عسى العلم يسقـي جديـد الهماليـل
من مزنة (ن ) يجرح لماها شيوخـه

ظلع (ن) تنومس في شيوخ الرجاجيل
وأخذ غـلاه وعزتـه مـن شيوخـه

مرقـاب يطـوي للعيـون المقابيـل
ويبعد عن اللي واقبـه كـل دوخـة

ماكر لحر (ن) نادر الوصف والجيل
لاذ بحماه وعـاش وأمـن فروخـه

كم للهبايـب فـي جنوبـه تهاويـل
وعجزت توطي هامته من رسوخـه

من خلقتـه شامـخ بعيـد المناويـل
ولا احد سمع طول الليالي رضوخه

ظلع طويلـن نايفـن يتعـب الحيـل
ضلعن تقل يلبس من العـز جوخـه

اشتقت لـه وانـا بعيـد المواصيـل
واشتقت لأيام الهوى فـي شروخـه

عليـه دمعـي مالقـى لـه منايـل
وعليـه قلبـي هـدم البعـد كوخـه

قلته ولـي معنـى وللنـاس تحليـل
وكـل مجاذبيـه تبـيـن شمـوخـه