الله يسلمك أختي رحيل،
وأشكرك على تساؤلاتك القيّمة اللي "تتحاذف في كل صوب" واسمحي لي بأن أجاوب عليها
أولاً: ابي أعرف خطيبة ولد خالك وش تبي في الغزاله اللي عيونها زرق ولونها تركوازي ؟؟
حقيقة، كان عندي نفس التساؤل، وبعدين عرفت من ولد خالي أن اسم عائلتها له ارتباط بالغزالة، أما اللون فكان سبب اختياره هو تحدي بين البنت وزميلاتها (يعني تبي تتفشخر على صاحباتها بأن خطيبي جاب لي غزالة بهذا اللون الغريب).
ثانياً: "فيوري " يوم ابتسمت لك مسويه تقويم لاسنانها والا عادي ؟؟
فيوري الله يسلمك كانت تسوي تقويم في نفس وقت رحلتي، وهذا كان من الأسباب اللي ما خلتها تجلس معي في الجزيرة لمدة خمسة أيام لأنه كان عندها موعد مراجعة لطبيب الأسنان، وأنا لاحظت الفرق بين لون غطاء الجزء المقوّم للأسنان، كان أزرق فاتح وحنا رايحين للجزيرة، وبني فاتح وحنا راجعين.
ثالثاً: القبطان وش مصبره عليك ؟ مدلعك كثير ؟ شكلك مبخششه والله اعلم !!
الصراحة القبطان، أنا قلت له في البداية أن قريبي عنده ناقلات بحرية لنقل الوقود، وأنه ناوي يشتري ناقلتين جديدة، وأن قريبي هذا يدوّر سواقين – أقصد قباطنة لها، وعلشان كذا تحمل "غثاي"، ولا كان رماني في البحر من أول يوم.
لا حظت ماشاء الله عليك ان العده اللي ماخذها معاك للجزيرة عُدة رحاله متكامله
خس + بيجامه + ساندويتش + منديل كلينكس
وهذا دليل على احاطتك بالرحلات و الظروف اللي ممكن تواجهنا في أثنائها.
سبق وأن ذكرت في الموضوع بأني قد انشغلت في ترتيبات السفر، وكان من ضمن الترتيبات هي تجهيز الاحتياجات الأساسية التي يحتاجها المغامر، وأن نحرص فيها على ما خف حمله.
أكيد أنتِ ما يفوتك ما شاء الله عليك بأن الخس أخف من القرع.
الشيء الوحيد اللي اشتريته من الجزيرة كان الكلينكس، وكانوا يبيعونه هناك في "الهايبر" بالمنديل وليس العلبة.
الشئ الثاني اللي لاحظته ان الحظ ماشاء الله كان حليفك بالرحله، وانشاء الله يكون يكون حليفك دائما بالواقع.
الحظ اللي في الرحلة يندرج تحت بند "المخرج عايز كذا"، أما الحظ خارج الرحلة فالحمد لله أيام وأيام.
أشكرك رحيل لتفضلك عليّ بالتعليق على الرحلة، واعتذر لكِ مرة ثانية لخروجي عن النص.
دمتِ بأحسن صحة وأسعد حال.