اللي ما يدخنون حياهم الله
أما انتم يا مدخنين ليش دخلتوا ؟؟
ما قريتم العنوان ؟؟
وش كاتب لكم أنا
هاااااااه
ليش دخلتوا ؟؟
لا
لا
يا حبايب قلبي
لا تزعلون
ما كتبت الموضوع إلا علشانكم
تفضلوا
حياكم الله
( عين لكم فراش ... وعين لكم غطا )
تدللوا
آمروا
تبون دخان
اوكي
بجيب معي كرز
بعطي كل مدخن بكت دخان لحاله، وعلى الصنف اللي يحب بعد
علشان يمخخ على هذا الموضوع
بشرط بعد ما يروق يقول لنا رأيه ؟؟
خلونا نعتبر أنفسنا في استراحة مثل ما قالت شروق قبل
اللي عنده سالفة عن بداياته في التدخين والمواقف اللي تعرض لها يتكلم ..
أو يتكلم عن بدايات ومواقف أصدقائه أو زملائه في الدراسة، في العمل ..
( البساط احمدي )
اللي يبي يتكي في بيت الشعر يتكي
واللي يبي يطلع برا يشم شويت هواء
يجيب لنا هواء معااااااه ..
ليش يطلع !
إلا خله معنا في بيت الشعر نبي نسمع سوالفه
يا كثر هذرتي وشطحاتي اللي ما تنتهي ..
نسيت الموضوع
ذكروني .. ذكروني
أيه .. أيه
تذكرت
كان الموضوع
عن
( التدخين )
ندخل في الموضوع مباشرة
بعد ما تروون لنا مواقفكم أو مواقف غيركم
ونستمتع بحديثكم وسوالفكم
نطرح عليكم مجموعة أسئلة ؟؟
يا كثر أسئلتي اللي ما تنتهي بعد
ما عليكم .. أبشركم ترى بترتاحون من صداعي
شوي هاذي الأيام ..
المهم بطرح علي وعليكم عدة أسئلة ؟؟
السؤال الأول يقول :
إذا كنت غير مدخن، هل سوف تتردد
في نصح غيرك عن ترك هذه العادة ؟؟
اسمحوا لي أجاوب عن السؤال الأول فقط نيابة عنكم
كلنا بنقول أكيد
( نعم )
ونسطر أجمل السطور ..
ولكن !
إذا كنت من فئة المدخنين، هل ستفعل ذلك ؟؟
هذا السؤال بصراحة مقدر أجاوب عليه لوحدي
أبيكم تشاركوني وتساعدوني في إجابته ؟؟
أنا أتوقع .. وأقول أتوقع !
يمكن المدخنين الحلوين بعد يقولون
( نعم )
ننصح عن ترك عادة التدخين حتى لو كنا مدخنين ..
طيب ليش يا حلوين !
ما تخافون احد
يقول لكم :
( لا تنهى عن خلق وتأتي بمثله ... عار عليك إذا فعلت عظيم )
ويقول لكم واحد ثاني :
( انتم يا مدخنين عندكم ازدواجية في الشخصية )
ليش تنصحون عن شي .. وانتم تأتون بمثله ؟؟
يمكن احد من الدخنين يتبرع ويجاوب
ويقول :
الله بلاني بالعادة السيئة وما قدرت أو أنا أحاول اتركها
بس ما أبي غيري يطيح فيها.. أو يقول أنا بطلت التدخين من زمان
وما أبي احد يمشي في طريقي ..
هذا المدخن وش رأيكم في كلامه ؟؟
كأني اسمع ( وافي ) يقول وش ذا النشبه ( مقيد )
ما عاد خلص هو وسوالفه ..
خلص يا خوي .. ورانا صلاة
أذن العشاء وقرب يقيمون الصلاة وأنت من المغرب مستلم الاستراحة
طيب يا زعيم
صبوا لي فنجال يا جماعة على السريع
وتحملوني شوي ..
قربت السالفة تنتهي ..
يا الله يا الله
خلوني أكمل
تخيلوا
لو كان رب الأسرة مدخن
وشاف ولده يدخن
كيف بيكون موقفه ؟؟
تتوقعون انه بيقول له :
خذ وأنا أبوك السيجارة و دخن
خذ البكت كله يفداك
احرق الروح قبل ما تروح
طالما إني أدخن ليش أردك يا ولدي ؟؟
أنا إنسان مثالي
ما آمر بشي وأنا ما أسويه
وما عندي ازدواجية في الشخصية ..
أو انه بينصحة ويقول :
لا تدخن يا ولدي
لا تصير مثل أبوك
أبيك تكون أحسن مني
وتترك هذا السم عنك..
يا مدخنين ويا غير مدخنين
الموضوع .. تراه .. كوكتيل ..
يعني سوالف .. نطعمها بشويت أسئلة ؟؟
شمروا عن ساعديكم
وابدوا طقطقوا في الكيبورد
علشان نقرأ آرائكم اللي
( نشتاق.. لها .. ونستمتع .. معها .. ونستفيد .. منها )
همسه !
ترى رمضان جاي في الطريق
وهو بالتأكيد فرصة ..لمن يرد أن يغتنمن الفرص
في ترك مثل هذه العادة ..
ملاحظة !
الموضوع كتب بلهجتي العامية
يحق لغير الناطقين بهذه اللهجة طلب الترجمة .
خاتمة !
أقدر مبدئياً صبركم على قراءة الموضوع
ما اقدر أقول إلا الله يعينكم علًي ..
ويا صبر أيوب ..