائغ وطلبت منه أن يصنع لها فردة حذاء واحدة من ذلك الذهب فقال لها لماذا؟

فقالت له اصنعها وهي لك بعد أن انهي حاجة في نفسي ففعل ما قالت فلما أحضرها رمت بها

الى أخيها وقالت له اذهب للامير وقل له إن من سرق قلادتي سرق معها فردة حذائي الأخرى

وأطالب بردها فكيف نسرق ونحن في حماه ؟ ففعل ما قالت فأغضب ذلك الأمير وجمع حراسه

وقال لهم من سرق فردة الحذاء الأخرى فليردها والا قطعت ايديكم .

فلم يجدوا الى أن يعترفوا بما فعلوا وأن ذلك كان لغيرتهم من أخيها فأعتذر الأمير للرجل

ووهبه مئة ناقة وطالبه بالبقاء معه وعدم الرحيل فقال استشير في ذلك أختي فذهب اليها

فقالت وما ترى أنت ؟ قال نبقى فما كان منها الى أن قالت هذه الأبيات:

قم لا رعاك الله بعينٍ حقوقه=قوم ارتحل عن دار غاقٍ وغرناق
دارٍ بها الحاكم كثيره طقوقه= نبا نبيع ادياره اليوم بفراق
تلقى العذارى خشعٍ في طروقه=يشدى بياض خدودهن بيض الأوراق
يا الله عطهم مزنةٍ من حقوقه=متردمٍ يالله طاقٍ ورى طاق
قبلي تقهقرها وشرقي تسوقه= لاما تهد جدارهم هو والأسواق

فرحل الفتى واخته من تلك المدينه فلما أن جُن الليل

استجاااب الله دعوتها فارسل عليهم سحابةً لم تبقي

الا ديارهم أثر بعد عين, (تقول الوالدة لازالت تعرف بدار جبري)

واللي منك يعرف مكانها والا بقية القصيدة يكمل

والى اللقاء مع سواااااالف امكم ولا تنسونها من صالح دعواتكم

تحيااااااااااااااااااااااتي للجميع

الجووري لا تكونين امي وانا ما ادري!!!!!

والا آخذه رقم جوالها من هون والا هون

والا معك على المسنجر

أعترفي احسن لك...

قصة رائعة يكفي أنها من أختيارك

وتقول الوالدة أنه بعد سنين طويله تجمعت قبيلة زيد وقاتليه

على هالقليب وصار بينهم نسب وصداقه وأهل زيد لا يعلمون أنهم

من قتل ابنهم .

وحدث أن حضر رجل غريب يريد أن يملأ قربته من تلك البئر

فرفض القوم قائلين لا تشرب حتى ترد ابلنا فحاول بهم لكنهم رفضوا

وكان هذا الغريب يرتاد هذه البئر ووجد ماكتبت تلك الفتاة على صخرة جوار البئر

فأخفاها لأنه لايريد اثارة المشاكل فلما اغضبه القوم قال لهم خلوا بيني وبين الماء

وإلا جعلت السيوف تقطع رقابكم قالوا سيوف من قال سيوفكم فسخروا منه

فكشف لهم عن الصخرة وقرأ عليهم قصيدة الفتاه فاقتتل القوم بينهم .

وأعتقد أن قاتل زيد كان يقال له عامر والشاهد قولها:

يامدورٍ زيدٍ ترى زيد عندنا...طريح لعامر في هوى كل غانية

تحياااااااتي أتغدى وأرجع لكم

تفضلوا ياجماعة مايصير

احبتي مسااااااااء الخير

تأخرنا عليكم شوي بقصة عبدالرحيم المطوع فأعذرونا

حدثتني امي عن والدها مرفوعاً الى جدنا الأعلى رضي الله عنه قالت:

كان هناك رجلا من بني تميم يقال له عبد الرحيم المطوع اراد الزواج من فتاة احبها
فرفض ابناء عمومته ذلك لأن والدها(صانع) فأصر عليهم وعلموا أنه متزوجها لا محالة فوعدوه خيراً ولكنهم اضمروا له الشر وعندما ارادوا الذهاب للبصرة -وكان اهل القصيم يتجهون الى البصرة لشراء التمور - اقول عندما ارادوا الذهاب للبصره أصروا عليه أن يسافر معهم فلما نزلوا في الدهناء علم من تصرفات القوم أنهم قاتلوه لا محالة وكانو قد صادوا ضبية فأخذ من دمها في قدح معه وقال لهم سأذهب لقضاء حاجتي فخلع ثوبه وكتب بدم الضبية عليه هذه الرائعة:

يقول التميمي الذي شب مترف=مدى العمر ماشاء في زمانه جاه
ياركب ياللي من عصير تقللوا=من نجد للريف المريف مداه
تحدروا من جو عفل وقوضوا=على كل هباع اليدين خطاه
فلما حووا الدهناءوالنسان ماله=ملاذٍ وما يكتب عليه وطاه
لقوا ضبية في زربها مستكنه=حماها من وهج السموم ذراه
غشاها لذيذ النوم والنوم قد غشا=من القوم حذرٍ وابتلوه عداه
ياشمل يامامونة الهجن هوذلي=الى دار من صعبٍ علي لقاه
دقاقٍ مجال الطوق ياناق وإن طرا=على البال زاده من عناه بلاه
لعل قصرٍ حال بيني وبينه=بنجمٍ من المولى يهد بناه
دع ذا وسل والي السماء في محنتمٍ=سرى تشعل الظلماء رواق سناه
لكن براي الله يومٍ تطلقت=عزالية واخفى بالسحاب رداه
حواركٍ تبين بالزعازيع زجها=من الريح زعاجٍ يزج سفاه
وطى ماوطى واللي مابعد وطى وطى=وغطى مانطا واللي وطاه غطاه
ونحا مانحا واللي مابعد نحا نحا=ومحا ما محا واللي نحاه محاه
من باعنا بالهجر بعناه بالنيا=ومن جذ حبلي ماوصلت رشاه
الأقفى جزى الأقفىولاخير في فتىً=يريد هوى اللي مايريد هواه
الى صار مايجفاك بالناس عالم=ولا خيرٍ ترجي النفوع وراه
ولامن محاملها ولامن ثقالها=فلك عن اراذيل الرجال غناه
خليلي خلا قلبي من الولف غيره=عفت الاخلاء والخدون حذاه
خليلي لو جاء البحر بيني وبينه=رميت روحي فوق لجة ماه
خليلي لو ياطا على جمرة الغضى=وطيت ماياطا وكنت حذاه
خليلي لو ياطا على قبر ميت=تكلم راعي القبر حين وطاه
خليلي معسول الثنيات فاتني=كمافات لقاي الدلي رشاه
عضيت روس اناملي في نواجذي=وقلت آه من حر المصيبه آه
ولو إن قولة آه تبري لعلتي=كثرت في الظلماء لقولة آه

هذا وتقبلوا تحياااتي ودعوات امكم لكم

ومن صعب عليه شئ من القصيدة فليسأل

تكفين يا طيور الحرار افزعيلي= أبي عن ديــــار الأهل منك الأخبــار
تكفين حومي فوقهم وارجــعيلي= وإلا إن حصل لك حومة داخل الدار
تكفين حول ابيوتــــــهم دوري لي= سبعة فروخ يـوم أخــليهم صغار
شوفي ضناي وعودي وانكفي لي= وشلونهم ياعلهم صــــــاروا كبار
نسوا دفاي ونومهم في شلـــــيلي= وش علمهم ياعلهم طول الأعمار
قولي لهم إن إمـــكم له عويــــــلي= خمسة سنين دمعـــها دوم مدرار
وقولي لهم إني علـــــى طول ليلي= أنوح ولــــيا قرب الصبح أنهار
وقولي عـــــيونه دايم له همــــيلي= تبكي ليا شافت من الناس زوار
كل يوم أقول غدي حديهم يجي لي= راحـــت سنيني مابهم واحد زار
وأنا اللي من سبــة سوات الحليلي =حالـــــي تردت كل ماله وتنـــهار
وفرقى ضناي اللي تردت بحــــيلي= كني على شوفتهم اصلى على نار
ياويلي كان الله عــــــجل رحــــيلي= وأنا لي ســـنين أبي لوهي أخبار
ياعــــونة الله من يبي يرتكـــي لي= جارت علي بأمر الولي كل الأقدار
تنكروا من يدخــــلون الدخــــــيلي =واللي بوسط ديارهم يامن الجـــار
قولي لهم ياطــيور قلبي علـــــيلي= الله يكافي قلوبهم صــارت أحجار
وأنا اللي لبراق الخيال استـــخيلي= وأقول ياعـــــــل (.......) للأمطار
تكفين وسط ديارهم صـوتي لي= شوفي عسى لاسمي مع الناس تذكار
وقولي لمن نسيانهم يستـــــحيلي =يااللي نــسيتوها ترى الوقــت دوار
ياهيه ياللي بالسما لك هديلـــي= ردي خـــــــبر تكفين يكفيني أمرار
شوفي أكا اللي نومهم في شليلي= من يذن المغرب الى وقــــت الأسحار
شوفي أكا اللي ماهتني في مقيلي= إلا بمقيل معــــــــــهم كبار وصغار
وقولي لهم إن كان حـــملي ثقيلي= مره يجــون وعقبها شي ماصار
وأنا يـــــــتولا ني كريم جلــــــيلي= ياعلــــني في جنته وسط الأبرار

طلعت روحي قد ما احاول ارضيك = والقلب حاول فيك قدر استطاه
والعين باغلى دمع راحت تناديك = وتشكيك شكوى ميتين المجاعه
حاولت احذر فيك حاولت انهيك = زحاولت اغير فيهواك وطباعه
نسيت يوم اني بعيني اقديك = من وحشة الليل البهيم وسباعه
ونسيت من كانت في غيبتك تبكيك = وتدور لغيبتك عذر وشفاعه
ونسيت ياخاين هوايه مباديك = وكنت تحسب ان الغدر عندك شجاعه
والله لو ادري اني هذي مواريك = وانك نويت تخون اثمن وداعه
ماكنت صدقتك ولاجبت طاريك = يا واحدٍ فرق في شملي وباعه
اخذت مني مايهمك ويكفيك = اخذت كلي صدق ماهو اشاعه
احساس جبته لك على قلب يغليك = ماقد بخل به عنك لو ربع ساعه
ومن كثر ماني بين هذي وهذيك = من ظلم غيرك والجفا والقطاعه
ماعاد تفرق لو تجي صدمتي فيك = صدمات عمري زودتني مناعه
ماعاد تفرق لو تجي صدمتي فيك = صدمات عمري زودتني مناعه

.





.

ياللي زرعتي وسط قلبي محبتك = اصبحت مملوك ٍ لحب ٍ زرعتيه
اصبحت اسيرك ممتلي من غلاوتك = الله يكون بعون قلب ٍ سحرتيه
مسحور في مشيتك وايضا ابتسامتك = وكل الجمال اللي من الله خذيتيه
زينك من اقدامك اليا حد هامتك = اغلى وسام من الحلاوه لبستيه
كل الاماني عندي احظى بشوفتك = ياللي بكل المال والحال نفديه
روفي بقلب ٍ يشكتي حر لوعتك = لا تعذبينه فيه ماهوب كافيه
لايمكن انه يغتني عن محبتك = لجلك رضى بالحب مره وحاليه
اخذيه من نارك وحطيه جنتك = جنتك بالدنيا ترى كل امانيه
سعادتي ماتنفصل عن سعادتك = وقربك ترى من بدت الناس شاريه
اشقيتني وانا تمنيت راحتك = جسمي نحل بالله حني وروفيه
من شافني يقول وش صاب صحتك = حالك برى هل فيه شيٍ تعنايه
واقول له مافيني الا سلامتك = واللي بقلبي من سبايبك مخفيه
والله ما ادري وش بتطلع نهايتك = في حبك اللي بهذلتني مباديه
لكن مهما كان راضي بقسمتك = لوكان قلبي بالمهالك رميتيه

المشاركة الأصلية كتبت بواسطة الســــيف بعدين سديم ناويه تنكبيني مره ثانيه اوريك :)

يا ربي .. دايم حاطيني بوجه المدفع ..
كلاّ انا السبب انا السبب





اشقيتنـي وانـا تمنيـت راحتـك
.. .. .. .. .. جسمي نحـل بالله حنـي وروفيـه

من شافني يقول وش صاب صحتك
.. .. .. .. .. حالك برى هل فيـه شـيٍ تعنايـه

واقول لـه مافينـي الا سلامتـك
.. .. .. .. .. واللي بقلبي مـن سبايبـك مخفيـه

والله ما ادري وش بتطلـع نهايتـك
.. .. .. .. .. في حبك اللـي بهذلتنـي مباديـه

لكن مهما كـان راضـي بقسمتـك
.. .. .. .. .. لوكـان قلبـي بالمهالـك رميتيـه


صح لسانك .. ابو منذر ..

.



.




هذا الهلاك والله ..


جيتك مسيّر لي طلب .. وانت قل : جاك
.. .. .. .. .. .... .. .. .. قلبي بعد هاليوم تخلي سبيله

مساعد الرشيدي ..



:vb_gedo2:



:vb_gedo2:




.





.

((( ما درينا )))

خالد جمعان بلخير

في ليلة انتهينا

بعد ما قلنا ابتدينا

وفي ليلة افترقنا

بعد ما كنا التقينا

ما درينا إن القدر حاكم علينا

بالفراق وجمر الفراق

يكون لقا العشاق

في ليلة من عمرنا

في ليلة مكتوب لنا

نحيا الهوى وحظنا

في عمر الزمان ليلة

**********

كان السهر وليل السهر

يضمنا وحنون

حتى القمر ووجه القمر

من عشقنا مفتون

ما درينا إن المشاعر

في لقانا تحتضر

ولا درينا إن الأماني

لابُد ليها تنتظر

في ليلة من عمرنا

في ليلة مكتوب لنا

نحيا الهوى وحظنا

في عمر الزمان ليلة

**********

اتفقنا نكتم سوى

في صدرنا الأسرار

مهما قالوا ولا زادوا

في حبنا الأخبار

ما درينا إن القدر

حاكم علينا

نلتقي وبعدها يكون الرحيل

ننتهي ونشكي

من الجرح الطويل

في ليلة من عمرنا

في ليلة مكتوب لنا

نحيا الهوى وحظنا

في عمر الزمان ليلة