خشف ريمٍ صابني عند الغدير =بالسهام الجارحه فوق الوجان
ناعم الملمس كما ثوب الحرير=جرّح القلب و سلاحه عود بان
و انعصر قلبي و خلاني حسير=ضاعت الحيله و ربي المستعان
عفت نومٍ فوق ملبود السرير=واتقلب وانهصر تحتي و لان
مقدر اصبر لو يصير الي يصير=كيف ابصبر والعقل عنده رهان
ليت لي جنحان يمه كان اطير=واستريح من المواجع و الحزان
من سمعني قال روفوا بالكسير=ما درى اني فارس فوق الحصان
ما يهاب الي تسلح بالشطير=وانطعن من دون سيف او سنان
كيف ابشكي واحد توه صغير=فضّله ربي على كل الحسان
كود ابوها عن قراره يستخير=ثم يقبل صاحبي صافي الثمان
عود اقشر ما يجير المستجير=ما طلبته غير قلبي و العيان
حطها سلعه يبي مهر كثير=ما يهمه شوق عيني لو يهان
قالت اصبر دام حبك في الضمير=ما تبي حاصل ولا ترخي العنان
رد سيفك واغمده وسط الجفير=مطلبك ما حققه غير اللسان
حلف بالله لو تقدم لي امير=ما بغيته والحشا لك به مكان
وش تقولو يا شهود بالغرير=هو صدوق او يغيره الزمان