.. الموضوع بعنوان نحن و سكان الارض .. فــ رجاء اللي عمره اقل من 18 يقلب وجهه ولا يكمل قراية الموضوع او يوقع على اخلاء طرف

هذي عبارة عن وقائع حقيقية وقعت لي او لواحد من ربعي اخذتها من مصادرها الموثقة و منقولة عن ثقات

-- مرة كنا جالسين في استراحة , تقريبا 12 حبة-راس-نفر .. داخلين في الصالة و نلعب كورة (( ابوك يالصالات المغلقة )) .. ما درينا الا عصفور ينقز علينا من الهنقر و نطمر نصك الدرايش و البيبان و هاتك يا تشويت بالكورة و حجر و تلفيع بالنعال .. و حنا نطرده ما درينا الا باب الصالة ينفتح , مع انه كان مزلوج و مقفول , و درفته الثانية اصلا لها كم سنة ما تنفتح , انفكت المزاليج و القفول و الدرفة اللي ما عمرنا قدرنا نفتحها و هج العصفور المسكين
-- مين فتح الباب ؟؟ سؤال اطرحه لكم ..
حتى الجني - بسم الله علينا و عليكم - قلبه كان ارحم من قلبنا و فك العصفور من شرنا جزاه الله خير

-- في نفس الاستراحة , تونا طالعين من المسبح و عيونّا كلها كلور (( حاطين ربع المسبح موية و الثلاثة ارباع الباقية كلور )) جلسنا برا نتنشف و ناخذ حمام شمس (( منتب عاقل يا شواطئ فلوريدا )) دخل واحد منّا الحمام وانتم بكرامة ياخذ له دش .. قعدنا شوي دخل اخوي يبي يروح للمطبخ و يوم مر من عند باب الحمام اللي فيه خوينا , ما درا الا الباب منفتح بصوت رجفه قوية .. مع انه مقفول و مزلوج .. يقول اخوي ما دريت الا و اشوف ابو حميد (( اللي كان في الحمام )) بالشورت و انا اطلع برا .. حنا يوم شفناه راجع متغير وجهه و وراه محمد يقول من اللي فتح الباب ؟؟؟
اخوي يقول انا يوم مريت عنده انفتح .. كنه افتح يا سمسم .. و محمد يقول .. يمكن اقدر اقول انه انت اللي فاتح علي , لو ان الباب ما كان مقفول و مزلوج
- يبقى السؤال هنا .. من اللي فتح الباب ؟؟
عاد المشكلة محمد مافيه الا عظام .. ويش يبي الجني يوم يفتح الباب عليه ههههههاههها

-- في نفس الاستراحة .. بس هالمرة سالفة صارت لأبو هايف (( من البشكة )) .. يقول مرة ما كان فيه احد .. كل العيال مسافرين , اللي لجدة واللي في مكة واللي في سوريا و اللي في امريكا (( مهوب انا )) .. فــ قررت اني انام في الاستراحة بالحالي و اذا جا الصبح سويت فطوري و رجعت لبيتنا (( رايق )) .. يقول ابوهايف : جبت شريط حسين العلي , طقطقة و سعة صدر و وناسة .. و جبت فروتي و جلست في المشبّ و شغلت الستريو و حطيت راسي و نمت على ظهري (( مسكين .. ما يعرف ينام الا على صوت طار )) .. يقول يوم اخذت لي غطة الا احس اللي هبد برجلينة على صدري " لعنبووووووك " قالها و فز يدور من هاللي وطا في بطنه .. يقول اتلفت اتلفت ما لقيت احد .. و انا اعود احط راسي و ارقد .. احسبني محلم .. مع انها عوّرتني .. و اقعد شوي لين غفت عيني بالنوم ولا يجيني مرة ثانية و يهبد في بطني .. و اقوم اتلوّى شوي و العّنه لين وصلت سابع جدينه و اتلفت شوي ما لقيت احد .. قال مير عنااااد مانيب قايم و ابنام في محلي هذا (( مهوب بكيفه .. ما معه سيارة ترجعه )) يقول و اغمض عيوني كنّي راقد اتحرّى هاللي يتوطى في بطني من اليوم (( بزعمة يبي يسحب الجني على وجهه ) .. ما دريت الا هاللي ينغزني بجنبي و انا افتح عيوني على شوي شوي مابيه يدري اني قايم .. ابشوف وشو هاللي ابلشني من اليوم ما خلاني انام .. و اشوف طرف عصى ينغزني و اطالع نهاية العصى ادور وش ماسكها .. ما لقيت شي العصى تتحرك و تنغزني ولا مسكها شي .. و فيه عصى تشبه لها بالضبط كانت معلقة على الجدار .. و التفت على الجدار و القاها معلقة في محلها .. خذت شوي ثم راح اللي ينغزني .. قلت اكيد انه هجد .. و انا اغمض و اتغطى ما خذت شوي الا ذيك العصى اللي تمحطني و منين ما اونس و تلحيط تلحيط وانا مغير اصايح .. اطلع لي يا ملعون الوالدين انتسان فيك خير .. تعال يالرخمة وينك فيه و اقوم اتخبط و العصى تمحطني و التفت على العصى اللي على الجدار و القاها طايحة .. و الاها نفس العصى اللي كانت تلحطني .. يوم خلص تمحيط .. قلت خلاص ما بقى شي ما بعد سواه .. وانا ارجع و اطفي حسين العلي و ارقد ولا جاني شي الا الصبح
-- سؤال هنا .. مين اللي كان يمحط ابو هايف ؟؟ اكيد ان الجني ما اعجبه شريط حسين العلي

-- هذي سالفة ثانية في مزرعة .. المزرعة بعيدة عن الديرة تقريبا بـ 20 كيلومتر .. يرويها احد الشهود .. يقول كنا حوالي 30 شخص طالعين برضه من المسبح و جالسين برا عند التلفزيون يطالعون فيلم " موش ولا بد " بطولة كريستينا جونز و الحدء يفهم يقول كانوا متحمسين مع الفيلم و انا كنت في المطبخ اقطع بصل للعشا (( ايه افلقني اذا ما صرت انت اللي شايل التلفزيون على يدينك )) و في نص الحماس نقز واحد من هالثلاثين و طفّى الفيديو .. ما أمداه يطفي الفيديو الا و ذيك النعلة اللي تمشي ثلاثة الاف كيلو متر في الثانية و تصكّة على الجبهة و تطيح ورا التلفزيون و يشتغل الفيديو مرة ثانية .. ندور من اللي حلت النعلة ماحد كان حوله نعال .. ندور النعلة المحلوته ما لقينا الا وسمها في جبهة خوينا
--سؤال هنا .. هل يتابعون الجن افلام نص كم ؟ و سؤال اخر يسدح عمره , يقولون ان الوسم اللي لقوه في جبهة الملقوف اللي طفى التلفزيون يرجع الى زبيرية , فهذا يدل على تطور و حضارة الشعب الاخر و وتجاوزهم العصر الزنوباتي و وصولهم الى العصر الزبيرياتي

-- هذي سالفة قديمة مرة .. ايام كنت في سادس ابتدائي .. بس مافيه مانع نقولها .. يرويها واحد من الجماعة و هو ثقة .. يقول كنت ماشي على خط القصيم و مادريت الا ذاك الكلب اللي نقز قدام السيارة .. اخذت عشرين متر الا ذاك الشايب المهذري اللي يأشر على جنب الخط .. عاد الناس على ذيك الايام مهنا خوف ولا هنا شي .. يوقفون و يركبون البشرية على الخطوط .. المهم يقول وقفت و ركبت الشايب و سواليف انا وياه و وناسة و سعة صدر واخذنا فترة نسولف الى ذاك الكلب اللي يشبه الكلب الأول يوم نقز قدام السيارة .. وانا التفت على خويي الشايب ابكمل سالفتنا .. ما لقيت احد لقيت المرتبة مسدوحة للأخير ولا كأن احد كان فيها ...
-- السؤال هو .. ليش نزل الجني من السيارة ؟؟ يمكن ما جاز له الجو ولا ان خوينا ازعجة بالسوالف الله يصلحه ولا ان المكيف كان على الحار .. لكن الأحرى ان شايبنا كان منحاش من وادي الظاهر ان فيه ذيابه .. و الجني دينه و دين شي اسمه ذيب

-- هذي سالفة طازجة مالها اكثر من شهر و نصف الشهر .. شباب طالعين لبر .. و طلع واحد منهم يطير الشراب وانتم بكرامة بالليل .. يقولون العيال حنا جالسين جنب النار ما درينا الا ذاك اللي يصايح و يزاعق " جنّييييييييي جنّي " .. يقول هاني : وانا انقز بسرعة و نقز قدامي اخو الرجال .. و حنا نجي لخوينا و نلقاه شاصب مشصّب ما يتحرك و ثابت في مكانه و يزاعق .. انا شفت الجني من بعيد بس ما دققت , كان كل همي الرجال , و اخوه جا و شافه بس انه ارمش , و اذا ارمش يروح الجني .. يقول و نمسك الرجال اثنينّا و نشيله شيل قطعة وحدة تقول حطبة و نحطة عند النار و نهديه شوي و نصب عليه مويه و يهدى اشوى و عادي .. بس يقول لو تقولون لي اوصف الجني ما قدرت .. هاني يقول شفت عيونه السواد فيها مهوب دائري مثلنا .. مستطيل واقف
عاد الشباب ذيك الليلة واجد اللي ما ناموا من الروعة و واجد اللي وقفت شعورهم من الروعة بعد ..
-السؤال .. الجني ما حبكت معه يروح يطيّر الشراب لين جا خوينا يروح ؟ ولا كان ناوي نية بخوينا بس ان خوينا صار شقردي و روّعه ؟؟

-- موقف على الطاير .. يقولون واحد جالس في استراحته يتقهوى و عنده ثلاثة من ربع نايمين بس مهوم بحوله .. ولا هوب مشغل مسجل ولا دش .. بس ان قلبه اقسى من الحجر .. يقول ما دريت الا هاللي ينغزني من تحت و التفت ودي اشوف من هاللي مطيّح الموانة لهالدرجة وما لقيت حولي احد كل الربع رقود .. و ينغنزني مرة ثانية وانا التفت و فنجالي بيدي " ان كان في راسك خير اطلع لي يبن الكلب " .. و من عقبها ما جاني شي ..
-سؤال بسيط .. حتى الجن عندهم حركات نص كم ؟؟ الحين اقدر اصدق سالفة الفلم اللي فوق

-- هذا واحد يقال له عزيز .. (( مهوب عزيّز ولد ام عزيّز .. لا , عزيز بفتح العين و عفط الزاي و تشويت الياء )) كان على طريق الرياض و معه ربع .. و مشغل المسجل بالليل و رافع الصوت .. ما درى الا هالشايب اللي واقف عند المراية يأشر بيده و يمشي معهم و عيونه مستطيلة .. عزيز تروّع و علقت رجله على ابنص البنزيم و طلع الشريط اللي في المسجل و حط المصحف المرتل و دعس طبلونه لين وصل الرياض .. ولا واحد منهم فتح فمه طول هالمسافة مع انهم قبل لا يأشر لهم الجني يسولفون و يضحكون
- الجني شكله ما كان يأشر لهم .. شكله يقول لهم " من وين شارين هالشريط يا شباب ؟؟ " بس عزيز فهم غلط ههههههاهااا

فاصل اعلاني
=========
شامبو بروجيه .. بشهادة الايزو العالمية ذو اللزوجة المقاومة للحرارة لتعطي محركك عمرا اطول و تزيل البقع و الدهون من الداخل .. مما يعطي بشرتك منظرا اكثر اشراقا و لمعانا .. نحن في فتيحي جدة , نحطم الأسعااااار (( صورة بقس يصفق في الشاشة )) تحطيمااااااااا .
=========

نعود معكم لاستكمال ما تبقى من سوالف حبايبنا الجن

- يقول ابراهيم كنت رايح لمزرعتنا (( نفس المزرعة اللي فيها سالفة الفلم اللي فوق على فكرة )) و نازل من الخط المزفلت ابطلع بر الا هذاك الهندي اللي ياشر لي يبيني اركبه .. انا صراحة خفت على نفسي لا يصير لي شي .. وش هالهندي اللي يأشر في ذيك المنطقة البعيدة عن الديرة الساعة وحدة بالليل .. و مشيت و خليته
اخذت لي شوي على البر و القا نفس الهندي ياشر عند شجرة .. قلت لعنة وشلون وصل قبلي و نا تاركه يأشر على الخط .. خليته و مشيت .. ما دققت قلت يمكن عنده سيكل .. و انا ادخل شعيب قبل المزرعة الا ما دريت ذيك اليد المعلقة بالحالها اللي تأشر يقول هو انا شفتها ولا ما شفتها و عينك ما تشوف الا النور .. و ادعس للسيارة لين دخلت .. لدرجة اني من الروعة نزلت عليهم بزقارتي قدام العالم
-الحين ليش يأشر هالجني دام انه وصل قبل ابراهيم ؟؟ يمكن اعجبه جيب ابراهيم الشنب الصغير ولا يمكن كان يبي زقارة بس ابو خليل اساء فهمه ؟؟؟

-- ادري روعتكم في هالمواقف لكن ابقول اخر واحد ... يقول واحد من الشلة و هو ثقة انشالله .. يقول طلعنا للبر و معنا ماطور كهرب .. يوم جلسنا و نصبنا خيامنا و ضبطنا عفشنا و حنا نحط ماطور الكهرب على جحر نمل و نشغله ما انتبهنا للجحر ..
قعدنا شوي الا يوم طفا الماطور .. و قال لي ابوي رح شغل الماطور
يقول طلعت من الخيمة ابي اشغل الماطور و انا اشغله و ارجع للخيمة .. ما امداني ادخل باب الخيمة الا يوم طفا مرة ثانة.. و انا ارجع و أولعه مرة ثانية .. و انا راجع للخيمة و يطفى الماطور مرة ثانية و انا اتلفت بسرعة و اشوف ذاك السواد اللي نقز و ابعد عن الماطور و طفاه .. رحنا ابعدنا الماطور عن جحر النمل ولا جانا الا العوافي
- معليش يالجني بزعمك قلبك ابيض ولا تبيهم يزعجون النمل .. الحين اكتشفت ان الجن عندهم قلوب بيض عقب سالفة العصفور و النمل ..


نصائح و ارشادات في حال تقابل لك جني :
1- اعلم رحمك الله تعالى ان الجني يخاف منك بس انت اذا خفت منه يستقوي عليك
2- اثبت و روق ولا تعصب ولا تنفعل .. خير يا طير .. واذا عاد صار جني هاللي قبالك .. ما فرقت معك , جمّد قلبك و خلك قوي
3- لا ترمش ثم لا ترمش ثم لا ترمش .. اذا ارمشت خلاص يختفي الجني .. و الأحسن انك تثبته بعيونك ولا ترمش .. عشان يتعب ..
4- اذكر اسم الله و اقرا عليه ايات من ما تحفظ من القرءان اذا ثبتته

يالله فمان الله و كل عام و انتم بخير مرة اخرى و ترا سوالف الجن اكثر من كذا بكثير بس هذا اللي اشوفه اهم و مناسب لجونا هنا .. و الله يحفظنا وياكم بحفظه .. و سلامتكم