نهار ثالث عقـب عيـد رمضانـي = ناسٍ عطاها الله وناس محرومه
احدٍ قضا عيده سـلام وتهانـي = واحدٍ توصله الكواكب همومـه
صادفت صدفه من صدوف الزماني = منها قوي الحيـل تفتـر عزومـه
هـذا زمـان الهـم والامتحـانـي = وقتٍ على قلبي تعاقب سهومـه
الاولـه كامـل جميـع المعـانـي = مزبن المضيوم شـرع الخصومـه
محمد اللـي فـي القسـا واليانـي = عقبه سمايـا غايبـاتٍ نجومـه
والثانيـه باقـرب قريبٍ ودانـي = خامس عيالي يوم جتنـي علومـه
قالوا مابيـن الخاصـره واحلبانـي = ولدك مـات اللـي ترجـا قدومـه
جا يومه الموعـود باربـع ثوانـي = قلت السبب قالوا دنـا منـه يومـه
علمٍ على الكبدالصخيفه كوانـي = كيت عطـب ماتنشكـي للحكومـه
تهشمت كـل الضلـوع المحانـي = مفجوع والمفجوع محدٍ يلومـه
اخذت لي ساعه وانا فـي مكانـي = حسبت لى عشرين طيحه وقومـه
الى بغيت الهـرج يبـس لسانـي = والذاكره عنـدي تقـول أمعدومـه
قمـت اتلفـت واتسمـع بـأذانـي = من شـاف حالـي ماتهنـا بنومـه
مما بقلبـي رحـت بالليـل عانـي = لموتر اللـي مابقـى الا رسومـه
عن روحتي ياليـت ربـي نهانـي = ولاشفت دمه سايحن فـي هدومـه
قمـت ودفنتـه والله المستعـانـي = في خرقتٍ بيضاء عليه محزومه
يـم القويعيـه بـلاد اقحطـانـي = والحر غير لون وجهـي سمومـه
واقفيت من عنده وعشـري ثمانـي = مثل المصبـح والبـلاد امحكومـه
طاوعت نفسي مير عقلـي قوانـي = عن الخطاء مافيه نفس امعصومـه

احمد الناصر


.





.