قال عني كثير وقلت انا شي عنه = اختلفنا ولكن كلنا راح راضي
مابقلبي اكنه ومابقلبه يكنه = لين عجزت تحبسه الضلوع العراضي
مارضى الدمع يصمت قال ظني وظنّـه = فوق الاوجان ينطق من عيونٍ مراضي
وضم كفي كفوفه يطلب الصفح منه = عن خطا ما خطيته لكن ابغى التراضي
قابل الحب منك لو يجي فيه منه = من تولع بحبك مايعرف افتراضي
سنةٍ للهواوي ماتبدل بسنّه = في جديد المحبه مثل ماكان ماضي
الهوى مثل مهرٍ مايلجم بـ اعنّـه = راكبه طايعٍ له وين ما راح ماضي
دون سيفٍ تسله او بسهم ٍتسنه = قاطعٍ كل كلي دون ادنى اعتراضي
ياحبيبٍ اضمه ولو يعذب احنه = هو خصيمي بحبه وهو شهودٍ وقاضي
ما اوصف هواي بمثل هذا و كنّه = ماشيٍ تحت طوعك قانعٍ بك وراضي
ريضوا بالرياض بخاطري كم ونّه = من خفوقٍ تولع ياهلي بالرياضي
دار نوره عساها تصبح الفين جنّـه = فوقها المزن يهمل ومن تحتها فياضي