إذا ماهي شقاوة طفـل عدّيهـا شقـا رجـال=يبي ينسى على ايدك حاضر العلـة وماضيهـا
على شالك يبي يرمي بليل مثل لـون الشـال=ويبي ينهـي روايـة مـلّ كاتبهـا وراويهـا
يبي يكتب قصيدة في شفاهك من بريق الـلآل=تشد العاشـق الظامـي بلمـع المـا قوافيهـا
يبي ياخذ من اعيونك مكـان ويندفـن بالحـال=ويترك كل شـي ..الهمّ..والدنيـا ومـا فيهـا
يصير اظلال لعيونك ليا منّك بغيـتِ اظـلال=ودمعة لااشتهت ذيك الخـدود الدمـع يسقيهـا
يبي منّك سواليـف وتعاليـل وحكـم وامثـال=وذا قلـتِ خـلاص ايقـول لاوالله عيديـهـا
يبي يكسر جدار الصمت ويشوف الحكي يختال=على جاله زهور الهمس تضحك في مغانيهـا
يبي قصّة تسولف له عن الحاضر براحة بـال=يسافر في سماها ..يحبـس انفاسـه ويطويهـا
يبي همس القصايد تاخذه مـن حزنـه القتّـال=يبي عطر الشفايـف يلغـي الرحلـة وينهيهـا
يبي يبني على شطّ الفرح من همسهـا تمثـال=ويرمي بالعصا وايّامه القشرى علـى ايديهـا
يبي يشرب من اعيون السحاب ودمعها الهمّال=ويقلـب كـلّ ابـو دنيـاه عاليهـا لواطيهـا
يبي يشعل سجايـر لهفتـه لهفـة وذا ماقـال=أولّعـهـا يولّعـهـا عـنـاد ولا يطفّـيـهـا
يبي مالا يبي حتـى يبـي مـالا يبـي بهبـال=وذا جت سالفـة تطلـب منـه قالـة يعدّيهـا
يبي ينساب في عود القصب لامن بغى مـوّال=ومن قوس الربابـة والوتـر نغمـة تلاقيهـا
قلوب العاشقين الهايمـة فـي عشقهـا بقبـال=وتحظنهـا ضلـوع المغرميـن ولا تغنّيـهـا