السلام عليكم ورحمه الله وبركاته
عندي كم كلمه ودي اقولها .. وتوجهوني اذا غلطت في فهم شئ معين او كذا
المهم .. الحين وش يميز الناس عننا ! هم وش احسن مننا فيه ! كلنا سواسيه نملك نفس العقول والوقت والتفكير والاحاسيس والخبرات قلت او كثرت
اتكلم عن الوئام بشكل الخصوص لاني مركزه وقتي عليه في الفتره الاخيره وجدت فيه بيئه طيبه اجبرتني على البقاء لكن اللي يحصل مايرضي من يبتغي النجاح من يبذل من وقته للتطور ويطمح للافضل ، عن نفسي ما اعرف ارد بـ شكرا ويسلموو ونقل موفق ومن هالكلمات الجامده .. التفاعل الحقيقي مع الموضوع والنقاش والتعليق هو اللي يبتغيه غالبيه من يدخل المنتدى ، التعليق بكلمه او كلمتين تضر ما تفيد لانها تشجع على الجمود ويظل الواحد يتلقى فقط دون مايعطي شئ .
في الفتره الاخيره مالقيت الا موضوع او موضوعين ارد عليهم والسبب سبق ووضحته في رأيي عن المنقول ، موضوع القاه في 4-5 منتديات والقاه برضو هنا ومطلوب مني ارد على كل موضوع ! ( مطلوب لاني ابغى المكان يكون افضل ) ولا بامكاني امر مرور الكرام واسكت غيري يقوم بالدور ويرد مجامله .
مافيه احد يولد فاهم ولا احد يدخل المنتدى وهو عارف كل شئ لكن حبه حبه نتعلم من بعض واللي شفتهم هنا ماشاء الله اكثرهم اجد لديهم الرغبه في العطاء والتوجيه ، ولا اذكر اني قريت رد يثبط من عزيمه احد وهالامر نادر ترا ، المنتديات الاخرى تتهكم وتسخر من الكاتب وكلامه ومع ذلك يستمر يكتب ، وما اظننا نقل عنه عزيمه وهمه .
نجرب مره ومرتين نفتح موضوع جديد ننقاش فكره موضوع نطرح رأينا نقول اللي نحس فيه ونشوفه صح ، من حقنا ننقد اي شئ بالمجتمع بطريقتنا وندور لها حلول ، نقدر نكتب موضوع تربوي مثل موضوع اسطوره الخريف عن تربيتها لاولادها ونفيد بعض ، او موضوع ديني مثل مايكتب الفهد ، حنا قادرين على الكتابه لكن ..
لكن لو توقفنا عن النقل من الغير
عن النقل من المنتديات الثانيه والقروبات
لان كلنا نقدر نروح لذيك المنتديات ومشتركين في القروبات ونقرا الموضوع من كاتبه الاصلي
ونعلق عليه وننقاشه بعد .. يعني مهوب شئ عجيب او موضوع جديد نقراه دامه منقول هنا.
هي كلمه من ناصح ان اخذتم بها فكان خير وان ما اعجب بعضكم ، واظن ذاك ، فقد ابرأت ذمتي تجاه المنتدى حتى يجي يوم وتكتبون في موضوع العضو المفقود وين قنوعة
لا صدق اتكلم ..
اثق بكم وبقدراتكم
قرأت حروفكم قبل اكتب هالموضوع
انتم قادرين على الكتابه مثل المواضيع اللي تنقلون
بل افضل
والسلام عليكم