هلاوين سوفيو

مشرفنا


ونكمل حديثنا السابق

مثل ماقلت اول ابو محمد ماعنده الا هالولد وثلاث بنات

الكبيره ساره 00عاقلة ورزينه 00تأخر عليها الزواج شوي وهالموضوع مسوي لها قلق نفسي

صديقاتها اللي في سنها اكثرهم تزوجوا باقي وحده لو تزوجت يمكن يجيها شي

اختها أمل انخطبت مرتين وهي ترفض وخوفها يجي يوم وتوافق

اما اختها الوسطى أمل مشكلتها مشكلة 00مدمنة تلفونات وجوالات

0كل وقتها نوم و مكالمات وشوية مذاكرة 00حتى المذاكرة بالتلفونات 0

الصغيرة سمر ماتدري وش الناس فيه 00لو ينحرق البيت ماعليها من أحد 00أهم شي تنفيذ طلباتها

ابو محمد جمع البنات وامهم وخالد طبعا بجانبه وقال لهم :

شوفوا 00اخوكم نوى على الزواج

أمل : وأخيرا محمد 00شلون اقنعتوه ؟

ابو محمد : أمل ؟

أمل : سم ؟

ابو محمد : اذا صرت اتكلم اسكتي لما اخلص كلامي 00الظاهر امك ماعلمتك أدب الحديث

أمل : أنا آسفة يبوي 00بس من فرحتي لما قلت محمد نوى على الزواج

ام محمد : ونت كل ماطق عود حصاة قلت امكم وامكم 00ليه ونت مالك دور في تربيتهم

علمني وش سويت معهم 00طول وقتك يافي الإستراحه مع ربعك ولا في العمل والوقت الباقي لنا نوم

ابو محمد : يوووووووووووه 00حرك تنشب 00خلصنا 00خلوني اقول هالكلمتين اللي

في راسي ولا طلعت وخليت البيت لكم

ام محمد : هذا شغلك كل يوم 00اذا بغيت تطلع دورت لك اي عذر

ساره: ياجماعه تعوذوا من ابليس 00ترى مو وقته 00خلوا ابوي يكمل كلامه

أمل :كمل يبوي

ابو محمد : اللي بغيت اقوله ان اخوكم هداه الله ونوى على الزواج ومحتاج فزعتكم

ام محمد : الله يوفقك ياولدي يامحمد ويرزقك بنت الحلال اللي تسعدك 00شف يامحمد

00وش رايك في بنت خالتك 00بنت راعية مطبخ من تقوم وهي في المطبخ ومافيه

أكلة الا وتعرف لها ماشالله عليها 00خلنا نحجزها لك قبل ماتروح عليك

محمد :يؤ 00 طول يومها في المطبخ ؟ يعني بتزوج طباخه ؟ لا لا افهموني زين

الزواج ماهو طبخ ونفخ الزواج علاقات وترابط وحب 00الزواج حياة جديده

الزواج استقرار وامان وثقة

ام محمد : وبنت اختي وش ناقصها من هالكلام اللي قلته 00كل شي تبيه تلقاه فيها

محمد : القاه فيها ؟ 00قصدك المواصفات 00حشى ماصارت عروس 00ذي سيارة

ابو محمد : خلوه يختار زوجته بنفسه واللي تعجبه نخطبها له وماهو شرط بنت ختك

ام محمد : كنت منتظره منك هالكلام 00غريبه ساكت الين هالوقت 00انا عارفه انك

ماتبيه ياخذ بنت اختي 00اصلا انت ماتبي ربعي وقرايبي 00

طيب وش فيها بنت اختي اذا فيها عيب واحد قل

ابو محمد : يابنت الحلال بنت اختك على العين والراس 00بس اللي بيتزوج ولدك 00

لازم ياخذ اللي تناسبه 00بكرة يرميها على اهلها وتصير مشكله مالها أول ولا آخر

سارة: صدقت يابوي

ام محمد : اجل اسمعوا انا مالي دخل فيكم 00تبون تخطبون له بكيفكم

ابو محمد : يعني اما ناخذ بنت اختك ولا يتسحبين نفسك من الموضوع

شوفي ولدك اذا هو يبيها انا ماعندي مانع 00من بكرة اروح واخطبها له

محمد : لا والله مابيها 00 الله يوفقها ويرزقها الزوج الصالح

بس هالبنت ماهي اللي أطمح تكون شريكة حياتي

ام محمد : عشتو 00مايبيها 00وش شايف نفسك على بنت اختي ؟

رح شف وجهك في المراية قبل تتكلم ؟

محمد : لاحول الله 00انا من اول قايل لكم مابي الزواج الحين ونتو غصبتوني ومابغيت اردكم

سارة: طيب يامحمد في بالك أحد معين

محمد : أحد معين ؟ وش يعني ؟

سارة: قصدي فيه بنت في بالك ؟

محمد : لا والله 00بس بقول لكم مواصفاتي ونتو دوروا على راحتكم

سارة: طيب وش مواصفاتك عشان من اليوم ندور لك

وللحديث بقية مع الحلقة (4)