هجس القصايد خذا لفّـه وتدويـره = وقّف قوي العزايم واعلن رجوعـه
رجعة محنّك معه عـذره وتبريـره = دروب يمشي بها ودروب ممنوعـه
درب السعه زين لو طالت مشاويره = مهما بلغ طولها سهلـه ومقطوعـه
واللي تعسّر على الرحمن تيسيـره = سبحان من له سجود العبد وركوعه
الله وأكبـر ثمانيـن الـف تكبيـره = على هواجيسي أللي جات مجموعـه
تقلط وارحّب ولا يطـرد مساييـره = الاّ قليل الشيَـم مـن بـدّة ربوعـه
تقبل وتقفـي وتوريـده وتصديـره = سيّه وحسْنَـه ومكتوبـه ومدفوعـه
فما كل سلعـه بتحكمهـا بتسعيـره = هذيك مسيومـه وهذيـك مبيوعـه
وماكـل متحاكـيٍ تفهـم تعابـيـره = والكلمة الطيّبـه تقبـل ومسموعـه
اللغز مـن مدخلـه ينفـك تشفيـره = والساق لو ينقطع ماعاشت فروعـه
لو كـل ماينكسـر بيفيـد تجبيـره = تلقى ثياب القزاز ألوان مصنوعـه
متناقضات الدهر جابت لي الحيـره = لحظات فيها فرح وأيام فـي لوعـه
أصبحت في ديرةٍ وأمسيت في ديره = هذي صحاري وذي ساحات مزروعه
حتى استوى عندي الخبت ونواويره = مع الحضاره وذاك القصر وشموعه
والذود سـاوت مجاهيمـه مغاتيـره = من كل شي الثقه ذا اليوم منزوعـه
الوقت ما يندهن خشمـه ولا سيـره = لا بان ضحكه ولا بانت لي دموعـه
فان عوّدت عند تقديمـه وتأخيـره = على النقا رايتي بيضـا ومرفوعـه
والحمد لله علـى حكمـه وتقديـره = أفعال ماجازهـا وافعـال مشروعـه