دق جوالـي وأحـس القلـب يومـه دق دق=صفر خمسة أربعة وآخره خمسـة سبعتيـن
قلت في بالي وش الطاري عسى المحبوب رق=من ثمان شهور مايسأل عسى الطاري حنيـن
المهـم إنـي ذكـرت الله وقلـت الله حــق=وأضغط الزر المحدد سم عفـواً أنـت ميـن
قلتها وأنا أعرفه ميـر الثقـل حـل وسبـق=قال أنا اللي متصل وأرجـوك زينهـا تزيـن
قلت يعني؟؟ قال يعني شوفنـي ميـت زهـق=ودي أسولف معك من غير جيم وغير سيـن
قلت تامر قال تكفى وإبتـدى كشـف الـورق=وأسمعه دق السبيكر قلـت عونـك يامعيـن
قال وش حالك عساك بخير قلت الخيـر طـق=من عقب فرقاك ياقاسي غـدا حالـي حزيـن
قال قلبك وش علومـه قلـت قلبـي إحتـرق=ماقوى هجرك ولا بعـدك ولاطـول السنيـن
قال وش حال العرب قلت لـه كومـة فشـق=مالهـم لاحيـلٍ ولاقـوة ولاهـم شاكـريـن
قال شعرك قلت شعـري لاأبـد طـب وتنـق=كل خفاقي قصايد مـن يسـار ومـن يميـن
قال كبه !!! قلت أكبه قـال والمركـب غـرق=قلت مركب إيش هذا؟؟ قال طحـت بهالكميـن
ماني بصاحبك بس أرجوك من يسبـق لبـق=أنت أسلوبك عسل وأنفاس حكيـك ياسميـن
بالغلط دقيـت وأحمـد ربـي الـرازق رزق=والله أعلم إنك مشبه علـى شخـصٍ ثميـن
قلت لحظة. . .ماهي الدعوة صحن خبز ومرق=إصبر إصبر خلني أعرف مكان اللبس ويـن
وقمت أراجع رقمك الموجود وأشوفـه فـرق=أنت خمسة سبعتيـن وذاك سبعـة خمستيـن