منتديات الوئام - عرض مشاركة واحدة

25 / 10 / 2018, 39 : 10 PM


	المشاركة الأصلية كتبت بواسطة رآنيا


	ذكرني موضوعك بأيام زمان كانوا تقريبا كل اللي في الحي جيراننا مشاء الله كنّا كأسرة واحدة نعرف بعض ونتزاور في الأعياد والمناسبات بل إنّو بعضهم كان يشوف الجيرة ذي ورطة اذا صارت عنده مناسبة جميع سكان الحي بيحضرو من صغيرهم لكبيرهم هههه ماراح تتخيل إنّو فعلا كل اللي في الحي يعرفو بعض بل حتى انهم مايضيعو اسماء بعض واذكر اني يوم عرفت اختي اللي ساكنة بالمدينة ماتعرف جيرانها اللي معها في العمارة انصدمت وقلت شكلهم اهل المدينة كذا طبعهم لكن الان الوضع تغير وفعلا صار الجار يتهرب من جاره ولا يبغا يتعرف عليه ومن الأمثلة الصحيحة اللي ذكرتها لكن يبقى الجار جار وواجب علينا احترامه وإكرامه وعدم أذيته طرح جميل استاذي عبدالله خلاني اثرثر كثير وانا اتذكر ايّام زمان ههه

وأنتِ يأختي رانيا ذكرتيني بأشياء كثيرة ومنها أكثر المهام اللي كنت وأخواني نقوم فيها زمان.
طبعاً هي توصيل أي شيء ينطبخ في البيت إلى فلانة وفلانة،
وكنت أفرح إذا رحت لبيت وحده من الفلانات لأنها كانت تعطيني نصف ريال.

ومما أتذكره عن مراسيل الجيران إن واحد منهم كان يجينا كل سنة في نفس الموعد تقريباً
ويقول لأمي يرحمها الله: "تسلم عليكِ أمي وتقول لك أنها نفست".

أمّا في حالة الزواجات، فكانت البيوت تفتح أبوابها لاستقبال المعازيم وتصير كأنها بيت واحد كبير.

اللي صاير الآن هو ان سواقين الحي الواحد يعرفون بعضهم أكثر من السكان أنفسهم،
وكل واحد منهم ينقل أسرار البيت اللي يشتغل عندهم للسواقين الآخرين، وحنّا يا غافل لك الله.
ليت العلاقة بين الجيران زي العلاقة اللي بين سواقينهم.

معليش، أنا اللي ثرثرت من جد وخرجت عن الموضوع.

أسعدتني مداخلتك أختي المتميزة،
أسعدك الله في الدارين.