|
موضوع مهم بالنسبه لي..يدخل اللي فاضي وعنده وقت يرد
السلام عليكم ورحمة الله وبركاته..شخباركم...
عندي موضوع اريد اناقشه معاكم... يالله عطو نفسكم اجازه وتعالو هنيه اكتبوا..(انانيه انا).. يالله بسم الله ببدا... كل منا مر بمرحله في حياته ...مرحلة شيخوخه ...(لالا امزح )عقبالكم.... مرحلة طفوله..مراهقه ..شباب.. وكل واحد يفظل مرحله.. وانا احلى مرحله وافظلها عندي هيه ...الطفوله.. وهذا الموضوع اللي اريدكم تتكلمون عنه.. مثلا انا عشت احلى لحظات حياتي في الطفوله ..كنت ما افهم شي بريئه..كانت تصير لي مواقف وايد للحين اذكرها واذكر اني كنت فيهاااا عبيـــــــــطه وعلى نياتي... الحين وانا اكتب ها الموضوع اخوي الصغير يتكلم..اتصدقون ..ماعرف شو يخرف ..مسكين يتكلم من الصبح وانا عقلي مش معاه..لحظه بتفاهم معاه.. هاه اخوي شو تبا؟؟ الاخ الصغير :مابا شي انا سكت ..رجع يتكلم ويقول.. انتي كمبيوترج زين ما خترب..احسن من كمبيوترنا.. ...راح.... .......... اتصدقون اطفال ها الجيل مطورين..وايد بعد مش شوي... جيل الكمبيوتر.. اتخيلو انا في عمر اخوي كنت التلفزيون ماعرفه.. لا صدق ما امزح ..عرفت التلفزيون وعمري 9 سنين.... كان وقتي كله العب في حوشنا... كنت اجلس مع الدجاج...والحق كتاكيتهم...اتخيلو كنت مجرمه اريد الكتاكيت تطير ..تعرفون شو كنت اسوي..كنت امسك الكتكوته وارميها فوق عااااااااااالي..اريدها تطير...مسكينه كانت تصرخ...والمشكله ماتوب ..تطيح تحت وارجع ارميها..ما اروح عنها الا لما القى شي ثاني يشغلني.. اتعرفون بعد من المواقف اللي اضحك على نفسي فيها.. يوم كنا انا واختي واخوي صغار كنا نحفر حفره في وسط الحوش ..ونحفر ونحفر..كنا صغار ...طبعا نحفر ونحفر..لاتفكرونها صارت واااايد غزيره ..كانت لركبي توصل وانا واقفه..انجاز النا كان هذا ....المهم..بعد ما نحفر..كنا نصب فيها ماي ..ونتسبح داخلها ...مسمينها مسبح... لحظه رجع اخوي الصغير... ها اخوي؟؟؟ الاخو الصغير:مافي شي بس اشوف انا:.....افكر اكمل ولا... لكن اخوي حسم الامر وتكلم:...كم واحد فلوبي عندج؟؟..كم؟؟ واحد..كم؟؟ ثلاث... انا :ثلاث الاخو الصغير :حطيلنا واحد في كمبيوترنا....باقيلنا سنينه صح؟؟(سنينه=اثنين) انا:................. الاخو الصغير:وينه واحد هزاك..لعبة الكنغر.. سويلنا جزيه(هذاك...جذيه) انا:...................... الاخو الصغير:صح واحد منهم ضاع..الا باقيلج سنينه صح..هزاك ما ا ... ما ا.. مال اللي سجليتيه عدنا. انا:هيه الاخو الصغير :سجليلنا هاكي ..أو.(يقصد اذا..في قاموسه او معناها اذا)... حلو..انجوف الاشكال سجلي الالعاب عدنا.. انا:ليش ماتلعبون مكان ..احسن من الكمبيوتر الاخو الصغير:بس..واحد يقول مابلعب ..واحد ماعرف شو يسوي. احسن كمبيوتر..(يشتكي) انا:.......خلاص روح ارقد الاخو الصغير:لا ماريد ارقد(راسه يابس بعد) انا:الحين فليل الاخو الصغير:انزين بروح اشوف انا:وين بتروح تشوف؟؟ ........راح وهو ساكت......... اسفين على ها الازعاج وين كنا........ ايوا ... اووووووووووووووه رجع..........ازمه سوالي انا :ها الاخو الصغير:مافي شي مب راقدين(راح الظاهر يستطلع الاجواء) انا:روح ارقد انته الاخوالصغير:انا ماريد ارقد خلهم يرقدون هم اول ..بعدين برقد (ماقلتلكم راسه يابس) انا:تعرف الساعه الحين كم؟ الاخو الصغير:كم؟؟ انا:وحده وربع.. اخوي الثاني جا.................كمــــــــــــــــــــــــــــل ت......... لعب شوي معاه ..بعدين قاله يالله تعال ببند الليتات(اللمبه) .:........................................ ماقلتلكم جيل الكمبيوتر هذا..راسه يابس.. حليلي انا ..يوم كنت صغيره ..كنت انام قبل التسعه.. ....**********....... اتعرفون يوم كنت صغيره بعد كانت الوالده يوم تسويلنا خبز..كانا نسألها شو هذا؟؟ كانت تقولنا هذا يعطيكم طاقه يخليكم اتصيرون سريعين.. تعرفون شو قمنا نسوي:....... قمنا ناكل شوي....انا واخوي...طبعا واحنا صغار ..لاتعلقون... المهم قمنا ناكل شوي..ونروح نسوي سباق ركض من باب المطبخ لباب الصاله..واذا خسرت ..رحت وكلت الخبز العجيب هذا..ظلينا على ها الحاله..كلو شوي..واتسابقو.. في ماقف وايد بعد عندي لكني, طولت عليكم...لكن اوعدكم ..انا راجعه اكمل الموضوع بعد ما تتكلمون عن طفولتكم ... يالله انا انتظركم.. مع تحـــــــــــــــــــــــــــــــــــــــــــ عاشقة البحر ــــــــياتي :) :) :) :) :) |
هلاااااا عاشقة البحر
فرصه الواحد يعبر عن احلى المراحل في حياته ويكتب براحته ويحكي عن ايامها الجميله احلى مراحل عمري يوم كنت ادرس بالثانويه .. ايام لا يمكن انساها ابدا .......... شباب .. عنفوان .. لا مسئوليه .. اصدقاء يجادولون في كل شي ومن مواقف تلك المرحله .. احكي لكم هذه القصه ..... كان عندنا استاذ ( مصري ) جبت له الجنان بكل انواعه ومره وانا في الممر بجوار غرفة المدير .. قلت نكته وضحكوا الزملاء وصادف وقتها مرور استاذنا العزيز المسكين ضن اني باتريق وباضحك الطلبه عليه وقف وصاح باعلى صوته ( والنبي حسقطك في الاختبار ) وشوي شفنا مدير المدرسه خارج من غرفته بسرعه وسال المدرس مين هو هذا .. رد عليه المدرس وقال امير الليالي رد عليه المدير وقال : الا هذا حتى لو ما اختبر نجحوه وخلوه يفارقنا كفانا ما جانا منه .. خلصونا منه باي طريقه اثري انا مجنن المدرسه كلها وماني دراي :) --------------------- واتمنى لو ترجع هذه الايام ... ولكن هيهات --------------------- تحياااااااااتي |
شكرا أمير الليالي
الظاهر محد عنده وقت الكل مشغولين...
المهم ايام الثانويه حلوه ..بس انا ماتعجبني...ماعرف ليش.. انت كنت مجنن المدرسه بمشاغبتك اتخيل انا كنت مجننتنهم بشو.. بهدوئي القاتل اتخيل حتى المدرسات يعلقون علي على خجلي وهدوئي ماعرف والله الناس شو تبي..احترت..بس الله لا يراويك هاي السنه كانت اخر سنه لي وعلى اخر الايام..صرت احاول اشاغب حركت الصف كله ...عاد الناس انصدمت الهاديه هاي صارت جيه (مابنسى كلمة مدرسة العربي يوم غيرت مكاني ورحت ورا)قالت لي(ها سرنا ورا عند الربع الحين واختربنا)عاد صفنا كان ولا اشغب منه انا كانو يضربون فيني الامثال الهم..اخر شي انقلبت وصرت مثل الربع على قولتها:D :D ... ايام ومظت ..ونشتاقلها... ويـــــــــــن البقيه ولا جافوني كاتبه وايد مابشاركون:mad: |
هلاا عاشقة البحر ...
هلااااا أخوي أمير الليالي .... شكرا أختي عاشقة على الفرصة اللي اعطيتيناها ..... عشان نطلع شوي من اللي كاتمه داخل نفسي ... ذكريات و الله جميلة .... و كل المراحل عندي حلوة سواء الطفولة ,, الثانوي أو الجامعة .... كلها فيها ذكريات حلوة .... بس اللي احس أني فاقده الآن بالحيل .... أو مشتاق له جدا .... هم جمعة الأهل و الاخوان و الاخوات في البيت .... شئ ما حسيت بأهميته الا يوم دخلت الجامعة ... و ابتعدت عنهم ... فعلا الشئ ما تعرف قيمته الا عندما تفتقده ... الله... أيام الابتدائي و المتوسط و الثانوي .... ارجع من البيت بعد المدرسة .... القى ابتسامة أمي اللي تفتح النفس .. و سؤاله عني ... و اهتمامها بي ... الله يعطيها الصحة و العافية .. نجلس انا و ابوي و امي و اخواني على سفرة وحدة .... كل واحد منا مهتم جدا بأمر الآخر .... تواصل جدا قوي ... لما يشوفوني متغير يهتمون بأمري و يسألوني .... عندما يصيبني أقل المرض يهتمون فيني ....دائمين السؤال عن أحوالي .... أسعد كثيرا لما أشوف عيال أخواني ....الأطفال ... وش حليلهم .... يهبلون ... و الله فاقدهم ... خلااااااص يكفي .... خمس سنوات في الجامعة .... بعيد عنهم .... رغم أني اروح لهم كل شهر مرة .... بس ما زلت فاقدهم ... الحين تخرجت من الجامعة .... و تمنيت ان يكون تعييني في الرياض عند أهلي .... بس للأسف .... ما لي نصيب .... تعينت في المنطقة الشرقية ... و بديت دوامي من شهر .... و الله يعين ..... كلااااام كثير ودي أقوله .... بس طولت عليكم كثير .... شكرا ... و اعذروني ... |
مرحبا بك ملجلج
صح كلامك ..البعد واللي يسويه..
:( المهم ياليت لو تطول وتكتب كل شي تبي تقوله مواقف وغيره..لانه اسم الموضوع اللي فاضي وعنده وقت يرد...يالله نحنا ننتظر |
شكرا أختي عاشقة البحر ....
ما أدري وشلون كتبت الكلام اللي فوق .... أتمنى لو أني ما كتبت شئ ... ما أدري ليش ... دايما ما أحب أتكلم ... ما أدري ايش صار لي هالمرة .... انسان جدا كتوم ... ما أحد يدري ايش اللي في داخلي ... و ما أحب أعبر عنه حتى لأمي أو أقرب أصدقائي .... ربما تلقيني اضحك و مبسوط وفي داخلي حزين و مقهور ... و برضه انسان هادي ....احب الوحدة و الخلوة لوحدي ... طلعاتي قليلة لما أكون عند أهلي ... ما فيه طبيب نفسي ..... امزح .. :D اختي عاشقة البحر انتي اللي تتحملين المسؤولية ...:rolleyes: انتي اللي قلتي طول في الكلام .... الله يعينكم علي ... داري ما أحد قاريه الا اثنين او ثلاثة .... |
ملجلج
انت ماعليك منهم دام انا اقراه ...
فاكتب اللي تبيه وبعدين انت مسمي كلامك فوق طويل ..دقيقه مامرت وانا اقراه... المهم خذ راحتك وعبر:D :D |
هلاااااا أختي عاشقة البحر ....
شكرا لك على كلامك الحلو اللي سر خاطري ... الحمد لله لقيت انسان يسمعني .... بس ما تلاحظين ... أني انا اللي قاعد أكتب بس .... ما عندك مواقف او ذكريات تكتبينها .... على فكرة كلامي واجد ... و اذا طلعت كل اللي في نفسي .. ما راح يخلص الكلام .... بس راح استمر في الكلام لين ما ألقى رد على الموضوع .. ------- اختي على فكرة ... كل الاخوان الجدد .... و اللي يقولون تتذكرونا ...مثل ( سعود ,,الباحث عن ,, الحجاج ,, و حسن ,, عاشق الورد )... كانوا في منتدى واحد قبل كذا ... اسمه منتدى ملتقى الشبكات ... قبل فترة طويلة .. و كانوا مجتمعين زي الاخوان .... زي حالنا في منتدانا العزيز ... ومعظم المشتركين في هذا المنتدى كانوا في منتدى ملتقى الشبكات ... تحياتي ... |
هلا بك ملجلج
شكرا لانك خبرتني عنهم.........
المهم انا بكره بكمل الموضوع والمواقف لكن للاسف ما القى مشاركات... :( :( شاركوني |
اهلين عاشقه البحر..واعذرينى على التاخير…. فيه اشياء كثيره تغيرت…. فيه فرق كبير بينا وبين جيل ه الايام البركه..فى البلايستيشن.وسبيس تون.. ذكرتينى بايام الطفوله الى ماتنعاد…..الضحك والعب والنط…احلى سنس عمرى….كلها لحد الثانويه ..وانا مرتاحه….وكانت ايامى مافى احلى من كذا… المتوسط والابتداى..والثانوى….المشاغبات..والمقالب..كل شى فيها حلو حتى الخصام….. ام الحين الحمدالله….بس كل يوم ..احس ان اول كان احلى……. ***** |
| الساعة الآن 10 : 11 PM بتوقيت السعودية |
Powered by vBulletin® Copyright ©2000 - 2024, Jelsoft Enterprises Ltd.
new notificatio by 9adq_ala7sas
[ Crystal ® MmS & SmS - 3.7 By L I V R Z ]