انا لابغيت اسلى ذكرت الغدر والجور= اشوفه ولو بالحلم لايمكن انكاره
ما عاد اقدر اتحمّل من الصبر كسر عشور= ولا لي جلوس بمقعد الغبن او داره
ابرحل إلى النسيان لو طفت سبع بحور= فلا تسألي عنّي ولا عنه واخباره
واذا من نشدك الناس عن كوخي المهجور= فقولي لهم هاجر عسى السعد مشواره
ابخفي جـروحي في جناحٍ غدا مكسور= وادوّر بقـايا طفـل في داخلي ناره
اذا من تحـرّك يوهـج القلب كالتنور= اهاديه لا يغضب ويخرج عن اطواره
أسولف واغنّي له واقول الـدمع معذور= مدامك فقـدت اللي يراعيـك بانظاره
صرخ .. وينها راحت فانا عايشٍ مقهور= جسم حيّ لكن تنعي الـروح زوّاره
سنين العمر تاهت على عقـدها المنثور= احـاول اجمّع ما لقيتـه من اثاره
انا لا ذكـرته شـدّني طيفه بْلا شعور= واحـارب جيوشٍ تنوي القلب جرّاره
مابين الحزن والياس واقف كما المأسور= ولا يدري التهمه سوى صكّ اعساره
خسر كل شي لاجلهـا ما أطاع الشور= خسر كل اهله والحلم طاحت احجاره
يحسب الزمن يصفى وثاري الزمن معذور= فحنّـا سبب جزره ومدّه واعصاره
تغيّر نفـوس النّـاس لـو عرّقت بجذور = فلا عاد يفرق بومها اليوم واحراره
ولا عـاد به في الحب شرعٍ ولا دستور = فكلٍ يغنّي عازفٍ أكذب اوتاره
نست حب يجمعنـا بعفّـه على الميسور= نست يوم قالت انت لي الكون وانواره
كـلام كثيرٍ لين مـا اصبحت كالمسحور= تبيعه وانا اشري وادفع العمر لغباره
وترحل وانا مدري وترسل ثلاث سطور= "نصيب ومقـدّر ينتهي الحب واسراره"
حبيبي تعال اليوم واكشف عن المستور = من اللي شرى قلبك وغرّك بدولاره
لتشطب على قلبٍ شويته كما العصفور = بلا ذنب غير انه وطى لاجلك اخطاره
ابرحل لعل انسى واذا غبت سبع شهور = فصلّي على الغايب رحل لاخر اسفاره