إحفري له وسط قلبك وإدفنيه=حب قلبٍ مايعيش إلا معاك
شرّبيه الحب صافي وإشربيه=وخلي بالك منه ياأجمل ملاك
من نقا قلبك وحبّك لحفيه=وإن شعر بالبرد ضمّيه لحشاك
دثريه إن زاد برده دثريه=راح ينسى البرد لاحسّ بدفاك
دافي إحساسك من البرد يحميه=مثل ماهو بغيرته دوم يحماك
وإن تناسى الشوق لحظه ذكريه=برمش عينٍ فيك لاسلهم هلاك
وإن تغلّى شوي قومي وأحضنيه=وإرسمي بخدّه حمارٍ من شفاك
وإن تزايد بالتغلي أعذريه=قلب ظامي ودّه يحس بغلاك
سايريه إليا تغلّى وإسأليه=لاظميت اليوم من يروي ظماك؟؟
والله إن يفزّ بسم الله عليه=ويبتسم ويقول ماأحدٍ سواك
لاظمى يركض تجاهه ويرتويه=ويسقي عروقه غلا ويطلب رضاك
لك غلا خاشر غلاه لوالديه=وله بيارق حب تخفق في سماك
يهتف بإسمك وتدمع مقلتيه=يا(....) القلب ميّت في هواك
إن حيا حبّه بحبك بادليه=أكرميه بطيب ذاتك ودخلاك
لاتوفى بأقصى قلبك إدفنيه=وإتركيه أرجوك ينعم في حشاك