يا مساعد ياكثر وجدي على الحب القديم = اتوجد كل ماهبت ذعاذيع النسيم
فيه طعم الحب صافي والغلا يملي الصميم = واصعب اللحظات عند الناس لحظات الوداع
ترى للحب الاول مواثيق وقوانين = وصار الحب تال الزمان مثل الوسيله

لا توجد لا توجد خل لك قلب لبيب = بدل الحكم القديم وعالج الجرح العطيب
انت الذيب وصير مثل اسمك مع الأيام ذيب = وأصعب اللحظات عند الناس لحظات الوداع
نبي نلزمك ياذيب في كل البراهين = عساك تشوف لك يا طويل العمر حيلة

حبنا الأول تكفي نظرة الطرف الفتون = والحديث اللي تشافى به وسيعات الطعون
نختلف عن حبكم يا أهل الورق والتلفون =وأصعب اللحظات عند الناس لحظات الوداع
يخيم حبنا في القلوب شهور وسنين = ولكن حبكم مدته عشرين ليله

ما نقول بحبكم شينه ذهب وإلا بقا =الوكاد إن جاء أحد منا يدور به لقا
حبنا حنا رومانسية ما هو هم وشقا = وأصعب اللحظات عند الناس لحظات الوداع
تري ما همنا حبكم يا أهل البعارين = بدى عصر التطور ومثلك راح جيله

في زمنا في زمنا فيه قيمة للحبيب = والحبيب بعصركم يطلع عليه ألفين عيب
والوفا في الحب في تال الزمن ماله نصيب = وأصعب اللحظات عند الناس لحظات الوداع
تتم وعودكم في الحدايق والدكاكين = وتطير عيونكم كل ما شفتوا جميلة

يا كبار السن ما نبغا الجدل معكم يطول = هرج باللي مات يالشيبان نقص بالعقول
ولا حدن سالم من عيوب الزمان وإن قلت أقول = وأصعب اللحظات عند الناس لحظات الوداع
ألا يا شايب صرت بلشه للمحبين = توكل روح لا تدعي وش تدعيله

مات لأجل الحب من عشاقنا ناس عديد = لكن انتوا في سبيل الحب ما منكم شهيد
ما سمعنا مات واحد من هل الحب الجديد = وأصعب اللحظات عند الناس لحظات الوداع
يا كثر أسفاركم في بلد لندن وبرلين = تودعكم خليله وتنطحكم خليله

إن بغينا نتعب الشيبان ضيعنا النظام = يشتهر صوت الغراب ويندثر صوت الحمام
ولا شواهد مات منكم بس سرد بالكلام = وأصعب اللحظات عند الناس لحظات الوداع
سفرنا نطلع في حضارة البلادين = ولا حنا مثلكم من تقاعد شد حيله

انتهي الحسن الطبيعي في زمان أحمر شفاه = راح دور اللي كما الغزلان في وسط الفلا
عالم المكياج خلي القرد يزهي في حلاه = وأصعب اللحظات عند الناس لحظات الوداع
تحصل فوق خد الفتاة ألفين تلوين =وشعاع الشمس يأتي علي الصبغ ويزيله

رابضن حظك ولا تقدر جمال آخر زمان = عيش عمرك يا عويد الفقر مثل البهلوان
ما جداك إلا تعذرب وأصبحت عشرك ثمان = وأصعب اللحظات عند الناس لحظات الوداع
علامك يا أجودي تجمع الزين بالشين =ويصبح فكر راسك نهاره مثل ليله

يوم ننصحكم نصيحة ما نبيكم تزعلون = صونوا الحب الحقيقي في القلوب وفي العيون
ما بغينا الحب ينزل في الكلاوي والبطون = وأصعب اللحظات عند الناس لحظات الوداع
عسا يصلحكم الله ويهديكم علي الزين = وهذا العلم واضح من أصحاب الفضيلة

النصيحة نشتريها بس يا عللك تبيع = قبل ندخل في المصيف وينتهي فصل الربيع
وأطلب الله يغفر ذنوبك ويشفع لك شفيع =وأصعب اللحظات عند الناس لحظات الوداع
يتمم خالقك دعوتك وتكمل الدين = وفضل الله طمس فضلكم في كل ليله