ابيات قد تشفع لي غيابي ، اتمنى لها القبول لديكم
(1)
يا صاحبي صاحبك ما عاده ايّاه=الحظ ضدّه ، والخلايق ، والايام!
إن جا يسافر ، سافر الحزن ويّاه=وليا بقى بالدار ، زارته الاوهام!
تقدع على ضلوعه ، وقلبه تقهواه=لين أفرغته من الأماني والأحلام!!
(2)
توّك وليل البرد ينفض يدينه..=على يديني ، تنسكب في يديني!
وأمرّرك على الضلوع / المدينه=حتى أحس بدفوتك تحتويني!!
(3)
حضورك اللي مهتني به من العام=لا زلت حتى الآن أقطف ثماره!
لكنّي اخشى من تصاريف الأيام=تعكس مفاهيمه ، وتخلف مساره!!
(4)
يا صاحبي والبرد واقف على الباب=انا هنا بارد ، وخايف ، ومنهك!
أبي الدفا ، واتذكّر وجيه الاصحاب=ما ألقاه حتى اذكر تفاصيل وجهك!!
(5)
حبيبي ماتت وعود الليالي والشتا كذاب=يواعدنا بدفا بكره ، وبكره ما يدفينا!
يعلمنا متى نبكي ، متى نزعل ، متى نرتاب=ولا فكـّر يجي مره يضحكنا ويرضينا!
يسكر باب جمعتنا ، ويفتح للشتات ابواب=يضيّعنا ، ولا نقدر ليا ضعنا نلاقينا!!
(6)
من أول ايّام حبك لين أواخرها=وأنا أتجمّل بصبري ، وآتعزوى به!
احيان يقوى على عيني ويقدرها=واحيان عيني بدمع الحزن غلاّبه!!
(7)
ياللي تقول البرد جمّد عظامك=إفرح ولا تصبح من الجو مستاء!
لو ذقت ما ذقته تغيّر كلامك=برد المشاعر غير عن برد الأجواء!!
(8)
من غيّر إحساسك ، وقسّى خفوقك=وأتعبك ، وألحق حلو هرجك مراره؟!
لا هذي اطباعك ، ولا الشوق شوقك=بقى بك إسمك ، والبقيّه خسسساره!!
(9)
يا غاليه مالي وسرد المعاذير=ما دام قلبك جازمٍ فإبتعادك!
بسكت وآهاتي ورود ومصادير=تعتب على حظي ، وقسوة فؤادك!
واقنع بمقسومي عسى فآخره خير=واشيل قلبي ، وابتعد عن بلادك!!
واذكّرك قبل التعب والمشاوير=ما كل قلبٍ بيترجّى ودادك!
لا بدّ يجي يومٍ عليك المقادير=تقسى ، وتكسر ما بقى من عنادك!!
(10)
شعري واحاسيسي وقلبي ونبضه=" واحبابي الماضين والمقبليني "
هديّةٍ للي عطى بعض بعضه ..=لأهله ، وخلاّ كل كله فإيديني!
دوّرت له بين المعاليق ومضه=ولا لقيت الا الضياء المبيني!!
(11)
احبك قد حبي لك ، ولا عندي لحبك زيّ=ولا أحدٍ منّي يآخذني سواك ، ولا يرجعني!!
أنا لك مثل ما ودّك ، ولا ودي بغيرك ليّ=يا مغنيني عن الدنيا وما فيها ومقنعني!