الحزن واحة خافقي فـي سماهـا=طير(ن) يحوم ولا لقى حولهـا فـي
واحة: جفاف العمر حزن ارتواها=وكسّر غصونه والثمر صار مذوي
مابه ملامح للحياة وصفاها=إلا غراب(ن) ينعق اصوات تدوي
وريح(ن) تصرصر بعضها من عتاها=غي المدامع غي والعاتية غي
اطوى ظمى الايام واطلق رشاها=وترجع وفاض(ن) مابها قطرة المي
واليأس ماخلا شبر ماوطاها=حتى براعمها طواه العطش طي
كل ما أغمّض في عيوني اراها=احلى طيوف(ن) كنت من اجلها حي
اسنين مرّت واحتسينا حلاها=والمر هذا اللي بقى والشقاء لي
راحت وخلتني اسير بهواها=عهدي بها يوم الفجر كان له ضي
ويوم القمر له بسمة(ن) وش حلاها=ويوم اليالي مالها شكل(ن) وزي
اصارع احلام(ن) مضت لي معاها=واجاذب الحسرات وانوح وابكي
اكبر ذنوبي في عذابي غلاها=واصغر ذنوبي في عذابي بعد هي
من قسوة الدنيا وجاير قضاها=مكتوب لي حمل العناء لو اقول أي
هذي هي الدنيا اذا اعطت قفاهـا=تخليك في خانة خلا مابها شي