ضمني لين اسمع حطام الظلوع = لو تحطم فدوةٍ لك ياغلاي
ماهي اغلى من خفوق لك يزوع = ولاهي اغلى من دموعك في رجاي
ولاهي اقوى من الم ذيك الفجوع = يوم لاح فراق روحك في سماي
ولاهي ارحم من حكي بعض الربوع = يوم كلٍ قام يبدي لك برأي
وكلها الاّ ليلة اطفيت الشموع = ليل وادي ويل سيّل في حشاي
يوم قلت فراق ماعقبه رجوع = السماء والارض ضاقت مع فضاي
ضاع فكري لين ضيعت السنوع = وصرت اهذري من خلايه في خلاي
ومرت اللحظة وافكرها اسبوع = ووقتي الضايع وهبني له شقاي
والالم من كل صنف وكل نوع = داعبت كاساته المرة شفاي
وجيتك ودست الخطر وبلا دروع = غير حيك درعي وشوقي عصاي
فوق صدرك ودي اريق الدموع = دام عيّت لاتكفكفها يداي
من حنانك فيض يالقلب القنوع = وخل قلبي لك يبيّح لك خفاي
ضمني ماجيتك اشكي هم جوع = لا..حشا ماجيتك الا من ظماي
ظامي لشوفتك يالخل القطوع = شف غصون القلب جففها هواي
وانظر بحالي غدى حالٍ يروع = ياحبيب الروح هل هذا جزاي؟!
ياسحاب الصيف ماارجي بك زروع = الرجاء باللي زرعته في شتاي
وباطلب الله في سجودي والركوع = ياعسى المعبود يتقبل دعاي
وتهزم الفرحة بدمعتها الدموع = وياعساي اهزمك ياحزني عساي