يا مرحبا من راس صلف المنـــاعير
*****************ذيب ٍ ليا شاف الخوي فيه خله

جيتك وفي جوفي لهايب مساعير
*****************نارٍ تلظى والحشاء مـــدهلٍ له

من شفت قيفانك وأنا حالتي غير
*****************مثل الغرير اللي بدأ فــيه عله

قمت انتخي بعظام ربعٍ مــشا هير
*****************شيوخٍ تعرف الطــيب دقه وجله

ومن لايقوم القومــتك ينهش الطير
*****************من جثته وتـــشوف يبكيه خله

يالســـــيف دنيــانا تــراها تعــازير
*****************تلطم وجـــيه الطــيبين الاهـله

يا ما وياما فـــرقــــتنا المــشاوير
*****************وياويل قلـــبٍ يالـسنافي تتله

دنياً تغــير بجيشها الصبح وعصير
***************** تخلف وسيع العرف عن مذهب له

وإن كان تشكي فرقا زين التعابير
***************** الصاحب اللي لاهـرج ما تمله

مدري من عتيبه ويمكن من مطير
***************** وكلٍ على ما قيـل كفو بمحله

والا من اللـــي يحسنون الــتدبير
***************** حضر ٍ وبدوان ٍ على خير ملـه

يالسيف لو هي بالسيوف البواتير
*****************وقب المهار مــرودنات الا جلـه

لاجيبها لوهي ورى كشب والنير
*****************لو دونها الموت الحــمر فدوتـله

وياتــل قلبي تــل مطـــوية البــير
*****************على عشير ٍ غاب ولامن يدله

ذالي ثلاث سنين من غاب يا منير
*****************وعيني على فرقاه دمعي تهله

مستفردٍ عنهم واديـر التــفاكـير
*****************بأرضٍ خلاء البوم مقعي بظـله



مرحبا اخوي الغضي

واش اقول غير صح الله لسانك

وسعداء بانضمام شاعر بهذه الروعه في هذا المنتدى
تحياتي وتقديري لك