أسج مـع هجـس الطواريـق واعيـف
هجسي وطـاروق الضلـوع النحايـف
تجوع سلمـى وأتـرك الكـم والكيـف
وأقسـم رغيفـي بيننـا بالنصـايـف
أقـرا وتكتبنـي قضـيـه وتعـريـف
وتظمـا وتشربنـي نحيـب وذرايــف
صمت الشعور إحساس ماله تواصيـف
أكبر من حـروف الحكـي والوصايـف
يا سيف كيف اشرح لك الوضع يا سيف؟
أقلامنـا جفـت ورفـعـت صحـايـف
كيف ابتدي يا مسندي وانتهـي كيـف؟
من دون كيف انا مثـل ماأنـت شايـف
شفني بقايا انسـان والوقـت كالسيـف
وحظي كفيـف وفرحتـي حلـم زايـف
همي بحر وضلـوع صـدري مجاديـف
والعمر مركـب بيـن الأمـواج طايـف
وقلبي وطن وعـروق قلبـي تجاويـف
للحـزن وهمومـي شعـوب وطوائـف
صوعات بقعـا، والقـدر، والصواديـف
ورتنـي أهـوال السنيـن العجـايـف
أتبع (خريف العمر) في رحلـة الصيـف
وأزحف على حـد السيـوف الرهايـف
الليـل مفتـاح السـهـر والتكالـيـف
والصبـح مفتـاح القهـر والحسايـف
والصبـر مفتـاح الضلـوع المناحيـف
والحـزن مفتـاح الجـروح الرعايـف
والمصلحـه مفتـاح بـاب المواقيـف
والواسطـه مفتـاح بـاب الوظـايـف
والفقـر يفتـح للوجيـه المصالـيـف
باب الصلافـه، والضعايـف ضعايـف
لاصار لـك حاجـه ولا لـك معاريـف
بشت القناعـه...........،..........
إن قلت لك خايف ترى مانـي ضعيـف
ولاني شجاع إن قلت مانـي بخايـف؟!
يا سيف وش عذر المعازيـب للضيـف
لامنهـا ضاقـت صـدور المضايـف؟
قـل للسوافـي لـو تهـب العواصيـف
عنهـا رقيـنـا عالـيـات النـوايـف
تسفي وحنـا فـوق روس المشاريـف
في راس نايف، والخلايـف ..خلايـف
وقل للضعوف اللي تحسب المصاريـف
حنـا ترانـا مـا حسبـنـا الكـلايـف
لوشحـت يديـن الزمـان المناكـيـف
نبقى علـى عهـد الوفـا مـا نزايـف
وان طال بـال الليـل قـل للسواليـف
بوح السهر من ضيقه الصـدر عايـف
::
من مستنداتي القديمه
للشاعر عادل الذيابي
اتمنى ان ترتقي لذائقتكم
