ياكثر ما نذكر من الناس غالين = حدر الثرى ما عاد فيهم رجوعي
راحوا مراحٍ فيه ماهم ملفين = صارت منازلهم عذاب اللشوعي
الله على وقتٍ مضى قبل هالحين = أعسر علي اليوم من حبْ كوعي
إليا ذكرته والمخاليق غافين = جريت ما يفتح مفالج ضلوعي
يوم أن وقتي صار بين اليهاهين = لي طاب لي يومٍ خبت له أسبوعي
دنياً نبي منها عدال الموازين = وتميل لوّني في خطاها جزوعي
صارت بها سود المقانع شياهين = وفحولها صارت تبوع التبوعي