الشاعر فهيد المجماج>>
الشاعر فهيد بن عبد الله بن فهيد بن محمد بن سعود(الملقب بالمجماج) ابن مجمد من ال ابو هلال بن مزروع من بني العنبر من عمرو من تميم.
انتقل جده سعود بن محمد من روضة سدير الى المذنب واشترى الجراية وتوفي وليس له من البناء سوى محمد الذي توفي في المذنب سنة 1212ه فانتقل فهيد جد شاعرنا (اكبر ابناء محمد).
في نفس العام الى بلدة الاثلة في عالية نجد واشترى الرفيعة وهي بئر زراعية في الاثلة واستوطنها هو وابناءه.
وفي عام 1275ه تقريبا ولد شاعرنا فهيد وكان مشهورا باسمه ولقب ابيه فكان والده يلقب (عويد)وتوفي فهيد في الاثلة عام1322هـ.
ولقد فقد اغلب شعره ولم يوجد له من القصائد الا ما يقارب العشرين قصيدة اغلبها في الغزل ووصف رحيل البادية .
ولعل اكثر قصائده تعلقا باذهان الرواة تلك الذي ختمها بذلك البيت الذي تنى به اكثر الرواة:
حبه يخج القلب ما يوجع اوجاع
لا شك قلبي مودعه بيت نملة
كان فهيد جالساً في السوق ذات يوم فمر عليه طفل اسمه ناصر وكان الطفل يبكي فقال له ما يبكيك يا نويصر فقال اني جائع فأجابه شارحا له بأنه يعاني مثله:
يا نويصر طالت الهجرة علينا
ذا لنا عامين والوادي سناوي
والتجار وجيههم قامت تشينـا
كن واحدهم عن النفر امتداوي
ومن يتأمل شعره يجد انه قوي العبارة طبيعي صادق بدون تكلف جيد المستوى دقيق التعبير يصور بيئته تصويراً بديعاً
كان شعرنا مولعاً بابنة عمته وذات ليلة رآها وهي آتية من نخيل ابيها ماشية الى البلدة وكان معها امرأتان من أسرتها فأصاب قدمها عود فأهوت لتنزعه من قدمها فوقفت رفيقتاها الى جانبها حتى تنزع العود وكانت الليلة مقمرة فقال:
يا راكب اللـي مـا لحنـه ظلافـه
ولا داره الجمّال يدنـي العلـف لـه
ما مون توه يصطفـق فـي عسافـه
لو طال طيـول المـدى زاد جفلـه
يـا دار يـا دار العـنـا والتـلافـه
وين الغضي ويش أمره اللي صدف له
تقـول أخيلـه يـوم عقـب سنافـه
واليوم ما درى وين دربٍ ذلـف لـه
يا دار يا ما جيـت لـك بانصرافـه
نـوب علـى عينـه ونـوب بغفلـه
يـا دار ياللـي مثـل بـو وقـافـه
تبهل عليـه الطايلـة وتعطـف لـه
البارحـة شفـت الحبيـب خطافـه
خبرك بشوف الليل ما ينصـرف لـه
وبوي مـا زيـن وقفتـه بانحرافـه
والكل منهن يـوم دنـق وقـف لـه
كان فهيد يؤمل في الزواج من محبوبته لما بينه وبينها من القرابة فهي بنت عمته غير أن أباها زوجها من ابن اخيه الذي نشأ يتيماً فكفله وتربى تحت رعايته فلما كانت ليلة زفافها على ابن عمها جزع فهيد جزعاً شديداً وأتى عمته وشكا اليها ما يعانيه وبكى فقالت له عمته يا ولدي لا تبك فالنساء كثيرات وفيهن مثل حسن وفيهن اجمل منها فزاده ذلك حسرة وألماً فقال:
يا ونتي ونة ضعيف الـى هيـن
واجرحي اللي كل ما له يكـودي
والناس فكروا بي ولا همب دارين
وان سايلوني قلت ذا لون عودي
انا اطلب الله يا هلي قولوا آمين
عسى العجايز في جحيم الوقودي
ان يقولـن للحبيـب حليبـيـن
وكل العذارى من عشيرك وزودي
لا تاهمون بزينكم يـا مساكيـن
والله ما للزيـن معكـم مقـودي
والله مانتـم للحبيـب مـلاديـن
لا بالجمال ولا بحسن الوقـودي
يا زين من بين العواتق نظيميـن
فارقهن اللولو بحلقـه عقـودي
عليه من صيغة بريـدة مثاميـن
تسعين ما ني كاذب في عـدودي
أوي خـل بـس لـولاه جافيـن
ولولاه يمنحني بكثر الصـدودي
عز الله انه من عربنا المواليـن
لا شك عداني صليـب الجـدودي
هذا وقد اشتد حزنه على ابنة عمته وزاد ولعه بها وكثر بكاؤه فقال:
يا جر قلبي جر دلو الى ميـل
ذولا يجرونـه وهـذاك يلقـاه
ابكي بكا ورع بشهر الزهاميل
على عشير فاتنـي وآعلـى آه
عليه محال الضماير زلازيـل
تجوض من فقده ومن شد فرقاه
والقلب من ممشاه غاد جواديل
من كثر ما والله يدوشه ويا طاه
يا مغزلٍ مرباه روس الغراميل
ما ذره القناص يـوم بمربـاه
يا زين عنقه بين هاك العثاكيل
وعواتق كن القراطيس حليـاه
وخدود يوضن كنهن القناديـل
والزين كله ناقع بيـن حجـاه
ومن قصائده:
لا والله إلاّ شدّوا البدو نجاع
=كلٍ هدم مبناه وارتد زمله
شدّ الشديد وقربوا كل مطواع
= وراعي المودة فرّق البين شمله
غدا لهم دون الرفيعة تمزّاع
=كل بغا درب ٍ عزل وانقسم له
وابكرتاه اللي غدت بين الاقطاع
= وآبعد دورتها على اللي جهم له
الهقوة إنه يم "دخنه" بالأوقاع
= والا مع اللي سنّدوا مستهم له
لاهيب لاحاشي ولاهيب مرجاع
= عفراً فتاه وراعيه ماوسم له
ياغصن موزٍ ناعمٍ له تمر ياع
= ومنين ماهبّ الهوى مال حمله
راعي هدب عين مظاليل ووساع
= خرس ٍ عيونه والمحاجير جمله
وراعي مجاديلٍ مشطهن يجي باع
= أشقر على هاك الردايف يعمله
عليه ماوقفت عيوني بالأدماع
= وهجس إن يلحقني على الطول سمله
أعوي عوي ذيبٍ ورا البدو نجاع
= يقنب إلين الله يجيب اللحم له
حبه يخج القلب ..مايوجع أوجاع
= لاشك قلبي مودعه بيت نمله
وقال أيضاً :
يامل قلب من شديد العرب جاض
كما يجوض إذا أوجس الكي ممروض
لا والله إلا صار للبدو نضناض
دونك حجير مغيزل العين مقضوض
طمنت راس للمنازل ولا راض
ولا شفت بين بيسر البدع منهوض
يا من يبشرني عسا شيخهم راض
وين انت ياللي لك مع البدو ملحوظ
طووا ورووا وانتووا عقب مقياض
ولا نيب راجيهم إلى جرت الحوض
يوم استقلوا والمظاهير قفاض
غدا لهم دون المشاريف عاروض
شفوا وهفوا واتقوا عقب معراض
وامسيت حالي من هوى زيد مقروض
امسيت كني هاوي حبس الأرفاض
وصبرت يوم انه مقاسيم وحظوظ
عفت المسير وبت لشفاي عضاض
مثل الهجين اللي من الشيل مبهوض
والدمع من عيني على محجري فاض
فيضة شعيب فايض له على روض
يبون براق على دارهم ناض
مختلط به عشبة الصيف وحموض
إذا استعز القلب وعنز بالأبراض
تعرضه من طاري البدو عاروض
وقال أيضاً :
لا والله الا اخلوا جناب العدود
امسى جناب العد خال عليه
معاد جانا من عربهم ريود
والليل يضوي واضوى له رعيه
يامربعه يسقيه وبل الرعود
يمطر عليه بليلة هيد بيه
اخيلهم لين اتقوا ياحمود
لين اتقوا بين العبل والشفيه
ما عنك يانابي الردايف صدود
لك شوفة ما هيب شوفة سهيه
وقال أيضاً :
لا والله اللي صلموا ياعميرين
وشألوا على بيض الغوارب زهابه
البارحة فوق الركايا مقمين
ونيرانهم كن البروق اشتابه
واليوم ماغير الرخم والمعاطين
ومنازل ماكن حي وطا به
طريقهم ياطا الثمد منه ويمين
وغد الهم دون الأسمير ضبابه
يتلون أبوخالد زبون المتلين
الى جالهن عند اللحيق انحطابه
اوي جيران على الكبد حلوين
مثل الحليب اللي لذيذ شرابه
لا والله اللي جوا وراحوا على زين
ولا عذبوا جيرانهم بالطلابه
:
رحم الله فهيد المجماج وغفر له ولجميع المسلمين
منقوووول راق لي (: