وقّف هنا يا لايمي لا تتابع=ملامك اللي كله جروح وأوجاع!
شعورك اللي من نقا الروح نابع=أطهر من الما ، لكن أقسى من القاع!!
يمكن خذا طبعي من الحزن طابع=لكنّ ذا طبعي ، وكلٍ له أطباع!
مانيب من في ظلمة الصمت قابع=أنا الذي بإسمه يصيحنّ الأسماع!
من خير لحم كتوفي الحمل شابع=وكتوفي لشيل الحمل دايم جياع!!
أونس بقلبي كنّ للحزن أصابع=تعزف ، وصدري عودٍ أوتاره أضلاع!!!
قبل السكون اللي يثير الزوابع=أدخل على اللي كل سرٍ له يذاع!
من ساعةٍ فيها تضيع الروابع=فيها الشجاع الوامن يفزّ مرتاع!!
ليت المشاكل يوم جتتني تتابع=جت كلها من نوع ، ما جتني أنواع!!
قد لي ثلاث أيام واليوم رابع=أحب راس الوقت ، والوقت ما طاع!!
ولا يزال لقصة الصمت تابع=إن كانك لها يا لايم القلب سمّاع!
أو قولّي وقف هنا لا تتابع=سكوتك اللي كله أحزان وأوجاع!!
رشيد الدهام