تلبيةً لـ طلب وافينا ، لـه ولكم ،
قصيدة لـ الوالد الشاعر / فليـّان بن ماضي ابو راس السبيعي أمدّ الله في عمرهـ وأسبل عليه ثوب الصحة والعافية ،،
عقـّب اللي دايم يهمّل خويّه=لا عرض له عارضٍ لّـه ما تحرّا !
من يخلـّي صاحبه فالمهمهيّه=في هجير القايله ، والظلّ قرّا !
الردى مطبوع بالنفس الرديّه=والردي يبقى ردي داخل وبرّا !
ما يجيب الفود من نفسه دنيّه=يتزهل لك ، وبالأزمه يفرّا !
مهفيٍ قدره ، ولا له مقدريّه=ما يحوش الطيب من لا به تضرّا !
تحترمه الناس من نفسه قويّه=ومن يصون العهْد في خيرٍ وشرّا !
جامع الشارات ، فيه الأريحيّه=راعي الفزعات في بردٍ وحرّا !
ومن تردّى ما يرى ألا المحقريّه=وكل من هو يعْرفه منه يتبرّا !
عند كل الناس ما له قابليّه=وفي سواليف النشاما ما يطرّا !
الذي غير الردى ما له مزيّه=ما يقدّر ، ما يعبّر لو يمرّا !
ما معه مبدا ، ولا ذمّه بريّه=من سلخ ثوب الحيا حتى تعرّا !
ما كذب من قال بالنيّه مطيّه=ومن وقع ما له محيص ولا مفرّا !
لا يخاف اللي مشى الدرب السويّه=والذي في طيب الأفعال إستمرّا !
والله اللي يطـّلع في كل نيّه=مالك الأملاك ما يخفاه سرّا !