منتديات الوئام - عرض مشاركة واحدة

11 / 02 / 2017, 24 : 08 PM

/

يالله ياللي دوامى فتح بيبانه
دايم لخلقه على فتحت مصارعها

وكل المصلين تطلب منه غفرانه
وحياتهم يطلبون الله منافعها

يارب عضنا فوقتٍ(ن) شب نيرانه
طالت ليال الجفاف ومن يصارعها

وراع المواشي بلش فيها وصبيانه
عمال وأعلاف مزري لايسنعها

ياخذ لها دين وازرى يسد ديانه
ماعاد يقوى بعد رخصت مبايعها

واليا بغى اسلاف ماشان العرب شانه
بعض المعاريف حب المال يمنعها

ليا زاد عده تراه يزيد شيطانه
مكاسبه تغلط العالم مطامعها

والسمت ضايع وضايع وزن ميزانه
أخر زمان العرب شانت طبايعها

والطيب فالوقت هذا ضاع برهانه
حتى الصنايع غدت ردت صنايعها

والصدق كثرو عليه اليوم كذبانه
كل(ن) على مايبي زرقاه يصنعها

والبغض والتفرقه زند(ن) بصوانه
كلٍ على قربته ناره يولعها

والجار ماعاد يامن بوق جيرانه
كم قصةٍ بينهم بانت وقايعها

والفاهم اليوم تضحك فيه ورعانه
أن كان ماطاوعم لازم يطاوعها

والعبد يامر على عريّف عمانه
اللي منول تبيعه مع بضايعها

والراس طالت عليه اليوم كرعانه
واراذل الخلق تنقر روس اصابعها

والحق ياقل منطوقه وعوانه
وياقل من ذمة ماهو مضيعها

والخاتمه بالاله الرب سبحانه
خالق جميع العباد وله مراجعها

الشاعر / مطلع بن مرزوق بن مسلم الحربي

/