منتديات الوئام - عرض مشاركة واحدة - خل الملام ينآم بعيون الأفواه / وقلبي إليا منّه نوى / مايراوي !

04 / 12 / 2008, 01 : 03 PM

رائعة من روائع

صاحب الحرف الراقي :
نواف التركي
//

//

اللي يشيل اسم ٍ كبير يتحاماه
يكون قد اسمه وقد الهقاوي

والا يشيله قبل لاالناس تنصاه
ويلحق هله عقب المديح المساوي

الطيب لو هو بالسوالف قدرناه
مير البلا دونه تخون العزاوي

والأدمي يذكر من الناس ماجاه
عشان ماينغش عقبه رجاوي

مو كل رجال ٍ ليا ضقت تنصاه
إنشد قبل تطلق قيود الخطاوي

ولا كل من عرّض من الناس تنخاه
ماللبلاوي غير مثله بلاوي

عنّز على اللي لاأظلم الوقت تلقاه
نجم على روس الشواهيق ضاوي

لادق صدره فأبشر بفعل يمناه
ماهو بـ/دقّاق الحنك بـ/القهاوي

يبي يحوش المرجله بس ماأمداه
هاز الطويله مير مالله ناوي

وعوّد مع دربة يسوقنّـه خطاه
والمنحدر دلو ٍ مع البير داوي

خلّه يـ/علّ أتلى الخبر عنّه رشاه
ثاوي ولا يقدر على الطيب ثاوي

يشفق عليه اللي من الناس شرواه
عندي حضوره والغياب متساوي

قم غن :[هذي مثل غيره وننساه ]
جاوب قنيب اللي على الظلع عاوي

الليل هذا داني عذوق وأدناه
عود ٍ يدندن للرحيل الغناوي

واللي مثل حالي يغنّي لـ/ليلاه
أدنى الحنين يمرّه يعود غاوي

خليت هـ/الكون الوسيع لزواياه
وأخترت أكون بـ/هالزمان الخلاوي

لأني عرفت الوقت هذا ..سواياه
ماتصلح لرجال مثلي حياوي

وأمنت بإن اللي نقل داه برداه
يتعب ولا يلقى لـ/جرحه مداوي

لذا وحق الدمع .. والآوف ..والآه
لأنبت ولو كان الزمان متلاوي

وش قيمة الإنسان لاخان مبداه
وأفلت عقب كبر الطموح الهقاوي

خل الملام ينام بعيون الأفواه
وقلبي إليا منّه نوى ما يراوي

مؤمن بإن المسكنه غير لله
ذلّه ..وعمر الأدمي مايساوي

لحظه ..يوطّي راسه لغير مولاه
وإن الله القاوي على كل قاااوي

هذا الكلام اللي ولاتنطق شفاه
عقبه ولا أسمع جرح راوي لراوي

خذ ماتيسّر لك من الشعر وإقراه
لإني تعبت بصدق منّه وناوي

أتركه لأهل الفخفخه والمباباه
عشّاق أغلفة الصحف والحكاوي

فإن غبت بكره لاتدوّر لي أشباه
مالي بـ/هالأرض العريضه حرواي

لي بالسما حلم ٍ قديم آتمناه
أما أدركه ..والا فأنا النجم هاوي

فلا قفا نبكِ ولكن من أتلاه
ودّع هريره ..والشقاوي شقاوي

وإن كنت ذا اسم كبير ٍ تحاماه
كُن قد شرهات العرب والهقاوي ..