يا من لقلبٍ فيه مثل السعيره
كنه على جمر الهشيم امختومي
وعيني تهل ادموعها من نظيره
وكبدٍ عليها مثل حامي السمومي
وحالٍ نقصها الحب ما هوب غيره
باليوم تنقص تقل حال امحمومي
لو ان مابي جاء بغيري عشيره
ما كان يصبر له ولو ربع يومي
والله ما ناح الحمام ابهديره
او هب نسناس الهوى بالنسومي
إلا ودمع العين مثل المطيره
لين اودع الأوجان مثل الوسومي
بغيت اكنه كودها قصر سيره
اظنها بي ما تبين الوهومي
لاشك بي شيٍ محني يسيره
أمرٍ من الله ما تثيب العلومي
وش حيلة اللي وجعته في ضميره
وعينه امناها رعي الازوال دومي
صبرت صبرٍ حط بالقلب نيره
واليوم باح السد وافطرت صومي
يا تل قلبي تل تالي الكسيره
مقفي بهم قومٍ وبديار قومي
كلٍ يبي وده يفكه منيره
ماله بشيٍ غير نفسه لزومي
على هنوفٍ عند اهلها غريره
لعبت بقلبي ما بقا له ارسومي
بغيت من حسن النبا حسن جيره
لا ينتحر بي مع زمانٍ غشومي
ولاي مثل اللي ايهرج صبيره
قلبه حجر ما هوب قلبه رحومي
رضيت غصب وقلت راضي مسيره
هذا نصيبي حد قسم القسومي
أخاف من هجرٍ يطول ومصيره
الموت أصير امولعٍ ومحرومي
يا عاذليني تركت العذل خيره
يا ناس كثر العذل زود اهمومي
الحب شين ومن شرب من غديره
ما عاد يقوا المنع مثل امهيومي
ولو أن قلبي خابرٍ منه غيره
طويت حبل الود لو فيه يومي
شك ما يخفي علي السريره
صافي من الفرقا يعض البهومي
غروٍ ملكني بالهوى صرت اسيره
امره علي امطاع حتم امحتومي
حديثه احلى من حليبٍ ابشيره
وابهج من القرهود عقب السمومي
الى هرج يسبا العقول الغريره
وانا له اطوع من مرد الكمومي
له قذلةٍ تعمل ابوردٍ نثيره
يرتاح قلبٍ نال منها شمومي
وعينٍ كما عين الوحش مستديره
صويبها بسهومها ما يقومي
ومبيسمٍ عذبٍ كما صبر نيره
وبيضٍ كما نوار نبت الوسومي
والعنق عنق ادميةٍ مستذيره
فزت ابدار ورايعت للحزومي
تنطح نسانيس الهوى تبي ذيره
ولا انها ما راعها كود حومي
وقرت اتخوع في مدامث نشيره
في مطرح عليه هميل الغيومي
ونويهداتٍ توها مستديره
تنطح عن الخصر النحيل الهدومي
وردفه ايبيح بالهدوم القصيره
يارد عليه امجدلاتٍ اركومي
الهرج يكفي صامله عن كثيره
في بالي انه بالبلاد امعدومي
وهو عندي اغلا من جميع الذخيره
ما اسمع به الناصح ولا اللي يلومي
ان ما حصل لي ما تعوضت غيره
بعت الهوى واقفيت بيعة جزومي