منتديات الوئام - عرض مشاركة واحدة

15 / 04 / 2010, 57 : 09 PM

راجع يقول ابكي ويطلبني رضاي
يبي يراضيني بأية وسيلة
بكاه ماهو شي من جملة بكاي
ياما بكيت بسبته كم ليلة
في كل يوم اتعب لاجل شوفه خطاي
واقطع على شانه دروب طويلة
والناس لاشافو دموعي وشكواي
قالوا ترا مايستحق تعني له
مادام ماله في علاقاتكم راي
ولايسمع لشكواك لو تشتكيله
واقول ماتدرون وش هي خفاياي
هموم قلبي صدق ماهي قليله
الله بلاني بحبه وصار دنياي
وبلاني بناس عليًه تشيله
تطرد وراي وودها تعرف أخطاي
يستخدمون لطيحتي كل حيلة
لكن مايسوون بالقدر ماطاي
جابوا على انفسهم رداة وفشيلة
وصويحبي مرات مرتاح واياي
ومرة يحاكيني بنفس ثقيلة
المشكلة ماهو برايح ولا جاي
ولااقدر انسا الحب ومعاهدي له
رجواي باللي ماتخيب به رجواي
اشوف خلي واهتني بشوفتي له
قد قالها الشاعر وفي مثل بلواي
( ولا لي الا الصبر ) وش جابني له؟

نواف العضياني